លោកស្រី ជូលី ដែលស្ថិតនៅក្នុងរដ្ឋធានីប៊ូឆារ៉េស (Bucharest) នៅប្រទេសរ៉ូម៉ានី ដើម្បីចូលរួមកិច្ចប្រជុំកំពូលរដ្ឋមន្ត្រីការបរទេសណាតូបាននិយាយតាមទូរស័ព្ទថា ប្រទេសកាណាដាប្តេជ្ញាដើរតួនាទីរបស់ខ្លួននៅក្នុងតំបន់ឥណ្ឌូប៉ាស៊ីហ្វិក។
ដោយខិតខំងាកចេញឆ្ងាយពីប្រទេសចិននោះ ប្រទេសកាណាដាកំពុងផ្តោតលើការពង្រឹងសន្តិសុខ និងការបង្កើនពាណិជ្ជកម្មនៅក្នុងតំបន់ជិតខាងរបស់ប្រទេសចិន ក្រោមយុទ្ធសាស្ត្រឥណ្ឌូប៉ាស៊ីហ្វិកដែលបានប្រកាសកាលពីខែមុន។
រដ្ឋាភិបាលក្រុងអូតាវ៉ា (Ottawa) ប្រទេសកាណាដាបានសន្យាថា នឹងវិនិយោគប្រហែលជាង ១ពាន់៧រយលានដុល្លារអាមេរិកក្នុងរយៈពេល ៥ ឆ្នាំដំបូង ដើម្បីកែលម្អហេដ្ឋារចនាសម្ព័ន្ធ និងដោះស្រាយបញ្ហាបម្រែបម្រួលអាកាសធាតុនៅឥណ្ឌូប៉ាស៊ីហ្វិក ក៏ដូចជាលើកកម្ពស់ធនធានធម្មជាតិរបស់ប្រទេសកាណាដាផងដែរ។ ប្រទេសកាណាដាចង់ទាញយកកំណើនខ្ពស់ពីក្នុងតំបន់អាស៊ី ដើម្បីជួយសេដ្ឋកិច្ចរបស់ខ្លួនឱ្យរីកចម្រើន ខណៈដែលកំពុងពង្រឹងទំនាក់ទំនងកាន់តែស៊ីជម្រៅជាមួយបណ្តាប្រទេសអាស៊ី ដើម្បីប្រកួតប្រជែងជាមួយទីក្រុងប៉េកាំង។
យុទ្ធសាស្ត្រថ្មីនេះបានហៅប្រទេសចិនថាជា«មហាអំណាចដែលរំខានដល់ពិភពលោកកាន់តែខ្លាំង» ហើយលោកស្រី ជូលី រដ្ឋមន្ត្រីការបរទេសកាណាដាបានគាំទ្រការពិពណ៌នានេះ ដោយនិយាយថា កាណាដាមើលឃើញឧទាហរណ៍នៃរឿងនោះស្រាប់ ជាពិសេសនៅសមុទ្រចិនខាងកើត និងខាងត្បូងក៏ដូចជាច្រកសមុទ្រតៃវ៉ាន់ផងដែរ ហើយកាណាដានឹងប្រកួតប្រជែងជាមួយប្រទេសចិននៅពេលណាគេនិយាយអំពីការគោរពសណ្តាប់ធ្នាប់អន្តរជាតិ។
រដ្ឋាភិបាលក្រុងប៉េកាំងបានទាមទារអធិបតេយ្យភាពនៅច្រកសមុទ្រតៃវ៉ាន់ និងអះអាងថា សេរីភាពនៃសមុទ្រទឹកជ្រៅមិនអនុវត្តចំពោះផ្លូវទឹករវាងចិនដីគោក និងតៃវ៉ាន់នោះទេ។ ដូច្នេះហើយ ដើម្បីប្រឆាំងនឹងការអះអាងរបស់ចិននេះ ប្រទេសកាណាដាបានបើកនាវាចម្បាំងឆ្លងកាត់ច្រកសមុទ្រតៃវ៉ាន់នេះជាមួយនាវាចម្បាំងអាមេរិកជាច្រើនលើកច្រើនសារផងដែរ។
ទាក់ទងនឹងកងកម្លាំងប្រដាប់អាវុធកាណាដាវិញលោកស្រី ជូលី បាននិយាយថា ការងារដែលកាណាដាកំពុងធ្វើនេះមិនត្រឹមតែមានសារៈសំខាន់ប៉ុណ្ណោះទេ ប៉ុន្តែវាថែមទាំងត្រូវបានផ្តល់តម្លៃដោយដៃគូ និងសម្ព័ន្ធមិត្តរបស់ខ្លួនផងដែរ។
លោកស្រី ជូលី បាននិយាយថា កាណាដានឹងប្រកួតប្រជែងជាមួយប្រទេសចិនតាមពេលវេលាសមគួរ ហើយទីក្រុងអូតាវ៉ា ក៏នឹងសហការជាមួយប្រទេសចិនផងដែរនៅពេលណាចាំបាច់ ដូចជា កិច្ចសហប្រតិបត្តិការលើការប្រែប្រួលអាកាសធាតុ ការមិនរីកសាយភាយនុយក្លេអ៊ែរ និងការទប់ស្កាត់ជំងឺរាតត្បាតជាដើម៕
អត្ថបទ៖ សុខ ជា
