រយៈពេល ២ ឆ្នាំបន្ទាប់ពី ការផ្ទុះឡើងនៃជំងឺកូវីដ១៩ ទាំងវៀតណាម និងសហភាពអឺរ៉ុបកំពុងសម្របខ្លួនកាន់តែប្រសើរឡើងចំពោះជំងឺរាតត្បាតសកលមួយនេះ ហើយក៏បានកំពុងពន្លឿនការចាក់វ៉ាក់សាំងដូសជាមូលដ្ឋាន និងការចាក់វ៉ាក់សាំងដូសជំរុញផងដែរ។
ជាពិសេស ទំនាក់ទំនងសេដ្ឋកិច្ច និងពាណិជ្ជកម្មវៀតណាម-អឺរ៉ុប ជាមួយនឹងមូលដ្ឋានគ្រឹះដ៏រឹងមាំពី កិច្ចព្រមព្រៀងពាណិជ្ជកម្មសេរី នឹងផ្ដល់នូវឱកាសជាច្រើននៅក្រោយជំងឺកូវីដ១៩ត្រូវបានបញ្ចប់ ដែលនាំមកនូវផលប្រយោជន៍ដល់សហគមន៍ធុរកិច្ចនៃភាគីទាំងសងខាង។
ជាក់ស្ដែង ស្ថិតិពីគយវៀតណាមបានបង្ហាញថា ទំហំពាណិជ្ជកម្មរវាងវៀតណាម និងសហភាពអឺរ៉ុបឈានដល់ជាង ៥១ ពាន់លានដុល្លារក្នុងរយៈពេល ១១ ខែនៃឆ្នាំ ២០២១ កើនឡើងជិត ១៤ ភាគរយក្នុងរយៈពេលដូចគ្នាបើធៀបទៅនឹងឆ្នាំ ២០២០ បើទោះបីជានៅអំឡុងពេលនេះ មានការរំខានមេរោគកូវីដ១៩រាតត្បាតយ៉ាងណាក្ដី។ ក្នុងនោះ ការនាំចេញរបស់វៀតណាមទៅអឺរ៉ុបមានដល់ទៅជិត ៣៦ ពាន់លាន ដុល្លារ កើនឡើងជាង ១២ ភាគរយ និងការនាំចូលពីអឺរ៉ុបមកវិញមានជាង ១៥ ពាន់លានដុល្លារ កើនឡើងប្រមាណ ១៦ ភាគរយ។
បើតាមតួលេខខាងលើនេះ វៀតណាមទទួលបានអតិរេកពាណិជ្ជកម្ម ប្រមាណជាង ២០ ពាន់លានដុល្លារអាមេរិក កើនឡើងជិត ១០ ភាគរយបើធៀបនឹងរយៈពេលដូចគ្នាកាលពីឆ្នាំមុន។
អត្ថបទគួរអាន
ត្បិតថាក្នុងបរិបទដែលជំងឺកូវីដ១៩ បានជះឥទ្ធិពលអវិជ្ជមានដល់រាល់សកម្មភាពពាណិជ្ជកម្ម និងវិនិយោគរបស់វៀតណាម ប៉ុន្តែការអនុវត្តពាណិជ្ជកម្មសេរីអឺរ៉ុប-វៀតណាម បានជួយដោះស្រាយវិបត្តិសេដ្ឋកិច្ច និងនាំមកនូវឱកាសទីផ្សារចម្រុះថែមទៀតសម្រាប់អាជីវកម្មវៀតណាម និងបង្កើនសន្ទុះកំណើនក្រោយជំងឺរាតត្បាត ស្របពេលដែលបច្ចុប្បន្ននេះ អឺរ៉ុប គឺជាទីផ្សារនាំចូលធំទីពីររបស់ពិភពលោក។
ដូចនេះហើយ សក្ដានុពលសម្រាប់ការនាំចេញរបស់វៀតណាមទៅកាន់អឺរ៉ុបនៅតែមានទំហំធំក្នុងពេលខាងមុខ នៅពេលដែលសេដ្ឋកិច្ចអឺរ៉ុបងើបឡើងវិញ ដែលធ្វើឱ្យម្រូវការនាំចូលរបស់តំបន់មួយនេះកាន់តែកើនឡើង៕
អត្ថបទ៖ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
