តើមានកត្តាអ្វីជំរុញឱ្យធនាគារពិភពលោកបន្ទាបការព្យាករកំណើនសេដ្ឋកិច្ចថៃ មកនៅត្រឹម២,៨% នៅឆ្នាំនេះ?

ធនាគារពិភពលោកកាលពីខែធ្នូ ឆ្នាំ២០២៣ បានព្យាករពីកំណើនសេដ្ឋកិច្ចរបស់ថៃ សម្រាប់ឆ្នាំ២០២៤ ថា នឹងមានក្នុងអត្រា៣,២% និងមានក្នុងរង្វង់៣,១% សម្រាប់ឆ្នាំ២០២៥។ ប៉ុន្តែនៅថ្ងៃចន្ទ ដើមសប្តាហ៍នេះ ធនាគារនេះបានកែប្រែការព្យាកររបស់ខ្លួនដោយកាត់បន្ថយមកនៅត្រឹម២,៨% សម្រាប់ឆ្នាំនេះ មុនឡើងដល់៣% សម្រាប់ឆ្នាំ២០២៥។ ជាមួយគ្នានេះធនាគារកណ្តាលរបស់ប្រទេសថៃ កាលពីខែកុម្ភៈ ក៏បានទម្លាក់ទស្សនវិស័យកំណើនសេដ្ឋកិច្ចរបស់ខ្លួនសម្រាប់ឆ្នាំ២០២៤ ពីអត្រា៣,២% មកនៅត្រឹមចន្លោះពី២,៥% ទៅ៣%ផងដែរ។

លោក កៀទីផង អារីយ៉ាព្រូចយ៉ា (Kiatipong Ariyapruchya) សេដ្ឋវិទូជាន់ខ្ពស់របស់ធនាគារពិភពលោកបានប្រាប់អ្នកសារព័ត៌មាននៅសន្និសីទពីចម្ងាយខ្លីមួយថា មូលហេតុនៃការកាត់បន្ថយទស្សនវិស័យកំណើនសេដ្ឋកិច្ចថៃនេះ គឺដោយសារតែការកើនឡើងយឺតនៃពាណិជ្ជកម្មសកល គួបផ្សំរដ្ឋាភិបាលថៃបានពន្យារពេលក្នុងការផ្តល់ប្រាក់ឧបត្ថម្ភដល់ពលរដ្ឋខ្លួន ដែលធ្វើឱ្យចរន្តនៃការចំណាយក្នុងសេដ្ឋកិច្ចមានសម្ទុះខ្សោយ។

ធនាគារពិភពលោកបាននិយាយក្នុងសេចក្តីថ្លែងការណ៍ថា ការនាំចេញ និងការរំពឹងទុកពីការ វិនិយោគសាធារណៈមិនច្បាស់លាស់ ក៏ត្រូវបានចាត់ទុកជាហេតុផលមួយនៃការបន្ទាបទស្សនវិស័យសេដ្ឋកិច្ចនៅឆ្នាំនេះផងដែរ។ យ៉ាងណាមិញ ក្រុមប្រឹក្សារបស់អ្នកដឹកជញ្ជូនរំពឹងថា ការនាំចេញទំនិញរបស់ថៃនឹងកើនឡើងពី១% ទៅ ២% នៅឆ្នាំនេះ។

ធនាគារពិភពលោកបាននិយាយថា វិស័យទេសចរណ៍ និងការប្រើប្រាស់ឯកជននឹងក្លាយជាកត្តាជំរុញកំណើនដ៏សំខាន់ ដោយគេបានព្យាករថា ការមកដល់របស់ភ្ញៀវទេសចរនៅឆ្នាំនេះនឹងឈានដល់៩០% នៃកម្រិតដូចមុនពេលមានការផ្ទុះឡើងនៃជំងឺកូវីដ-១៩ ខណៈដែលរដ្ឋាភិបាលថៃកំពុងកំណត់គោលដៅទទួលបានភ្ញៀវបរទេសចំនួន៤០លាននាក់ក្នុងឆ្នាំនេះ បន្ទាប់ពីទទួលបានភ្ញៀវទេសចរចំនួន២៨លាននាក់ក្នុងឆ្នាំ២០២៣៕

អត្ថបទ៖ សុខ ជា