តើវិបត្តិទីផ្សារលំនៅឋាននៅមហាយក្សចិន លែងជាប់គាំងហើយ ឫនៅ?

លោក ហៃប៊ិន ហ្សូ (Haibin Zhu) ប្រធានក្រុមសេដ្ឋវិទូរបស់ក្រុមហ៊ុន JPMorgan ប្រចាំនៅប្រទេសចិន បានប្រាប់ទូរទស្សន៍ CNBC ថា ស្ថានភាពទីផ្សារលំនៅឋានរបស់មហាយក្សចិន នៅមិនទាន់មានស្ថិរភាពនៅឡើយទេ ពោលគឺនៅតែបន្តស្ថិតក្នុងភាពទន់ខ្សោយ តែយ៉ាងណាលោករំពឹងថា វិស័យនេះអាចនឹងមានភាពល្អប្រសើរឡើងវិញបន្តិចនៅឆ្នាំ២០២៥។

កាលពីខែមិថុនា កន្លងទៅតម្លៃលំនៅឋាននៅតាមទីក្រុងចំនួន១០០ នៅទូទាំងប្រទេសចិន បានកើនឡើង តែ០,១៣% ប៉ុណ្ណោះ ហើយនៅខែកក្កដា បានបន្តកើនឡើងបន្តិចទៀត គឺ០,១១% ប៉ុន្តែបើនិយាយពេញមួយឆ្នាំ២០២៤ ត្រូវបានគេព្យាករថា អាចនឹងធ្លាក់ចុះពី១,៧៦%ទៅ៦,៨៩%។

បើតាមការចុះផ្សាយរបស់សារព័ត៌មានដ៏ល្បីល្បាញ Bloomberg នៅក្នុងស្ថានភាពបែបនេះ ចិនកំពុងថ្លឹងថ្លែងលើផែនការកាត់បន្ថយការចំណាយលើការខ្ចីប្រាក់របស់ម្ចាស់ផ្ទះ ដោយអនុញ្ញាតឱ្យស្ថាប័នធនាគារនានាអាចរៀបចំធ្វើបច្ចុប្បន្នភាពនៃហិរញ្ញប្បទានរបស់ពួកគេឡើងវិញ នៅក្នុងកញ្ចប់មូលនិធិឥណទានសរុបមានតម្លៃរហូតដល់ទៅ៥,៤ទ្រីលានដុល្លារ។

ជុំវិញវិធានការនេះ លោកស្រី វិនី វូ (Winnie Wu) អ្នកយុទ្ធសាស្រ្តភាគហ៊ុនចិន នៅក្រុមហ៊ុន BofA Securities បាននិយាយថា អត្រាការប្រាក់កម្ចីទិញផ្ទះទាប នឹងធ្វើឱ្យធនាគារកាត់បន្ថយអត្រាការប្រាក់បញ្ញើ ដើម្បីការពារហានិភ័យឥណទាន និងធានាស្ថិរភាពនៅក្នុងប្រព័ន្ធហិរញ្ញវត្ថុ ដូច្នេះវាក៏អាចជះឥទ្ធិពលដល់ចំណូលសន្សំរបស់ពលរដ្ឋចិន មួយចំនួនធំដែរ។

លោកស្រីបានឲ្យដឹងថា ទោះបីជាគោលនយោបាយផ្តល់ប្រាក់កម្ចីទិញផ្ទះបើកចំហរទូលំទូលាយឡើងវិញក៏ដោយ ក៏វាមិនមែនជាគោលនយោបាយធ្វើឱ្យទីផ្សារលំនៅឋានរស់ឡើងវិញនោះដែរ សំខាន់ត្រូវជួយរកឲ្យឃើញនូវគុណតម្លៃ និងអត្ថប្រយោជន៍សម្រាប់ម្ចាស់ផ្ទះដែលមានស្រាប់៕

ដោយៈ សរ សុជាតិ