![មហាសេដ្ឋីចិន](https://cdn.cambonomist.com/media/images/mhsdthmnbphtrbschnhajjasda.2e16d0b.2e16d0ba.fill-960x540.jpg)
លោក ហ្សុង ដែលជាប្រធានក្រុមហ៊ុនផលិតភេសជ្ជៈដ៏ធំបំផុតមួយនៅប្រទេសចិន បានធ្លាក់ចុះទ្រព្យសម្បត្តិជាង១៥ពាន់លានដុល្លារ នៅក្នុងចំណោមមហាសេដ្ឋីចំនួន៥០០ទៀត តាំងពីដើមឆ្នាំនេះ ប៉ុន្តែលោកនៅតែជាមហាសេដ្ឋីមានបំផុតរបស់ចិនជាមួយនឹងទ្រព្យសម្បត្តិសុទ្ធចំនួនជាង៥២ពាន់លានដុល្លារ។
ការធ្លាក់ចុះទ្រព្យសម្បត្តិនេះ បានធ្វើឱ្យគម្លាតទ្រព្យសម្បតិ្តកាន់តែរួមតូចរវាងលោក ហ្សុង និងមហាសេដ្ឋីបច្ចេកវិទ្យាលំដាប់ទីពីររបស់ចិន គឺលោក ខូលីន ហ័ង (Colin Huang) ជាស្ថាបនិកក្រុមហ៊ុនលក់ទំនិញអនឡាញ PDD Holdings ដែលមានទ្រព្យសម្បត្តិសរុបជាង៤៧ពាន់លានដុល្លារ។
ទីភ្នាក់ងារព័ត៌មាន Bloomberg បានរាយការណ៍ថា ក្រុមហ៊ុន Nongfu របស់លោក ហ្សុង ដែលបានចុះបញ្ជីនៅទីក្រុងហុងកុង បានធ្លាក់ចុះភាគហ៊ុន២០% ចាប់តាំងពីថ្ងៃទី១ ខែកុម្ភៈដោយសារតែសង្រ្គាមតម្លៃបានធ្វើឱ្យប៉ះពាល់ដល់ផលិតកម្មភេសជ្ជៈរបស់ខ្លួន។
អ្នកវិភាគម្នាក់ឈ្មោះ អាដា លី (Ada Li) បានប្រាប់ប៊្លូមប៊ឺកថា បញ្ហាថ្មីៗមួយចំនួនដូចជាអ្នកប្រើប្រាស់តាមឃ្លាំមើលគុណភាពផលិតផល ការប្រកួតប្រជែងកើនឡើងក្នុងវិស័យនេះ ការថយចុះនូវការចំណាយរបស់អ្នកប្រើប្រាស់ និងការធ្វើពហិការកាលពីដើមឆ្នាំនេះ ទំនងជាការរួមចំណែកដល់ការធ្លាក់ចុះនូវភាគហ៊ុន និងការខាតបង់ទ្រព្យសម្បត្តិរបស់មហាសេដ្ឋីរូបនេះ។
អ្នកប្រើប្រាស់អ៊ីនធឺណិតជាច្រើននៅដើមឆ្នាំនេះ បានអំពាវនាវឱ្យធ្វើពហិការផលិតផលរបស់ក្រុមហ៊ុន Nongfu ដោយពួកគេនិយាយថា កូនប្រុសរបស់លោក ហ្សុង ដែលរំពឹងថានឹងទទួលមរតកពីលោក ហ្សុង នោះមានលិខិតឆ្លងដែនអាម៉េរិក ដែលពួកគេមានការសង្ស័យពីភាពមិនស្មោះត្រង់របស់គ្រួសារនេះចំពោះប្រទេសចិន៕
អត្ថបទ៖ សុខ មង្គល