ទីផ្សារការងារនៅប្រទេសចិន កាន់តែចង្អៀតទៅៗ ខណៈដែលនិស្សិតទើបបញ្ចប់ការសិក្សាត្រឹមតែជាង៤០% ទទួលបានឱកាសការងារ

យោងតាមក្រុមហ៊ុនធនធានមនុស្សចិន ដែលមានឈ្មោះថា ចាវភីន (Zhaopin) បង្ហាញថា ក្នុងចំណោមនិស្សិតទើបបញ្ចប់ការសិក្សាមានតែ៤៨%ប៉ុណ្ណោះ ដែលទទួលការផ្តល់ឱកាសការងារ ដោយធ្លាក់ចុះ២,៤% បើធៀបនឹងឆ្នាំមុន។

សូមបញ្ជាក់ថា និស្សិតទើបបញ្ចប់ការសិក្សាដែលទទួលបានឱកាសការងារក្រៅផ្លូវការនៅក្នុងប្រទេសចិន មានរហូតដល់ទៅប្រមាណ៧៥% គិតត្រឹមឆ្នាំ២០១៩ មុនពេលផ្ទុះវិបត្តិកូវីដ-១៩។ ប៉ុន្តែតួលេខនេះបានធ្លាក់ចុះខ្លាំងមកនៅក្រោម៥០% នៅក្នុងឆ្នាំ២០២២ នៅពេលរដ្ឋាភិបាលចិន បានបិទខ្ទប់ក្រុងសៀងហៃ ដើម្បីបញ្ឈប់ការរីករាលដាលនៃវីរុសកូវីដ-១៩។

បច្ចុប្បន្ន ក្រុមហ៊ុននានានៅក្នុងវិស័យឯកជនដូចជាក្រុមហ៊ុនក្នុងវិស័យបច្ចេកវិទ្យា និងវិស័យអចលនទ្រព្យជាដើមកំពុងកាត់បន្ថយបុគ្គលិកយ៉ាងច្រើន។ សម្រាប់និស្សិតទើបបញ្ចប់ការសិក្សាទាំងនេះ ឧស្សាហកម្មដូចបានរៀបរាប់ខាងលើគឺជាប្រភពការងារដ៏សំខាន់។

ប៉ុន្តែរដ្ឋាភិបាលបានបង្ក្រាប ឬរឹតបន្តឹងលើឧស្សាហកម្មទាំងនេះ ហើយជាលទ្ធផលឧស្សាហកម្មទាំងនេះ ក៏បានកាត់បន្ថយបុគ្គលិក ខណៈដែលប្រាក់ចំណូលបានធ្លាក់ចុះ។ ទន្ទឹមនេះ និស្សិតកាន់តែច្រើនឡើង​ៗកំពុងគេចពីអាជីពការងារក្នុងវិស័យឯកជនដោយសារពួកគេយល់ថា ការងារគ្មានស្ថិរភាព។ យោងតាមក្រុមហ៊ុនធនធានមនុស្សចិន ដែលមានឈ្មោះថា ចាវភីន (Zhaopin) ឱ្យដឹងថា មានតែ១៣%ប៉ុណ្ណោះនៃនិស្សិតដែលកំពុងស្វែងរកការងារចង់ធ្វើការឱ្យក្រុមហ៊ុនឯកជន បើធៀបនឹង២៥%នៅក្នុងឆ្នាំ២០២០៕

ដោយ: តែម សុខុម