ជុំវិញបញ្ហានេះ ត្រូវបានអ្នកតាមដានសេដ្ឋកិច្ច និងនយោបាយតំបន់ មើលឃើញថា កំពុងធ្វើឱ្យមានការបែកបាក់ផ្នែកភូមិសាស្ត្រនយោបាយ និងភាពមិនច្បាស់លាស់នៅក្នុងប្រព័ន្ធពាណិជ្ជកម្មពហុភាគីរបស់ពិភពលោក។ នេះបើយោងតាមការចុះផ្សាយដោយសារព័ត៌មាន South China Morning Post។
ក្នុងកិច្ចប្រជុំអង្គការពាណិជ្ជកម្មពិភពលោកកាលពីថ្ងៃទី ២០ តុលា អំពីការត្រួតពិនិត្យគោលនយោបាយពាណិជ្ជកម្មលើកទី៨របស់ចិន គេសង្កេតឃើញថា មានបង្ហាញពីការមិនពេញចិត្តយ៉ាងខ្លាំងចំពោះអាកប្បកិរិយាពាណិជ្ជកម្មរបស់ចិនបន្ទាប់ពីការផ្លាស់ប្តូរគោលនយោបាយចុងក្រោយរបស់ចិនកាលពីបីឆ្នាំមុន។ សហរដ្ឋអាមេរិក សហភាពអឺរ៉ុប ជប៉ុន អង់គ្លេស អូស្ត្រាលី និងកាណាដាក៏បានចូលរួមជាមួយអង្គការពាណិជ្ជកម្មពិភពលោកក្នុងការត្រួតពិនិត្យគោលនយោបាយពាណិជ្ជកម្មរបស់ចិនលើកដំបូងតាំងពីឆ្នាំ២០១៨មកម្ល៉េះ។
ក្នុងកិច្ចប្រជុំនោះ តំណាងចូលរួមពីប្រទេសចិន គឺមានលោក វ៉ាង វិនតៅ (Wang Wentao) រដ្ឋមន្ត្រីក្រសួងពាណិជ្ជកម្មចិន ដែលបានដឹកនាំគណៈប្រតិភូចំនួន២០រូបបានចូលរួមប្រជុំតាមរយៈប្រព័ន្ធវីដេអូ ដោយក្នុងនោះ លោក វ៉ាង វិនតៅ ក៏បានលើកឡើងពីការសម្រេចបានរបស់ក្រុងប៉េកាំង រួមមានការកាត់បន្ថយភាពក្រីក្រ និងការងើបឡើងវិញនៃសេដ្ឋកិច្ចចិនពីវិបត្តិជំងឺរាតត្បាតកូវីដ១៩ជាដើម។ តាមសារព័ត៌មាន រ៉យទ័រ ដែលបានស្រង់សម្ដីរបស់រដ្ឋមន្ត្រីក្រសួងពាណិជ្ជកម្មចិនរូបនេះ បានថ្លែងនៅក្នុងកិច្ចប្រជុំថា មូលដ្ឋានគោលនយោបាយរបស់ចិន គឺមានភាពបើកចំហសេដ្ឋកិច្ចរស់ខ្លួន និងមានការធ្វើកំណែទម្រងស៊ីជម្រៅដោយគោរពទៅតាមច្បាប់របស់អង្គការពាណិជ្ជកម្មពិភពលោក។ ក៏ប៉ុន្ដែ សមាជិកអង្គការពាណិជ្ជកម្មពិភពលោកផ្សេងទៀត បានទទូចឲ្យចិនធ្វើកំណែទម្រង់គោលនយោបាយពាណិជ្ជកម្មរបស់ខ្លួន ដើម្បីសម្រេចឲ្យបាននូវការប្រកួតប្រជែងទីផ្សារដែលស្មើភាព និងមានតម្លាភាព។
អត្ថបទគួរអាន
គួររំឭកថា ជុំវិញនឹងការត្រួតពិនិត្យគោលនយោបាយពាណិជ្ជកម្មរបស់ប្រទេសចិន ឃើញថាប្រទេសចិនទទួលបានសំណួរជាង១ពាន់៦រយសំណួរឯណោះ ដែលបានសរសេរផ្ញើមកពីប្រទេសសមាជិកអង្គការពាណិជ្ជកម្មពិភពលោកចំនួន៤០ ភាគច្រើននៃសំនួរទាំងនោះ ក៏ត្រូវបានឆ្លើយត្រឡប់ទៅវិញរួចហើយដែរតាមរយៈសំណេរ ហើយចិននឹងមានឱកាសការពារខ្លួនពីការចោទសួរនេះបន្ដទៀតនៅថ្ងៃសុក្រសប្ដាហ៍នេះ អំឡុងពេលដែលមានការបើកកិច្ចប្រជុំត្រួតពិនិត្យជាលើកទី២។
យ៉ាងណាក៏ដោយចុះ ក្នុងកិច្ចប្រជុំកាលពីថ្ងៃពុធកន្លងទៅនេះ មានបណ្តាប្រទេសលោកខាងលិចមួយចំនួន បានថ្កោលទោសចំពោះការសម្លុតគំរាមកំហែងរបស់ចិន ព្រមទាំងប្រឆាំងនឹងការអនុវត្តពាណិកម្មអយុត្តិធម៌ មិនស្មើភាពគ្នារបស់ប្រទេសចិនផងដែរ។
ក្នុងនោះប្រទេស អូស្ត្រាលីដែលជាប្រទេសកំពុងមានជម្លោះពាណិជ្ជកម្ម និងការទូតជាមួយប្រទេសចិនចាប់តាំងពីដើមឆ្នាំមុនបានចោទប្រកាន់ទីក្រុងប៉េកាំងពីបទ“ ការសាកល្បងជាមួយប្រព័ន្ធពាណិជ្ជកម្មពិភពលោកតាមរយៈការអនុវត្តដែលផ្ទុយពីប្រព័ន្ធរបស់អង្គការពាណិជ្ជកម្មពិភពលោក។
ទន្ទឹមនេះ ប្រទេសជប៉ុនបានចោទចិនថា ខ្វះតម្លាភាព និងបានបង្ខូចទ្រង់ទ្រាយទីផ្សារដែកថែបពិភពលោក។ ខណៈអង់គ្លេសបានអំពាវនាវឱ្យប្រទេសចិនផ្តល់សច្ចាប័ន និងអនុវត្តប្រកបដោយប្រសិទ្ធភាពនូវអនុសញ្ញាការងារដោយបង្ខំរបស់អង្គការពលកម្មអន្តរជាតិ។
ដោយឡែក អ្នកតំណាងប្រទេសកាណាដាវិញ ក៏បានលើកឡើងថា សកម្មភាពរបស់ចិនក្នុងការដាក់កំហិត ពាណិជ្ជកម្មសេដ្ឋកិច្ចតែងតែធ្វើឡើងដើម្បីឆ្លើយតបទៅនឹងការខ្វែងគំនិតគ្នាផ្នែកនយោបាយតែប៉ុណ្ណោះ ។
យ៉ាងណាក៏ដោយ សមាជិកអង្គការពាណិជ្ជកម្មពិភពលោកបានរំពឹងថា ល័ក្ខខណ្ឌដែលបានដាក់ចេញ នឹងធ្វើឱ្យចិនរុះរើគោលនយោបាយ និងការអនុវត្តបច្ចុប្បន្នរបស់ខ្លួន ខណៈដែលក្រុមសមាជិកប្រឆាំងនឹងចិនទាំងនោះថា ទង្វើរបស់ចិនបច្ចុប្បន្ន គឺមិនត្រូវគ្នានឹងប្រព័ន្ធពាណិជ្ជកម្មអន្តរជាតិដោយផ្អែកលើគោលនយោបាយបើកចំហទីផ្សារនោះឡើយ បើទោះបីជាគេដឹងថា ប្រទេសចិនទំនងជាគ្មានទំនោរចង់ផ្លាស់ប្តូរក៏ដោយ៕
អត្ថបទ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
