កង់បីអគ្គិសនី ONiON ត្រូវបានតម្លើងនៅក្នុងខេត្ដកណ្ដាល មានទីតាំងស្ថិតនៅក្នុងតំបន់សេដ្ឋកិច្ចពិសេស សុវណ្ណភូមិ ដោយមានទុនវិនិយោគប្រមាណ ២០លានដុល្លារអាមេរិក និងអាចបង្កើតការងារបានចំនួន ៣៨០កន្លែង។
កង់បីប្រើថាមពលអគ្គិសនីនេះ មានសមត្ថភាពអាចជិះបាន១១០ គីឡូម៉ែត្រ រាល់ពេលសាកអាគុយម្ដង ដែលស្មើនឹងតម្លៃ 0.02$ ក្នុងមួយគីឡូម៉ែត្រ ឬ 60$ ក្នុងមួយខែ ។
ក្រុមហ៊ុន Onion Mobility Co., Ltd ដែលចែកចាយកង់បីអគ្គិសនី ONiON នេះ គឺជាបងប្អូនគ្នានឹងក្រុមហ៊ុនបុត្រសម្ព័ន្ធ MVL TADA (Cambodia) Co., Ltd ដែលផ្ដល់សេវាកម្មកក់យានជំនិះធ្វើដំណើរនៅកម្ពុជាតាមរយៈកម្មវិធីទូរស័ព្ទ (TADA App) ដោយក្រុមហ៊ុនទាំងពីរនេះគឺនៅក្រោមការគ្រប់គ្រងរបស់ក្រុមហ៊ុន MVLLABS Pte Ltd (MVL) ដែលមានទីតាំងនៅប្រទេសសិង្ហបុរី ។
អត្ថបទទាក់ទង
ចំណែកឯ កង់បីអគ្គិសនី ONiON ត្រូវបានរចនារូបរាងនិងបញ្ចេញគំនិតឡើង (Develop) នៅប្រទេសកូរ៉េខាងត្បូង ។
លោក Kay Woo ជានាយកប្រតិបត្ដិ របស់ក្រុមហ៊ុន Onion Mobility Co., Ltd បានបង្ហាញឆន្ទៈរបស់ខ្លួនថា នេះជាការនាំយកមកនូវ ភាពពេញនិយមក្នុងការប្រើប្រាស់ កង់បីអគ្គិសនីនៅក្នុងប្រទេសកម្ពុជា តាមរយៈ ការផលិតយានជំនិះដែលមានសេវាកម្មប្រកួតប្រជែង ភ្ជាប់ជាមួយ មធ្យោបាយកក់ការធ្វើដំណើរ TADA។ ក្នុងពេលជាមួយគ្នានោះផងដែរ យើងក៏បង្កើតឲ្យមានប្រព័ន្ធអេកូឡូស៊ីមួយ ដែលអាចជួយផ្នែកសេដ្ឋកិច្ច ដល់អ្នកបើកកង់បីផងដែរ ។
ពីដើមមក មធ្យោបាយធ្វើដំណើរពេញនិយមរបស់អ្នករស់នៅក្នុងទីក្រុង ជាពិសេស រាជធានីភ្នំពេញ គឺ ម៉ូតូឌុប បន្ទាប់មក គឺរ៉ឺម៉កកង់បីដែលជារ៉ឺម៉កដែលសណ្ដោងដោយម៉ូតូ បានចូលមកជំនួសម៉ូតូឌុបបន្តិចម្ដងៗ ពីព្រោះតែវាមានដំបូលជ្រកភ្លៀងជ្រកកម្ដៅថ្ងៃ និងអាចជិះបានគ្នាច្រើន ។ ក្រោយមកទៀត កង់បីឥណ្ឌាដែលប្រើឧស្ម័ន ក៏បានចូលមកដណ្ដើមប្រជាប្រិយពីកង់បីធម្មតា ។
តើទៅថ្ងៃមុខទៀត កង់បីអគ្គិសនី ឬកង់បីប្រើអាគុយនេះ អាចនឹងចូលមកដណ្ដើមប្រជាប្រិយពីកង់បីឥណ្ឌាប្រើហ្គាស ឬឧស្ម័ន បានដែរ ឬទេ ។ ចម្លើយ គឺថា យើងចាំមើលសិន អំពីប្រសិទ្ធផល (ភាពសន្សំសំចៃ និងគុណភាពប្រើប្រាស់) របស់កង់បីអគ្គិសនីនេះ វាល្អប៉ុណ្ណា ?
