ក្រុមអ្នកវិភាគសេដ្ឋកិច្ចថា កញ្ចប់វិធានការសង្គ្រោះរបស់ចិន មិនគ្រប់គ្រាន់ក្នុងការបញ្ចប់វិបត្តិលំនៅឋានបានឡើយ

ទោះជាយ៉ាងណា ក្រុមអ្នកវិភាគសេដ្ឋកិច្ចបានលើកឡើងថា កញ្ចប់វិធានការដែលរដ្ឋាភិបាលចិន បានដាក់ចេញជាបន្តបន្ទាប់នេះ នៅមិនទាន់គ្រប់គ្រាន់ដែលអាចបញ្ចប់វិបត្តិក្នុងវិស័យអចលនទ្រព្យនៅចិន បាននៅឡើយទេ។ នេះបើយោងតាមការចុះផ្សាយរបស់សារព័ត៌មានអន្តរជាតិដ៏ល្បីល្បាញ Bloomberg។

នៅក្នុងចំណាត់ការចុងក្រោយដែលបានដាក់ចេញកាលពីពេលថ្មីៗ ធនាគារកណ្តាលចិន បានប្រកាសថា ខ្លួននឹងបង្កើតកម្មវិធីផ្តល់ប្រាក់កម្ចីថ្មីមួយក្នុងទំហំទឹកប្រាក់ប្រមាណ៤២ពាន់លានដុល្លារអាម៉េរិក ដើម្បីជំរុញឱ្យបណ្ដារដ្ឋបាលមូលដ្ឋានជួយប្រមូលទិញលំនៅឋាន ដែលកំពុងជួបបញ្ហាការផ្គត់ផ្គង់លើសតម្រូវការ ស្របពេលដែលប្រទេសនេះកំពុងប្រឹងប្រែងដោះស្រាយវិបត្តិលំនៅឋានធ្លាក់ថ្លៃខ្លាំង។

ទោះជាយ៉ាងនេះក្ដី ក៏ក្រុមអ្នកវិភាគសេដ្ឋកិច្ចបានលើកឡើងថា កញ្ចប់វិធានការដែលរដ្ឋាភិបាលចិន បានដាក់ចេញជាបន្តបន្ទាប់មកទល់នឹងពេលនេះ គឺមិនទាន់គ្រប់គ្រាន់ ដែលអាចបញ្ចប់វិបត្តិក្នុងវិស័យអចលនទ្រព្យនៅក្នុងប្រទេសចិន បាននៅឡើយទេ។ ការលក់លំនៅឋានថ្មីៗក្នុងប្រទេសចិន បានធ្លាក់ចុះកាន់តែខ្លាំងឡើងក្នុងរយៈពេលប៉ុន្មានខែចុងក្រោយនេះ។ កត្តានេះបានជំរុញឱ្យស្តុកលំនៅឋាន ដែលមិនទាន់លក់ និងដីទំនេរទុកចោលកើនឡើងដល់កម្រិតខ្ពស់បំផុតមិនធ្លាប់មានក្នុងរយៈពេលប៉ុន្មានឆ្នាំមកនេះ ដោយធ្វើឱ្យគម្រោងសាងសង់ថ្មីៗជាប់គាំង និងកំពុងគំរាមកំហែងធ្វើឱ្យបណ្ដាក្រុមហ៊ុនអភិវឌ្ឍន៍រួមទាំងក្រុមហ៊ុនរដ្ឋធំៗផងដែរខកខានទូទាត់បំណុលជាបន្តបន្ទាប់។

ក្រុមអ្នកជំនាញសេដ្ឋកិច្ចបានគូសបញ្ជាក់ថា កញ្ចប់ជំនួយហិរញ្ញប្បទានប្រមាណជិត៤២ពាន់លានដុល្លារអាម៉េរិក ដែលធនាគារកណ្តាលចិន បានប្រកាសកាលពីថ្ងៃសុក្រ សប្ដាហ៍មុន គឺអាចដោះស្រាយបានតែមួយចំណែកប៉ុណ្ណោះនៃលំនៅដែលនៅសល់ច្រើនលើសលប់ពាសពេញផ្ទៃប្រទេសចិន ដែលពួកគេបានប៉ាន់ប្រមាណថា មានទំហំសរុបច្រើនរយពាន់លានដុល្លារអាម៉េរិកឯណោះ៕

ដោយ: តែម សុខុម