លោក យ៉ូហាណេស អាប្រាហាម បាននិយាយក្នុងបទសម្ភាសន៍ផ្តាច់មុខជាមួយសារព័ត៌មាន CNA កាលពីសប្ដាហ៍មុន នៅឯនិវេសនដ្ឋានរបស់លោកនាទីក្រុងហ្សាកាតា ប្រទេសឥណ្ឌូនេស៊ីថា ជាគោលការណ៍ សហរដ្ឋអាមេរិកគិតថា អាស៊ានដែលរីកចម្រើន រឹងមាំ និងឯករាជ្យគឺល្អសម្រាប់ប្រទេសអាស៊ាននិងសហរដ្ឋអាមេរិក។ សហរដ្ឋាមេរិកចង់បានបែបនេះ ហើយប្រទេសនេះជឿជាក់យ៉ាងខ្លាំងលើមជ្ឈភាពរបស់អាស៊ាន។
លោក អាប្រាហាម បានបន្តថា ដូច្នេះសហរដ្ឋអាមេរិកចង់ធ្វើការជាមួយនិងតាមរយៈអាស៊ាន ដើម្បីស្វែងរកឱកាសសហការលើបញ្ហានានាដែលពាក់ព័ន្ធនឹងប្រជាជនសរុបបញ្ចូលគ្នាចំនួន ១ ប៊ីលាននាក់។
លោកឯកអគ្គរដ្ឋទូតបានកត់សម្គាល់ថា រឿងនេះនឹងពាក់ព័ន្ធនឹងផ្នែកផ្សេងៗនៃរដ្ឋាភិបាលសហរដ្ឋអាមេរិកដែលត្រូវចូលរួមជាមួយសមភាគីអាស៊ានរបស់ពួកគេនៅតាមវិស័យមួយចំនួនដូចជាសុខាភិបាលនិងថាមពលជាដើម។
លោក អាប្រាហាម បានបន្ថែមថា ដូច្នេះតាមវិធីនោះ ពួកគេអាចស្វែងរកដំណោះស្រាយចំពោះបញ្ហាប្រឈមនានាដែលពួកគេទាំងអស់គ្នាជួបប្រទះ ហើយក៏អាចស្វែងរកវិធីដែលពួកគេអាចចាប់យកឱកាសដែលបង្ហាញខ្លួនចំពោះមុខពួកគេផងដែរ។ ហើយអ្វីដែលសំខាន់នោះ ការចូលរួមនោះគួរតែចាប់ផ្តើមពីចំណុចកំពូល។
ប្រធានាធិបតីសហរដ្ឋអាមេរិក លោក ចូ បៃដិន បាននិយាយថា អាស៊ានគឺជា«បេះដូង»នៃយុទ្ធសាស្ត្រតំបន់ឥណ្ឌូ-ប៉ាស៊ីហ្វិកក្នុងរដ្ឋបាលរបស់លោក ហើយលោក អាប្រាហាម បាននិយាយអំពីសារសំខាន់របស់តំបន់នេះថា តំបន់អាស៊ីអាគ្នេយ៍គឺពិតជាសំខាន់ខ្លាំងណាស់ចំពោះយុទ្ធសាស្ត្រតំបន់ឥណ្ឌូប៉ាស៊ីហ្វិករបស់សហរដ្ឋអាមេរិក។
អត្ថបទគួរអាន
លោក អាប្រាហាម បានបន្ថែមថា សហរដ្ឋអាមេរិកគិតថា អាស៊ានមានតួនាទីដ៏សំខាន់មិនគួរឱ្យជឿទាល់តែសោះក្នុងនិម្មាបនកម្មតំបន់ ហើយសហរដ្ឋអាមេរិកគិតថា នៅពេលអាស៊ានមានភាពរុងរឿងនិងឯករាជ្យ យើងទាំងអស់គ្នាកាន់តែប្រសើរឡើង ហើយនៅពេលតំបន់នេះកាន់តែល្អប្រសើរឡើង ពិភពលោកក៏កាន់តែល្អប្រសើរឡើងផងដែរ។
លោក អាប្រាហាម ដែលបានស្បថចូលកាន់តំណែងកាលពីខែកញ្ញាឆ្នាំមុន ក្នុងនាមជាបេសកជនសហរដ្ឋអាមេរិកទទួលបន្ទុកកសាងទំនាក់ទំនងកាន់តែជិតស្និទ្ធជាមួយតំបន់អាស៊ាន បាននិយាយថា ការប្តេជ្ញាចិត្តចំពោះមជ្ឈភាពអាស៊ានមានន័យថា គឺជាការធ្វើការយ៉ាងជិតស្និទ្ធជាមួយនិងតាមរយៈសមាគមនេះ លើបញ្ហាសំខាន់ៗជាច្រើន មិនថាជាបញ្ហាប្រឈម ឬក៏ជាឱកាសនោះឡើយ ហើយលោកបានបង្ហាញខ្លួនឯងថាជាដៃគូដែលអាចទុកចិត្តបាននិងយូរអង្វែងមួយផងដែរ។
ការងាររបស់សហរដ្ឋអាមេរិកជាមួយអាស៊ាន រួមមានការធានាសន្តិសុខសុខភាពសាធារណៈ និងការដោះស្រាយផលប៉ះពាល់នៃការប្រែប្រួលអាកាសធាតុ ដែលប្រទេសអាស៊ីអាគ្នេយ៍មួយចំនួនងាយរងគ្រោះ។ លើវិស័យសេដ្ឋកិច្ចវិញ សហរដ្ឋអាមេរិកបានធ្វើការយ៉ាងជិតស្និទ្ធអស់រយៈពេលជាច្រើនឆ្នាំមកហើយ ជាមួយសមាគមអាស៊ាននៅលើគម្រោងច្រកចេញចូលតែមួយរបស់អាស៊ាន (ASEAN Single Window)។ គម្រោងនេះមានគោលដៅកាត់បន្ថយរបាំងមិនមែនពន្ធគយសម្រាប់ពាណិជ្ជកម្មក្នុងតំបន់អាស៊ាន ហើយដែលលោក អាប្រាហាម បាននិយាយថាវាបានជួយក្រុមហ៊ុននានាដែលរកស៊ីក្នុងតំបន់អាស៊ានឱ្យចំណេញប្រាក់រាប់ពាន់លានដុល្លារ៕
អត្ថបទ៖ សុខ ជា
