អត្ថប្រយោជន៍ និងរបៀបនៃការប្រើប្រាស់ស្រកីដូងមានច្រើនប្រភេទ ដូចជាការយកស្រកីដូងទៅគ្របនៅតាមគល់ដំណាំ ការយកស្រកីដូងទៅកិនឲ្យម៉ដ្ឋសម្រាប់លាយល្បាយដី និងជីដើម្បីបង្កើនបរិមាណក៏ដូចជាគុណភាពដី ការយកស្រកីដូងទៅផ្សាំមែក និងសម្រាប់ដាក់ថង់ដាំរុក្ខជាតិលំអរផ្សេងៗទៀតផងដែរ។
លោក ធៀម តាំងឡូត អ្នកគ្រប់គ្រងទូទៅកសិដ្ឋានតាខ្មៅ បានបញ្ជាក់ឲ្យដឹងថា កសិដ្ឋានរបស់លោក បានយកស្រកីដូងទុំមកកែច្នៃកិនទៅជាប្រភេទល្បាយម៉ដ្ឋ និងសរសៃសម្រាប់យកទៅលាយដី លាយជី ឬដាក់ផ្សាំដំណាំជាច្រើនប្រភេទផងដែរ ហើយបច្ចុប្បន្ន ការបញ្ជាទិញស្រកីដូងកែច្នៃទាំងនេះ កំពុងមានមានតម្រូវការកាន់តែច្រើនឡើងៗ។
អ្នកគ្រប់គ្រងទូទៅកសិដ្ឋានតាខ្មៅរូបនេះ បានបញ្ជាក់ឲ្យដឹងថាខាងកសិដ្ឋានរបស់លោកសម្រេចចិត្តជ្រើសរើសយកស្រកីដូងទុំមកប្រើប្រាស់នេះ ពីព្រោះថាស្រកីដូងទុំមានលក្ខណៈពិសេសត្រង់ថា នៅពេលយកមកប្រើប្រាស់នៅលើដំណាំភ្លាមៗគឺមិនមានផលប៉ះពាល់អ្វីនោះទេ ដោយសារតែស្រកីដូងទុំមិនមានជាតិជ័រដែលនាំឲ្យប៉ះពាល់ដល់ឬសគល់ដំណាំ រីឯស្រកីដូងខ្ចីដែលយកទៅហាលឲ្យស្ងួតនៅពេលយកទៅដាក់ដាំដំណាំអាចបណ្តាលឲ្យមានប្រភេទផ្សិតកើតឡើងដែលបណ្តាលឲ្យរលួយដល់គល់ដំណាំជាដើម។ អត្ថប្រយោជន៍ និងរបៀបនៃការប្រើប្រាស់ស្រកីដូងមានច្រើនប្រភេទ ដូចជាការយកស្រកីដូងទៅគ្របនៅតាមគល់ដំណាំ ការយកស្រកីដូងទៅកិនឲ្យម៉ដ្ឋសម្រាប់លាយល្បាយដី និងជីដើម្បីបង្កើនបរិមាណក៏ដូចជាគុណភាពដី ការយកស្រកីដូងទៅផ្សាំមែក និងសម្រាប់ដាក់ថង់ដាំរុក្ខជាតិលំអរផ្សេងៗទៀតផងដែរ ។
អ្នកគ្រប់គ្រងទូទៅកសិដ្ឋានកែច្នៃស្រកីដូងរូបនេះ បានប្រាប់ឲ្យដឹងថា ដំបូងឡើយ គឺធ្វើការផលិតស្រកីដូងនេះ សម្រាប់តែតម្រួវការអ្នករស់នៅទីក្រុងតែប៉ុណ្ណោះ ដោយអ្នកទិញភាគច្រើន គឺយកទៅប្រើសម្រាប់លាយជាមួយដី និងជីដាំផ្កា និងរុក្ខជាតិលំអរតិចតួចនៅក្នុងផ្ទះ។ ប៉ុន្ដែ បន្ទាប់ពីមានការផ្សព្វផ្សាយនៅតាមបណ្តាយសង្គមនានា ហើយមានការគាំទ្រច្រើនពីអតិថិជននៅតាមបណ្តាខេត្ត លោកក៏បានផលិតស្រកីដូងកាន់តែច្រើន ដើម្បីបំពេញតម្រូវការទីផ្សារ ពិសេសអ្នកទិញដែលជាម្ចាស់ចម្ការដាំដំណាំទូទៅ។
ការផលិតស្រកីដូងរបស់កសិដ្ឋានតាខ្មៅ មានច្រើនប្រភេទដូចជា ស្រកីដូងម៉ដ្ឋ ស្រកីដូងសរសៃ ស្រកីដូងដុំធំ និងជន្លង់ស្រកីដូងដែលមានក្រាលជីកំប៉ុសធម្មជាតិខាងក្នុងសម្រាប់ដាំដើមឈើប្រភេទវល្លិ និងផ្កាជាដើម។
លោក ធៀម តាំងឡូត អ្នកគ្រប់គ្រងទូទៅកសិដ្ឋានតាខ្មៅ បានគូសបញ្ជាក់ថា ស្រកីដូងម៉ដ្ឋ និងសរសៃ គឺមានការពេញនិយមនិងលក់ដាច់ជាប់ជាប្រចាំ ដែលជាមធ្យមក្នុងមួយថ្ងៃអាចលក់បាន ពី២០ ទៅ៣០ បេ ដែលក្នុងមួយបេមានចំនួន៥គីឡូក្រាម មានតម្លៃ ២ម៉ឺនរៀល។ លោកបន្ថែមថា បច្ចុប្បន្ន ក៏មានអ្នកបញ្ជាទិញស្រកីដូងប្រភេទដុំធំច្រើនដែរ ពិសេសទិញយកទៅប្រើប្រាស់សម្រាប់ការដាំដើមវ៉ាន់នីឡាតែម្ដង។
បើតាមអ្នកគ្រប់គ្រងទូទៅរូបនេះ ស្រកីដូងដែលលោកបកែច្នៃ គឺបានប្រមូលទិញមកពីកន្លែងកោសដូង ហើយមុននឹងកែច្នៃបាន គឺត្រូវការហាលវាជាមុនសិន ទើបធ្វើការកិន។ ការផលិតស្រកីដូងនេះក៏ជួបឧបសគ្គមួយចំនួនដែរដូចជា ត្រូវការទីតាំងផលិតមួយសមរម្យ ដោយសារការផលិតស្រកីដូងកិននេះ បានបញ្ជេញសំឡេងរំខាន ក៏ដូចជាការហុយផងដែរ ដែលនាំឲ្យមានការប៉ះពាល់ដល់អ្នកដទៃ ហើយបច្ចុប្បន្ន ផលិតផលនេះ ក៏មានការប្រកួតប្រជែងទីផ្សារច្រើនគួរសមដែរ៕
