បច្ចុប្បន្ននេះ អាជីវករលក់សាច់ជ្រូកនៅប្រទេសថៃកំពុងអំពាវនាវឱ្យរដ្ឋាភិបាលចាប់ផ្តើមធ្វើការនាំចូលសាច់ជ្រូកពីក្រៅប្រទេសជាបន្ទាន់ ដើម្បីទប់ទល់នឹងការកើនឡើងថ្លៃសាច់ជ្រូកលើទីផ្សារ ខណៈដែលតម្លៃកើនឡើងខ្ពស់កំពុងធ្វើឱ្យបាត់បង់អ្នកទទួលទាន និងប្រាក់ចំណូលរបស់ពួកគេអ្នកលក់សាច់ជ្រូកផងដែរ។ នេះបើយោងតាមការចុះផ្សាយដោយសារព័ត៌មានបាងកកប៉ុស្តិ៍។
បើយោងតាមអាជីវករលក់សាច់ជ្រូកនៅផ្សារថៃមួយចំនួន ដែលបានឆ្លើយនៅក្នុងកាសែតបាងកកប៉ុស្ដិ៍បានឱ្យដឹងថា បើមិនមានការអន្តរាគមន៍ពីរដ្ឋាភិបាលទាន់ពេលវេលាទេ នោះតម្លៃសាច់ជ្រូកនៅលើទីផ្សារជាមធ្យមអាចឡើងដល់ជិត ៩ដុល្លារក្នុងមួយគីឡូក្រាម ដែលជាតម្លៃមួយដែលពលរដ្ឋភាគច្រើនមិនអាចទិញបាន។ ក្រុមអាជីវករបានបន្តថា ការកើនឡើងនៃតម្លៃសាច់ជ្រូកបានធ្វើឱ្យការលក់ធ្លាក់ចុះជាងពាក់កណ្តាល ហើយអតិថិជនភាគច្រើនបានកាត់បន្ថយការទិញសាច់ជ្រូក។
ជុំវិញបញ្ហានេះ អាជីវករបានជំរុញឱ្យរដ្ឋាភិបាលឈប់បារម្ភពីដង្ហើមចរន្តសេដ្ឋកិច្ចនៃកសិដ្ឋាចិញ្ចឹមជ្រូកក្នុងស្រុកមួយអន្លើសិន ហើយចាប់ផ្តើមនាំចូលសាច់ជ្រូកពីក្រៅប្រទេសដើម្បីផ្គត់ផ្គង់ទីផ្សារឲ្យបានទាន់ពេលវេលា។ បើមិនដូច្នេះទេ តម្លៃខ្ពស់ពេកនឹងបន្តធ្វើឱ្យប៉ះពាល់យ៉ាងធ្ងន់ធ្ងរដល់អ្នកលក់ និងអ្នកទទួលទាន។
អត្ថបទគួរអាន
សូមជម្រាបថា ការអំពាវនាវរបស់ក្រុមអាជីវករថៃយ៉ាងដូច្នេះ ធ្វើឡើងនៅពេលរដ្ឋាភិបាលចាប់ផ្តើមការស្ទង់មតិមួយដើម្បីបង្កើតស្តុកជ្រូករស់ និងសាច់ជ្រូកកកក្នុងប្រទេស ដើម្បីកំណត់អំពីការផ្គត់ផ្គង់សាច់ជ្រូករបស់ប្រទេសជារៀងរាល់សប្តាហ៍រហូតដល់ស្ថានភាពត្រូវបានដោះស្រាយ។ ទន្ទឹមនេះ បន្ទាប់ពីអ្នកចិញ្ចឹមជ្រូក អ្នកលក់ដុំ និងប្រតិបត្តិករកន្លែងបង្កកអាហារបានរាយការណ៍ពីស្តុករបស់ពួកគេប្រចាំសប្តាហ៍ រដ្ឋាភិបាលថៃក៏បានផ្អាកការនាំចេញជ្រូករស់រហូតដល់ថ្ងៃទី ៥ ខែមេសាផងដែរ។
សូមរំឭកថា ទាក់ទិននឹងបញ្ហានេះ កាលពីសប្ដាហ៍មុននាយកដ្ឋានពាណិជ្ជកម្មថៃ ក៏បានបញ្ជាឱ្យមានការពង្រីកគម្រោងផ្តល់ការបញ្ចុះតម្លៃសាច់ជ្រូក ដើម្បីជួយកាត់បន្ថយថ្លៃចំណាយរស់នៅរបស់ប្រជាពលរដ្ឋ និងព្រមានចាត់វិធានការផ្លូវច្បាប់ចំពោះអាជីវករ ដែលរកឃើញថាមានការលក់ដំឡើងថ្លៃហួសហេតុផងដែរ៕
អត្ថបទ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
