ក្រុមហ៊ុនអាកាសចរណ៍ជាតិវៀតណាម Vietnam Airlines បានដឹកពលរដ្ឋរបស់ខ្លួនជិត២០០ នាក់ពីតំបន់អឺរ៉ុប នឹងបានចុះចតនៅក្នុងព្រលានយន្ដហោះអន្តរជាតិ ដាណាង កាលពីថ្ងៃទី ១៦ ខែឧសភា។ អ្នកដំណើរទាំងនោះ រូមមានសិស្សក្រោមវ័យ១៨ឆ្នាំ, មនុស្សពេញវ័យ, ទេសចរដែលមានទិដ្ឋាការផុតកំណត់ និងពលករ ដែលបានបាត់បង់ការងារធ្វើនៅទីនោះ។
ចំពេលដែលមានការរឹតត្បិតការធ្វើដំណើរ ដើម្បីទប់ស្កាត់ការរីករាលដាលនៃមេរោគកូវីដ-១៩ ប្រទេសនៅតំបន់អឺរ៉ុប ក៏បានរឹតត្បិតលើការដឹកជញ្ជូនដែរ។ អ្នកនាំពាក្យក្រសួងការបរទេសវៀតណាម បាននិយាយថា ក្រុមហ៊ុនអាកាសចរណ៍ជាតិវៀតណាម ត្រូវបានរៀបចំឲ្យចុះចតនៅឯព្រលានយន្ដហោះអន្តរជាតិ Frankfurt នៅក្នុងប្រទេសអាល្លឺម៉ង់ និងនៅព្រលានយន្ដហោះអន្តរជាតិ Madrid Barajas ក្នុងប្រទេសអេស្ប៉ាញ ដើម្បីដឹកពលរដ្ឋវៀតណាមនៅទីនោះតាមដែលអាចធ្វើទៅបាន។
អត្ថបទទាក់ទង!
រាល់អ្នកដំណើរទាំងអស់ បានទទួលការត្រួតពិនិត្យសុខភាពមុនពេលឡើងយន្ដហោះ និងពាក់ម៉ាស់នៅអំឡុងពេលធ្វើដំណើរ។ ពួកគេបានដាក់បញ្ជូនលិខិតបញ្ជាក់សុខភាព ហើយត្រូវបានដាក់ឲ្យនៅដាច់ដោយឡែក នៅពេលទៅដល់ប្រទេសវៀតណាម និងត្រូវធ្វើតេស្ដរកកូវីដ-១៩ផងដែរ។
នៅអឺរ៉ុប មកទល់ពេលនេះ មានអ្នកឆ្លងមេរោគកូវីដ-១៩ជិត ២លាននាក់ហើយ និងមានអ្នកស្លាប់ជាង ១៦ម៉ឺននាក់ ក្នុងនោះ ប្រទេសអេស្ប៉ាញ គឺមានចំនួនអ្នកឆ្លងច្រើនជាងគេរហូតដល់ទៅជាង ២៧ម៉ឺននាក់។
ដោយឡែក មានជនជាតិវៀតណាម ៣៤៥ទៀត ត្រូវបានរំពឹងថា ត្រូវបានដឹកបញ្ជូនទៅដល់ប្រទេសវៀតណាមនៅយប់ថ្ងៃទី ១៦ ខែឧសភា ដែលជើងហោះហើរចេញពីទីក្រុងវ៉ាស៊ិនតោន សហរដ្ឋអាមេរិក ហើយវាក៏ជាជើហោះហើរដឹកជញ្ជូនពលរដ្ឋវៀតណាមពីអាមេរិក ជើងទី២ដែរ បន្ទាប់ពីជើងទី១ បានដឹកពលរដ្ឋវៀតណាម ៣៤០ នាក់ កាលពីថ្ងៃទី ៨ ខែឧសភា ហើយវាគឺជាប្រវត្តិសាស្ត្រដំបូងមួយ ដែលក្រុមហ៊ុនអាកាសចរណ៍ជាតិរបស់វៀតណាមបានហោះហើរត្រង់ទៅមកវៀតណាម-សហរដ្ឋអាមេរិក។
មានពលរដ្ឋវៀតណាម ជាង ២លាននាក់កំពុងរស់នៅក្នុងសហរដ្ឋអាមេរិក និងមានភាគច្រើនរស់នៅរដ្ឋកាលីហ្វ័ញ៉ា ខណៈដែលសហរដ្ឋអាមេរិក មានពលរដ្ឋជាង ១,៤លាននាក់ហើយ បានឆ្លងមេរោគកូវីដ-១៩ និងមាន ៨,៨ម៉ឺននាក់ បានស្លាប់ដោយសារតែមេរោគនេះ។
ប៉ុន្មានខែចុងក្រោយនេះ មានជើងហោះហើរពិសេសជាច្រើន បានដឹកអ្នកដំណើរជនជាតិវៀតណាមរាប់ពាន់នាក់ ពីប្រទេស និងដែនដីជាច្រើនរួមមាន កាណាដា, បារាំង, ជប៉ុន, រុស្ស៊ី, អារ៉ាប់រួម និងសហរដ្ឋអាមេរិក រួមទាំងប្រទេសមួយចំនួនទៀតនៅតំបន់អាស៊ីអាគ្នេយ៍។ អ្នកដំណើរ គឺបានបង់ការចំណាយទៅលើការការធ្វើដំណើររបស់ពួកគេដោយខ្លួនឯង។
អាជ្ញាធរអាកាសចរណ៍ស៊ីវិល វៀតណាម បាននិយាយថា មានពលរដ្ឋវៀតណាមប្រហែល ៤.៣០០នាក់ទៀត នឹងត្រូវបានបញ្ជូនតាមជើងហោះហើរពិសេសនៅពាក់កណ្ដាលខែមិថុនា។
ប្រទេសវៀតណាម មានអ្នកឆ្លងកូវីដ-១៩ សរុបកើនឡើងដល់ ៣១៨ នាក់ គិតត្រឹមថ្ងៃទី ១៦ ឧសភា រួមទាំងករណីអ្នកដំណើរម្នាក់រកឃើញមានវិជ្ជមានកូវីដ-១៩ ក្រោយពីត្រឡប់មកពីកម្ពុជា ម្នាក់ទៀត ទើបត្រឡប់មកពីហ្វីលីពីន និង ២នាក់ទៀតត្រឡប់មកពីប្រទេសរុស្ស៊ី៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
