អាជ្ញាធររឹបអូសសាច់បង្កកខុសច្បាប់ និងខូចគុណភាពបានជាង២០០តោន នៅឆមាសទី១ឆ្នាំនេះ

ឯកឧត្តម ផាន អូន ប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ បានគូសបញ្ជាក់ថា នៅឆមាសទី១ឆ្នាំនេះ មន្ត្រីជំនាញនៃអគ្គនាយកដ្ឋាន ក.ប.ប បង្ក្រាប និងរឹបអូសសាច់បង្កកខូចគុណភាពបានចំនួន២៣៩តោន ថយចុះ៤៣តោន បើធៀបនឹងរយៈពេលដូចគ្នាកាលពីឆ្នាំមុន។ ឯកឧត្តមសង្កេតឃើញថា ទោះបីអាជ្ញាធរ​បានបង្ក្រាបករណីលួចនាំចូលសាច់បង្កកខុសច្បាប់ជាបន្តបន្ទាប់ក៏ដោយ តែសាច់ប្រភេទនេះនៅតែមានចរាចរ​ដាក់លក់នៅលើទីផ្សារ។

ថ្នាក់ដឹកនាំរូបនេះ បានវាយតម្លៃថា ការបន្តហូរចូលសាច់បង្កកពីផ្សារខាងក្រៅមកកាន់ទីផ្សារកម្ពុជា អាចត្រូវបានធ្វើឡើងក្រោមរូបភាពតូចៗតាមច្រករបៀងនៃព្រំដែន ហើយប្រមូលផ្តុំដាក់បង្កប់ក្នុងមធ្យោបាយដឹកជញ្ជូនទំនិញ ឬរថយន្តដឹកអ្នកដំណើរគេចវេសពីការត្រួតពិនិត្យរបស់សមត្ថកិច្ច ហើយនាំមកចែកចាយនៅលើទីផ្សារតាមបណ្តាខេត្តនានា។ ឯកឧត្តម បានសង្កត់ធ្ងន់ថា សម្ថកិច្ចកាន់តែបង្កើនការត្រួតពិនិត្យ តែជនខិលខូចកាន់តែរកគ្រប់មធ្យោបាយ ដើម្បីគេចវេសពីសមត្ថកិច្ចត្រួតពិនិត្យ ពិសេសការដឹកជញ្ជូនក្រោមរូបភាពតូចៗនិងភាគច្រើននៅពេលយប់ ជាហេតុធ្វើឱ្យមន្រ្តីជំនាញពិបាកក្នុងការទប់ស្កាត់​។

ទន្ទឹមនេះ ថ្នាក់ដឹកនាំនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ បានបង្ហាញពីការព្រួយបារម្ភចំពោះការនាំចូលផលិតផលសាច់បង្កក ពិសេសបំណែកនៃសាច់ ដែលជាសំណល់នៃផលិតកម្មសាច់នាំចេញរបស់បណ្តាប្រទេសអាចផ្តល់នូវផលប៉ះពាល់ដល់អាជីវកម្មចិញ្ចឹមសត្វ​នៅកម្ពុជា និងធ្វើឱ្យប៉ះពាល់ដល់សុខភាពអ្នកប្រើប្រាស់ ព្រោះផលិតផលសាច់ ពិសេសបំណែកនៃសាច់ដែលនាំចូលដោយពុំមានការអនុញ្ញាត្ត ពុំមានការត្រួតពិនិត្យឱ្យបានត្រឹមត្រូវ ការវេចខ្ចប់គ្មានស្តង់ដា ដឹកជញ្ជូនពុំត្រឹមត្រូវតាមបញ្ញត្តិបច្ចេកទេស នឹងប្រឈមនឹងការចម្លងចូលនូវមេរោគ ឬកត្តាចង្រៃផ្សេងៗ ហើយមានគ្រោះថ្នាក់ធ្ងន់ធ្ងរដល់សុខភាព។

ដូច្នេះតាមរយៈលទ្ធផលនៃការបង្ក្រាបខាងលើបានបង្ហាញឱ្យឃើញថា អគ្គនាយកដ្ឋាន ក.ប.ប. បានរួមចំណែកយ៉ាងសកម្មក្នុងការចូលរួមការពារផលប្រយោជន៍អ្នកប្រើប្រាស់ ក្នុងការលើកកម្ពស់សុខភាព កាត់បន្ថយភាពក្រីក្ររបស់ប្រជាពលរដ្ឋ តាមរយៈការកាត់បន្ថយការចំណាយព្យាបាលសុខភាព ពីការបរិភោគអាហារគ្មានគុណភាព និងជំរុញឱ្យមុខរបរចិញ្ចឹកសត្វនៅកម្ពុជាកាន់តែមានភាពរីកចម្រើន។

សូមបញ្ជាក់ថា រាជរដ្ឋាភិបាលកម្ពុជា បានសម្រេចបិទការនាំចូលជាបណ្ដោះអាសន្ននូវប្រភេទគ្រឿងក្នុង និងបំណែកសាច់បង្កក រយៈពេល៦ខែ ពីថ្ងៃទី១២ ខែមីនា ដល់ថ្ងៃទី១២ ខែកញ្ញា ឆ្នាំ២០២៤។ វិធានការហាមឃាត់នេះ ដើម្បីលើកកម្ពស់វិស័យចិញ្ចឹមសត្វឡើងវិញ ក្រោយពេលទីផ្សារសាច់សត្វរស់របស់កសិករក្នុងស្រុកប្រឈមបញ្ហាតម្លៃធ្លាក់ចុះជាបន្តបន្ទាប់ ជាហេតុធ្វើឱ្យអ្នកចិញ្ចឹមសត្វមួយចំនួនបានបោះបង់ចោលការការចិញ្ចឹម៕

អត្ថបទ៖ បូ ដូឡា, ឯកសារ