សភាតំណាងរាស្ត្រអាមេរិកបានអនុម័តសេចក្ដីព្រាងច្បាប់ស្ដីពីការចំណាយដល់ប្រទេសអ៊ុយក្រែនក្នុងសំឡេងគាំទ្រ ៣៦៨ ទល់នឹង ៥៧ ដែលជាសំឡេងជំទាស់របស់សមាជិកសភាទាំងអស់មកពីគណបក្សសាធារណរដ្ឋ ខណៈដែលសេចក្ដីព្រាងច្បាប់នេះបានឡើងទៅដល់ព្រឹទ្ធសភាហើយដោយគេរំពឹងថា ខាងព្រឹទ្ធសភានឹងធ្វើការពិនិត្យ និងអនុម័តយ៉ាងឆាប់រហ័សបំផុត។
ប្រធានាធិបតីអាមេរិកលោក Joe Biden បានស្នើឱ្យសភាអនុម័តជំនួយបន្ថែមចំនួន ៣៣ ពាន់លានដុល្លារសម្រាប់អ៊ុយក្រែន កាលពី២សប្តាហ៍មុន ប៉ុន្តែសមាជិកសភាបានសម្រេចចិត្តបង្កើនមូលនិធិផ្នែកយោធា និងមនុស្សធម៌។
តំណាងរាស្ត្រមកពីគណបក្សប្រជាធិបតេយ្យលោកស្រី Rosa DeLauro ជាប្រធានគណៈកម្មាធិការរៀបចំកិច្ចការសភាបាននិយាយដោយជំរុញឱ្យគាំទ្រកញ្ចប់ថវិកានេះថា ច្បាប់នេះនឹងការពារលទ្ធិប្រជាធិបតេយ្យ ដាក់កម្រិតដល់ការឈ្លានពានរបស់រុស្ស៊ី និងពង្រឹងសន្តិសុខជាតិរបស់អាមរិក ហើយអ្វីដែលសំខាន់បំផុតនោះ គឺគាំទ្រអ៊ុយក្រែនតែម្ដង។
លោក Biden បានអំពាវនាវឱ្យព្រឹទ្ធសភាធ្វើការឱ្យបានឆាប់រហ័ស ដើម្បីឱ្យលោកអាចចុះហត្ថលេខាលើច្បាប់នេះមុនពេលជំនួយការពារជាតិ ដែលមានស្រាប់សម្រាប់អ៊ុយក្រែននោះនឹងប្រើប្រាស់អស់នៅចុងខែឧសភានេះ។
អត្ថបទគួរអាន
សមាជិកគណបក្សសាធារណរដ្ឋមួយចំនួនបានជំទាស់នឹងច្បាប់នេះ ដោយបានរិះគន់ក្រុមគណបក្សប្រជាធិបតេយ្យថា ធ្វើការលឿនពេកក្នុងការផ្ញើប្រាក់ដុល្លាររបស់អ្នកជាប់ពន្ធអាមេរិកច្រើនពេកទៅក្រៅប្រទេស។ សមាជិកបក្សប្រជាធិបតេយ្យរបស់លោក Biden គ្រប់គ្រងសភាតឹងរ៉ឹង ប៉ុន្តែច្បាប់នេះនឹងត្រូវការការសំឡេងគាំទ្រពីគណបក្សសាធារណរដ្ឋ ដើម្បីឆ្លងកាត់ព្រឹទ្ធសភា។
លោកស្រី Oksana Markarova ឯកអគ្គរដ្ឋទូតអ៊ុយក្រែនប្រចាំសហរដ្ឋអាមេរិកបានអំពាវនាវសុំជំនួយដល់សមាជិកព្រឹទ្ធសភាទាំងគណបក្សប្រជាធិបតេយ្យ និងគណបក្សសាធារណរដ្ឋនៅក្នុងពិធីជប់លៀងប្រចាំសប្តាហ៍របស់ពួកគេកាលពីថ្ងៃអង្គារសប្ដាហ៍នេះ។
សមាជិកព្រឹទ្ធសភាខាងគណបក្សប្រជាធិបតេយ្យគឺលោក Dick Durbin បាននិយាយបន្ទាប់ពីលោកស្រី Markarova ថា វាជាសារដ៏ស្មោះស្ម័គ្រ និងងាយយល់បំផុតគឺថា ប្រជាជនរបស់អ៊ុយក្រែនកំពុងស្លាប់ ពួកគេអស់ការផ្គត់ផ្គង់ និងគ្រាប់រំសេវដើម្បីប្រយុទ្ធទៀតហើយ។ ពួកគេត្រូវការជំនួយពីអាមេរិកយ៉ាងឆាប់រហ័ស។ ដូច្នេះហើយសហភាអាមេរិកត្រូវតែជួយពន្លឿនវាផង។
សមាជិកព្រឹទ្ធសភាមកពីគណបក្សសាធារណរដ្ឋលោក Rob Portman សមាជិកនៃគណៈកម្មាធិការទំនាក់ទំនងបរទេសព្រឹទ្ធសភានិងជាអ្នកដឹកនាំការប្រជុំព្រឹទ្ធសភាអ៊ុយក្រែនបាននិយាយថា លោករំពឹងថា នឹងមានការគាំទ្រពីគណបក្សសាធារណរដ្ឋគ្រប់គ្រាន់សម្រាប់សេចក្តីព្រាងច្បាប់នេះ ដើម្បីឱ្យវាឆាប់បានឆ្លងកាត់ព្រឹទ្ធសភា។
សង្គ្រាមនៅអ៊ុយក្រែនមកដល់ពេលនេះ បានសម្លាប់ជនស៊ីវិលរាប់ពាន់នាក់ បង្ខំឱ្យពលរដ្ឋអ៊ុយក្រែនរាប់លាននាក់រត់ចោលផ្ទះសម្បែង និងធ្វើឱ្យទីក្រុងតូចធំជាច្រើនក្លាយទៅជាគំនរបាក់បែក។ ទីក្រុងម៉ូស្គូគ្មានអ្វីបង្ហាញនោះទេក្រៅតែពីជ័យជម្នះតិចតួចនៅភាគខាងត្បូង និងភាគខាងកើតនៃប្រទេសអ៊ុយក្រែន៕
អត្ថបទ៖ សុខ ជា
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
