ក្រសួងកសិកម្មរំពឹងគម្រោងហិរញ្ញវត្ថុគាំទ្រការវិនិយោគទំហំ៧លានដុល្លារ ជួយលើកកម្ពស់វិស័យកែច្នៃផលិតផលជលផលឱ្យកាន់តែរីកចម្រើន

ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទបានចាត់ទុក «កម្មវិធីហិរញ្ញវត្ថុគាំទ្រការវិនិយោគ គឺជាគំនិតផ្ដួចផ្ដើមមួយដ៏ល្អ សម្រាប់គាំទ្រដល់កិច្ចសហការរវាងរដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ ព្រមទាំងអង្គការ UNIDO និងវិស័យឯកជន ដើម្បីជំរុញកំណើនក្នុងវិស័យជលផលក្រោយប្រមូលផលនៅកម្ពុជា។ រដ្ឋមន្រ្តីរូបនេះសង្ឃឹមថា កម្មវិធីនេះនឹងជួយលើកកម្ពស់ការកែច្នៃផលិតផលជលផលក្រោយប្រមូលផលឱ្យកាន់តែមានស្តង់ដា និងគុណភាពខ្ពស់ តាមរយៈគម្រោងអភិវឌ្ឍន៍ជលផលក្រោយប្រមូលផល (CAPFISH-Capture) ព្រមទាំងផ្ដល់ផលចំណេញផ្នែកសេដ្ឋកិច្ចដល់ប្រជានេសាទ និងសហគ្រាសកែច្នៃផងដែរ»។ជាមួយគ្នានេះលោក ដឺជេនេ តេហ្សេរ៉ា នាយកផ្នែកអភិវឌ្ឍន៍ហេដ្ឋារចនាសម្ព័ន្ធ និងកសិ-ពាណិជ្ជកម្មរបស់អង្គការ UNIDO ជឿជាក់ថា កម្មវិធីហិរញ្ញវត្ថុគាំទ្រការវិនិយោគ (ISF) ពិតជាអាចរួមចំណែកបង្កើនគុណតម្លៃ និងបរិមាណនៃផលផលិតផលជលផល ដែលប្រកបដោយគុណភាព និងសុវត្ថិភាព ជួយឱ្យសហគ្រាសកែច្នៃផលផលិតផលជលផល ទទួលបានជោគជ័យនៅក្នុងទីផ្សារសកល។ ទន្ទឹមនេះ លោកជឿជាក់ថា គម្រោងនេះនឹងជួយធ្វើឱ្យវិស័យជលផលកម្ពុជាកាន់តែមានភាពលេចធ្លោរលើឆាកអន្តរជាតិ ផ្តល់នូវឧត្តមភាព ជំនឿទុកចិត្ត និងវិបុលភាពសម្រាប់សហគមន៍ និងប្រជាជនកម្ពុជា។

ជុំវិញកម្មវិធីហិរញ្ញវត្ថុគាំទ្រការវិនិយោគ (ISF) នេះ លោកស្រី ស៊ឹម សេរីរ័ត្ន ម្ចាស់សហគ្រាស Home Taste Food យល់ឃើញថា កម្មវិធីនេះវានឹងជួយផ្ដល់ឱកាសបន្ថែមទៀតដល់សហគ្រាសធន់តូច និងមធ្យម ដើម្បីមានហិរញ្ញប្បទានក្នុងការពង្រីកអាជីវកម្ម និងផ្ដោតលើសុវត្ថិភាពចំណីអាហារ ដើម្បីឈានដល់ការប្រគួតប្រជែងលើទីផ្សារកាន់តែទូលំទូលាយបន្ថែមទៀត។

សូមបញ្ជាក់ថា កម្មវិធីហិរញ្ញវត្ថុគាំទ្រការវិនិយោគ (ISF) មានទំហំវិនិយោគសរុបរហូតដល់៧លានដុល្លារ។ កម្មវិធីនេះត្រូវបានរំពឹងថា នឹងធ្វើឱ្យសហគ្រាសក្នុងខ្សែច្រវាក់ផលិតកម្មមានភាពប្រសើរឡើងនូវប្រតិបត្តិការអាជីវកម្មមានស្តង់ដា សុវត្ថិភាព ផលិតភាព និងការគ្រប់គ្រងបរិស្ថាន ព្រមទាំងការធ្វើទំនើបកម្មសម្ភារ បរិក្ខារ បច្ចេកវិទ្យាកែច្នៃ និងការកែលម្អហេដ្ឋារចនាសម្ព័ន្ធជាដើម។ ក្រៅពីនេះ កម្មវិធីនេះនឹងជួយដល់ផ្នែកសេដ្ឋកិច្ច តាមរយៈការបង្កើនការងារ និងបង្កើនការវិនិយោគ ភាពប្រគួតប្រជែង ព្រមទាំងការអភិវឌ្ឍវិស័យជលផលក្រោយប្រមូលផលជាដើម៕