ធនាគារជាច្រើននៅវៀតណាមបញ្ចុះអត្រាការប្រាក់ច្រើនសម្រាប់កម្ចីទិញផ្ទះនៅដើមឆ្នាំ២០២៤

យោងតាមសារព័ត៌មានវៀតណាម VnExpress បង្ហាញថា ពេលនេះអត្រាការប្រាក់កម្ចីទិញផ្ទះនៅធនាគារវិនិយោគ និងអភិវឌ្ឍន៍វៀតណាម (BIDV) ត្រូវបានបញ្ចុះមកនៅត្រឹមប្រហែល៦.៥%ក្នុងមួយឆ្នាំ ហើយអត្រាការប្រាក់នៅធនាគារឧស្សាហកម្ម និងពាណិជ្ជកម្ម (VietinBank) ត្រូវបានបញ្ចុះមកនៅត្រឹម៦.៤%ក្នុងមួយឆ្នាំ។ ចំណែកឯធនាគារ Vietcombank ក៏បានបញ្ចុះអត្រាការប្រាក់កម្ចីទិញផ្ទះមកនៅត្រឹម៦.៧%ក្នុងមួយឆ្នាំផងដែរ។

ដោយឡែកពីនេះ ធនាគារ Agribank បានរក្សាអត្រាការប្រាក់កម្ចីខ្ពស់បំផុតក្នុងចំណោមធនាគាររដ្ឋផ្សេង​ៗ​ទៀតជាមួយនឹងអត្រាការប្រាក់៧%ក្នុងមួយឆ្នាំ។

ក្រៅពីធនាគារក្នុងស្រុក គេក៏សង្កេតឃើញធនាគារបរទេសនៅក្នុងប្រទេសនេះបានបញ្ចុះអត្រាការប្រាក់កម្ចីទិញផ្ទះនេះដែរ។ ជាក់ស្ដែងធនាគារសិង្ហបុរី UOB និងធនាគារអ៊ូរី (Wooribank) របស់កូរ៉េ បានបញ្ចុះអត្រាការប្រាក់កម្ចីទិញផ្ទះមកនៅត្រឹម៦%ក្នុងមួយឆ្នាំ។

ក្នុងសន្និសីទសារព័ត៌មាននាពេលថ្មីៗនេះស្ដីពីការអនុវត្តកិច្ចការក្នុងវិស័យធនាគារឆ្នាំ២០២៤ទេសាភិបាលរងនៃធនាគាររដ្ឋវៀតណាម លោក ដាវ មិញ ទូ (Dao Minh Tu) បាននិយាយថា អត្រាការប្រាក់លើប្រាក់បញ្ញើ និងប្រាក់កម្ចីថ្មីរបស់ធនាគារពាណិជ្ជបានធ្លាក់ចុះជាង២%ក្នុងមួយឆ្នាំ បើធៀបនឹងចុងឆ្នាំ២០២២ ហើយថា អត្រាការប្រាក់កម្ចីនេះគឺជាកម្រិតទាបមិនធ្លាប់មានក្នុងពេល២០ឆ្នាំមកនេះ ហើយធនាគារពាណិជ្ជជាច្រើននិយាយថា ពួកគេមិនអាចបញ្ចុះអត្រាការប្រាក់បន្ថែមទៀតបានឡើយ។

នាយកនៃធនាគារបរទេសមួយបានធ្វើការវាយតម្លៃថា ការកែសម្រួលកម្រិតចំណាយមូលធនរបស់ធនាគារគឺជាវិធានការដ៏សំខាន់បំផុតដើម្បីបញ្ចុះអត្រាការប្រាក់ច្រើនបែបនេះ នៅពេលប្រាក់បញ្ញើមានការប្រាក់ខ្ពស់ពីឆ្នាំ២០២៣ ដល់ពេលត្រូវទូទាត់។ នាយកធនាគាររូបនេះបានបន្ថែមថា កត្តាជំរុញដ៏សំខាន់មួយទៀតស្ថិតនៅពីក្រោយការបញ្ចុះអត្រាការប្រាក់នេះគឺថា ធនាគារនានាកំពុងកាត់បន្ថយថ្លៃចំណាយមូលធនដើម្បីជំរុញតម្រូវការឥណទាន៕

អត្ថបទ៖ សុខ ជា