សង្គ្រាមឈ្លានពានរុស្ស៊ីមកលើអ៊ុយក្រែន និងត្រូវបានគេចាត់ទុកជាសង្គ្រាមដ៏ធំបំផុតរបស់អឺរ៉ុប ចាប់តាំងពីក្រោយសង្គ្រាមលោកលើកទី២បានបញ្ចប់មក ដោយសង្គ្រាមជាង១ខែមកនេះ បានធ្វើឲ្យមនុស្សជិត៤លាននាក់បានភៀសខ្លួនចេញពីអ៊ុយក្រែនទៅកាន់ប្រទេសជិតខាង និងបណ្តាលឱ្យមនុស្សរាប់ពាន់នាក់ទៀតស្លាប់ និងរងរបួស។ មិនតែប៉ុណ្ណោះ វាក៏បាននាំមកនូវភាពឯកោខ្លាំងណាស់ដែរ សម្រាប់សេដ្ឋកិច្ច និង វត្តមានរុស្ស៊ីលើឆាកអន្តរជាតិ។
ក្នុងនោះនៅក្នុងទីក្រុងកំពង់ផែ Mariupol របស់អ៊ុយក្រែនតែមួយប៉ុណ្ណោះ មានមនុស្សជិត៥ពាន់នាក់ត្រូវបានសម្លាប់រួមទាំងកុមារប្រហែល២១០នាក់។ នេះបើយោងតាមតួលេខពីអភិបាលក្រុង ម៉ារីយ៉ូប៉ូល។ អ្នកស្លាប់ភាគីច្រើន ដោយសារការទម្លាក់គ្រាប់បែកដ៏ខ្លាំងក្លារបស់រុស្ស៊ី។
ដោយសារតែក្រុងកំពង់ផែម៉ារីយ៉ូប៉ូលជាទីតាំងយុទ្ធសាស្ត្រសំខាន់ ដែលរុស្ស៊ីចង់ដណ្តើមមកគ្រប់គ្រងជាយូរហើយមកហើយ ហេតុនេះទើបរុស្ស៊ីបង្កើនការទម្លាក់គ្រាប់បែក និងបាញ់ស្រោចគ្រាប់កាំភ្លើងធំចូលក្នុងទីក្រុងមួយនេះស្ទើររាបដល់ដីទៅហើយ។ អ្នកនៅរស់រានមានជីវិតក្នុងក្រុងមួយនេះ បានប្រាប់ពីបទពិសោធន៍ដ៏ឈឺចាប់ថា មានមនុស្សដែលស្លាប់ដោយសារគ្រាប់បែកផង ការខ្វះខាតការព្យាបាលផង សាកសពត្រូវបានគេកប់នៅពាសវាលពាសកាល គ្រប់ទីកន្លែងឲ្យតែអាចកប់បាន រីឯស្ត្រីខ្លះសម្រាលកូននៅក្នុងបន្ទប់ក្រោមដីក៏មាន។
នៅចំពោះមុខការបង្ហូរឈាមបែបនេះ ភាគីអ៊ុយក្រែននៅតែទទូចឲ្យមានបទឈប់បាញ់មួយ ដែលមានប្រសិទ្ធភាពនៅទូទាំងប្រទេស ប៉ុន្តែរាល់លើក វាមិនត្រូវបានភាគីរុស្ស៊ីមានការអើពើឡើយ។ ជាក់ស្តែង ក្រុមប្រតិភូរបស់រុស្ស៊ី និងអ៊ុយក្រែន បានទៅដល់រដ្ឋធានី អ៊ីស្តង់ប៊ុល នៃប្រទេសតួគីហើយនៅព្រឹកថ្ងៃអង្គារទី២៩ មីនានេះ សម្រាប់កិច្ចចរចាទល់មុខគ្នាជុំទី៤។ ដូចសព្វមួយដង បទឈប់បាញ់នឹងក្លាយជាប្រធានបទសំខាន់ដែលអ៊ុយក្រែននឹងយកមកដាក់លើតុពិភាក្សា។
បន្ថែមពីលើនេះ រដ្ឋមន្ត្រីការបរទេសអ៊ុយក្រែន ឌីមេទ្រី គូឡេបា(Dmytro Kuleba) បានបង្ហើបអោយដឹងថា ក្រៅតែជំរុញការចរចាទៅរកការឈានដល់កិច្ចព្រមព្រៀងស្តីពីបទឈប់បាញ់ហើយនោះ បញ្ហាមនុស្សធម៌ក៏ទីក្រុងកៀវនឹងយកមកជជែកជាមួយម៉ូស្គូដែរ ពិសេសស្ថានភាពមនុស្សធម៌នៅម៉ារីយ៉ូប៉ូផ្ទាល់តែម្តង។
យ៉ាងណាមិញ រដ្ឋាភិបាលក្រុងវ៉ាស៊ីនតោនឯណោះ មិនសូវមានជំនឿចិត្តថា កិច្ចចរចាលើកនេះ នឹងអាចឈានដល់កិច្ចព្រមព្រៀងបទឈប់បាញ់ បញ្ចប់សង្គ្រាមនោះទេ។ មន្ត្រីជាន់ខ្ពស់ក្រសួងការបរទេសអាមេរិកមួយរូប បានប្រាប់ Reuters លោក ពូទីន មិនទាន់ត្រៀមខ្លួនរួចរាល់ក្នុងការសម្របសម្រួលដើម្បីបញ្ចប់សង្គ្រាមនោះទេ។
អត្ថបទគួរអាន
ការលើកឡើងពីទីក្រុងវ៉ាស៊ីនតោនបែបនេះ គឺស្របនឹងអ្វីដែលអ្នកនាំពាក្យវិមានក្រឹមឡាំង លោក Dmitry Peskov ធ្លាប់បាននិយាយដែរ។ លោក Peskov អះអាងថា កិច្ចពិភាក្សាមកទល់ពេលនេះ មិនទាន់ទទួលបានលទ្ធផលជាដុំកំភួននៅឡើយទេ។ ប៉ុន្តែលោកថា វាជារឿងសំខាន់ដែលភាគីទាំងពីរបានបន្តជួបគ្នាដោយផ្ទាល់ ជាជាងតាមអនឡាញ។ អ្នកនាំពាក្យរូបនេះ បដិសេធមិនផ្តល់ព័ត៌មានបន្ថែមទេ ដោយនិយាយថា ការធ្វើដូច្នេះ អាចរំខានដល់ដំណើរការចរចា។
គួរកត់សម្គាល់ថា នៅថ្ងៃអង្គារទី២៩មីនានេះ វិមានក្រឹមឡាំងបានគម្រាមគំហែងពីការប្រើអាវុធនុយក្លេអ៊ែរម្តងទៀត ពិសេសគឺនៅមុនកិច្ចប្រជុំចាប់ផ្តើមនៅល្ងាចថ្ងៃទី ២៩ ខែមីនា។ អ្នកនាំពាក្យក្រឹមឡាំង លោក Peskov បានប្រាប់សារព័ត៌មានរុស្ស៊ី TASS ថា «គ្មាននរណាម្នាក់នៅក្នុងប្រទេសរុស្ស៊ីពិចារណា ពីការប្រើប្រាស់អាវុធនុយក្លេអ៊ែរនោះទេ ប៉ុន្តែកុំឲ្យតែមានជនទីបីលូកដៃ ឬជ្រៀតជ្រែកក្នុងជម្លោះអ៊ុយក្រែន ពីព្រោះថា រុស្ស៊ីមានលទ្ធភាពក្នុងការទប់ស្កាត់ និងដាក់ទោសលើអ្នកទាំងនោះ»។
សូមជម្រាបថា រដ្ឋធានីកៀវ ក្រុងខាគីវ ក្រុងល្វីវ និងក្រុងកំពង់ផែមា់រីយ៉ូប៉ូល សុទ្ធតែស្ថិតក្នុងចំណោមទីក្រុងដែលរងការវាយប្រហារយ៉ាងដំណំជាងគេ និងមានការបាញ់ប្រហារគ្នាមិនលោះថ្ងៃនោះទេ នៅក្នុងរយៈពេល៥សប្តាហ៍មកនេះ។ មានជនស៊ីវិលជាង ១៦ម៉ឺននាក់ឯណោះកំពុងជាប់គាំងក្នុងក្រុងកំពង់ផែម៉ារីយ៉ូប៉ូល មិនអាចគេចចេញទៅណារួច។
អង្គការសហប្រជាជាតិបាននិយាយថា ពួកគេអាចនាំយកស្បៀងអាហារ និងបរិក្ខារពេទ្យទៅកាន់ទីក្រុងខាកៀវ ដែលជាទីក្រុងធំទីពីររបស់អ៊ុយក្រែន និងជាទីក្រុងមួយដែលរងគ្រោះខ្លាំងជាងគេ ប៉ុន្តែទីក្រុងម៉ារីយ៉ូប៉ូលវិញ ពិបាកឲ្យពួកគេចូលទៅខ្លាំងណាស់៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
