![លោក ចូ បៃដិន](https://cdn.cambonomist.com/media/images/rlknkrbrchhngnngchrphpl22222.2e16d0ba.fill-960x540.jpg)
លោកប្រធានាធិបតី ចូ បៃដិន បានប្រកាសថា លោកមិនទៅណានោះឡើយ បើទោះបីមានការអំពាវនាវពីអ្នកប្រជាធិបតេយ្យជាច្រើនឱ្យបញ្ចប់បេក្ខភាពរបស់លោកសម្រាប់ដំណើរការបោះឆ្នោតអាណត្តិទី២ ដែលគ្រោងនឹងធ្វើឡើងនៅថ្ងៃទី៥ ខែវិច្ឆិកា ឆ្នាំ២០២៤ ខាងមុខក្តី។
ដើម្បីបង្ហាញពីភាពរឹងមាំរបស់ខ្លួនលោក បៃដិន ដែលមានអាយុ៨១ឆ្នាំ កាលពីថ្ងៃទី៤ ខែកក្កដា បានរៀបចំកម្មវិធីអាំងសាច់មួយជាមួយនឹងសមាជិកមេដឹកនាំយោធាសកម្មៗមួយចំនួននៅសេតវិមាន បន្ទាប់ពីកាយវិការ និងសកម្មភាពមួយចំនួនរបស់លោកត្រូវបានរិះគន់ដោយអ្នកគាំទ្រនៅអំឡុងពេលលោកជួបជាមួយនឹងដៃគូប្រជែង គឺលោក ដូណាល់ ត្រាំ កាលពីថ្មីៗ។
ក្រុមអ្នកគាំទ្របានសម្ដែងការព្រួយបារម្ភថា ជរាភាពរបស់លោក ចូ បៃដិន អាចនឹងប៉ះពាល់ដល់ល្បឿននៃការបំពេញកាតព្វកិច្ច និងការទទួលខុសត្រូវចំពោះការងាររបស់លោកសម្រាប់អាណត្តិថ្មី។
តែយ៉ាងណានៅពេលនេះ អ្នកប្រជាធិបតេយ្យកំពុងជជែកគ្នាអំពីបញ្ហានេះ ហើយប្រភពមួយបាននិយាយថា ប្រសិនបើលោក បៃដិន បោះបង់បេក្ខភាពនោះ លោកស្រីអនុប្រធានាធិបតី កាម៉ាឡា ហារីស គឺជាបេក្ខនារីដ៏ស័ក្តិសមបំផុតក្នុងការជំនួសលោក បៃដិន នៅក្នុងការបោះឆ្នោតនៅថ្ងៃទី៥ ខែវិច្ឆិកា ខាងមុខនេះ៕
ដោយៈ សរ សុជាតិ