ការិយាល័យស្ថិតិជាតិរបស់ចិន (NBS) បានបង្ហាញថា ការវិនិយោគក្នុងវិស័យអចលនទ្រព្យដែលជាវិស័យជន្ទល់សេដ្ឋកិច្ច និងជាវិស័យមួយ ដែលរងគ្រោះខ្លាំងនៅក្នុងអំឡុងវិបត្តិកូវីដ-១៩ បានបន្តធ្លាក់ចុះជាង៩% នៅ១១ខែដំបូងឆ្នាំ២០២៣ បើធៀបនឹងរយៈពេលដូចគ្នាកាលពីឆ្នាំមុន។
ទិន្នន័យនេះបានធ្លាក់ចុះបន្ថែមទៀតពីការធ្លាក់ចុះ៩.៣%កាលពីខែមុន ខណៈដែលវាត្រូវគ្នានឹងការព្យាកររបស់ក្រុមហ៊ុន Wind ដែលផ្តល់ទិន្នន័យហិរញ្ញវត្ថុរបស់ចិន។ ចំណែកការវិនិយោគលើទ្រព្យសកម្មថេរបានកើនឡើងជិត៣% ក្នុងរយៈពេល១១ខែឆ្នាំនេះ បើធៀបនឹងពេលដូចគ្នាកាលពីឆ្នាំមុន ដោយគ្មានការប្រែប្រួលច្រើនពីកំណើនដែលគេបានឃើញនៅក្នុងពេលពីខែមករា ដល់ខែតុលា នោះឡើយ។
កំណើននេះមួយផ្នែកបានមកដោយសារការសម្រេចចិត្តរបស់ទីក្រុងប៉េកាំង ក្នុងការលក់មូលបត្របំណុលអធិបតេយ្យរបស់ខ្លួនចំនួន១ទ្រីលានយន់ ប្រហែល១៣៩ពាន់លានដុល្លារកាលពីខែតុលា គួបផ្សំនឹងការលៃទុកដោយឡែកនូវចំនួនកូតាមូលបត្របំណុលរដ្ឋាភិបាលក្នុងស្រុក ដើម្បីធ្វើឲ្យសន្ទុះសេដ្ឋកិច្ចមានស្ថិរភាព។ ទន្ទឹមនឹងនេះ ការវិនិយោគឯកជនបានធ្លាក់ចុះ០.៥%នៅក្នុងរយៈពេល១១ខែដំបូងនៃឆ្នាំនេះបើធៀបនឹងឆ្នាំមុន។
លោក ឡារី ហ៊ូ (Larry Hu) ប្រធានសេដ្ឋវិទូនៅក្រុមហ៊ុន ម៉ែកក្វារី កាពីតុល (Macquarie Capital) បាននិយាយថា ទិន្នន័យនេះបានបង្ហាញថា សេដ្ឋកិច្ចរបស់ប្រទេសចិន បានធ្លាក់ចុះយ៉ាងច្បាស់នៅក្នុងត្រីមាសទី៤ ឆ្នាំនេះ ហើយថា ការធ្លាក់ចុះអចលនទ្រព្យ និងការវិនិយោគឯកជននេះមិនបានធ្វើឱ្យទីផ្សារមានការភ្ញាក់ផ្អើលនោះទេដូច្នេះហើយនេះគឺជាចំណុចឧបសគ្គដែលទីក្រុងប៉េកាំងកំពុងតែប្រឈម។
លោក ហ៊ូ បានបន្ថែមថា ទំនោរនៃការធ្លាក់ចុះការវិនិយោគឯកជន និងអចលនទ្រព្យដែលអាចនឹងបន្តចូលទៅដល់ឆ្នាំក្រោយនោះ ភាគច្រើនពឹងទៅលើសមត្ថភាពរបស់ប្រទេសចិនក្នុងការបង្កើតគោលនយោបាយ ដែលមានប្រសិទ្ធភាពដើម្បីដោះស្រាយបញ្ហានេះទាន់ពេលវេលា។ ទីក្រុងប៉េកាំងបានបង្ហាញពីវិធានការគាំទ្រកំណើនបន្ថែមទៀតនៅឆ្នាំក្រោយនៅក្នុងសន្និសីទស្ដីពីការងារសេដ្ឋកិច្ចមជ្ឈិមកាលពីដើមសប្តាហ៍នេះ ខណៈដែលចិនត្រូវបានគេរំពឹងយ៉ាងទូលំទូលាយថា នឹងកំណត់ទិសដៅកំណើនផលិតផលក្នុងស្រុកសរុបប្រហែល៥%នៅឆ្នាំ២០២៤៕
អត្ថបទ៖ សុខ ជា
