នាយករដ្ឋមន្ត្រីម៉ាឡេស៊ីលោក អានវ៉ា អ៊ីប្រាហ៊ីម បានអះអាងថា ប្រទេសម៉ាឡេស៊ីនឹងកែសម្រួល សេវាសាធារណៈថ្មី ហើយនៅពេលនោះមន្រ្តីរដ្ឋាភិបាលនឹងទទួលឱកាសដំឡើងប្រាក់បៀវត្សរ៍ចាប់ពីថ្ងៃទី ១ ខែធ្នូ ឆ្នាំ២០២៤។ ក្រោមផែនការដំឡើងប្រាក់ខែនេះ មន្រ្តីរដ្ឋាភិបាលម៉ាឡេស៊ីទាំង១,៦លាននាក់ នឹងទទួលបានអត្ថប្រយោជន៍ជាច្រើនពីការដាក់ចេញគោលនយោបាយថ្មីរបស់លោក អានវ៉ា។
តាមសេចក្តីរាយការណ៍បានឲ្យដឹងថា ការផ្លាស់ប្តូរនេះកើតឡើងនៅពេលដែលរដ្ឋាភិបាលសម្លឹងមើលការអនុវត្តកំណែទម្រង់សារពើពន្ធ រួមទាំងការកាត់បន្ថយការឧបត្ថម្ភធនប្រេងឥន្ធនៈ និងអត្រាពន្ធមួយចំនួន។លោក អានវ៉ា បាននិយាយថា មន្ត្រីរដ្ឋាភិបាលនៅក្នុងតួនាទីគ្រប់គ្រងនឹងទទួលបានការដំឡើងប្រាក់បៀវត្សរ៍៧% ខណៈអ្នកនៅក្នុងតួនាទីវិជ្ជាជីវៈ និងប្រតិបត្តិនឹងទទួលបានការដំឡើងប្រាក់ខែ១៥%។លោកបានបន្តថា ការសម្រេចកែសម្រួលឆ្នាំសារពើរពន្ធរបស់ម៉ាឡេស៊ី គឺអាចនឹងនាំឲ្យកម្រិតប្រាក់ចំណូល សម្រាប់មន្ត្រីរដ្ឋាភិបាលទាំងអស់នឹងកើនចន្លោះពី១៦,៨%ទៅ៤២,៧%។ ការកែសម្រួលប្រាក់បៀវត្សរ៍នេះត្រូវបានគេរំពឹងថា នឹងធ្វើឱ្យរដ្ឋាភិបាលខាតបង់ច្រើនជាង២ពាន់លានដុល្លារក្នុងមួយឆ្នាំ។
តាមរយៈការដាក់ចេញគោលនយោបាយនេះ ត្រូវបានគេព្យាករណ៍ថា អតិផរណានឹងមាននិន្នាការកើនឡើងខ្ពស់នៅក្នុងឆមាសទីពីរ ហើយកំណើនអតិផរណានេះ គឺដោយសារការសម្រេចកាត់បន្ថយការឧបត្ថម្ភធនប្រេងម៉ាស៊ូត ប៉ុន្តែទោះបីជាយ៉ាងណាធនាគារកណ្តាលម៉ាឡេស៊ីអះអាងថា ផលប៉ះពាល់ទំនងជានៅតែអាចគ្រប់គ្រងបាន៕
ដោយៈ សរ សុជាតិ
