អ្នកដាំ និងលក់ទុរេនជឿជាក់ថា កម្ពុជានឹងចំណេញរាប់រយលានដុល្លារ ប្រសិនបើអាចនាំចេញទុរេនទៅចិនដោយផ្ទាល់

លោក ឃឹម ប៊ុនឡែន កសិករដាំទុរេននៅខេត្តកំពត និងជាប្រធានក្រុមហ៊ុន Farmer Forward Cambodia ដែលជាក្រុមហ៊ុននាំចេញទុរេនទៅកាន់ទីផ្សារថៃ បានអះអាងដោយជំនឿចិត្តថា ប្រសិនបើទុរេនកម្ពុជា អាចនាំចេញទៅកាន់ទីផ្សារប្រទេសចិន ដោយផ្ទាល់បាននោះ លោកជឿជាក់ថា កម្ពុជានឹងអាចចំណេញលុយបានរាប់រយលានដុល្លារចូលក្នុងសេដ្ឋកិច្ចជាតិ ពីទីផ្សារដ៍ធំមួយនេះ។ លោកអះអាងថា ការបើកទីផ្សារនាំចេញទុរេនកម្ពុជា ទៅចិននេះ គឺជាអ្វីដែលប្រជាកសិករដាំទុរេនគ្រប់រូបកំពុងទន្ទឹមរង់ចាំចង់បាន។ យ៉ាងណាក៏ដោយ អ្នកដាំទុរេនរូបនេះ កត់សម្គាល់ឃើញថា លំហូរចូលទុរេនពីប្រទេសជិតខាងច្រើនលើសលប់នាពេលបច្ចុប្បន្នកំពុងគំរាមកំហែងដល់ទីផ្សារទុរេនក្នុងស្រុក។

​ជុំវិញផែនការនាំចេញទុរេនទៅចិន ដោយផ្ទាល់នេះ ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានគូសបញ្ជាក់ថា ចិនគឺជាទីផ្សារធំមួយនៅលើពិភពលោក ហើយប្រសិនបើទុរេនកម្ពុជា អាចនាំចេញទៅកាន់ទីផ្សារចិន ដោយផ្ទាល់បាននោះ ប្រាកដណាស់វានឹងផ្តល់ផលប្រយោជន៍ជាច្រើនសម្រាប់ប្រជាកសិករកម្ពុជា ដ្បិតថា ដំណាំទុរេនត្រូវបានចាត់ទុកជាប្រភេទដំណាំដែលផ្តល់ប្រាក់ចំណេញខ្ពស់។ តែយ៉ាងណា អ្នកនាំពាក្យរូបនេះអះអាងថា មកទល់ពេលនេះទីផ្សារនាំចេញទុរេនកម្ពុជា គឺមានតែទៅប្រទេសវៀតណាម និងថៃប៉ុណ្ណោះ ហើយសម្រាប់លទ្ធភាពនាំចេញទុរេនរបស់កម្ពុជា ទៅទីផ្សារចិនវិញ ឯកឧត្តម ឃឹម ហ្វីណង់ អះអាងថា បច្ចុប្បន្នក្រសួងកំពុងជំរុញលើកិច្ចការងារនេះ និងកំពុងរង់ចាំការចរចារចុះអនុសារណៈយោគយល់គ្នា ស្តីអំពីលក្ខខណ្ឌអនាម័យ និងភូតគាមអនាម័យពីភាគីចិន និងរំពឹងថា ការងារនេះនឹងអាចសម្រេចបានក្នុងពេលឆាប់ៗខាងមុខនេះ។

​សូមជម្រាបថា ដំណាំទុរេនកំពតនៅឆ្នាំនេះបាននិងកំពុងរងការគំរាមកំហែងពីបាតុភូតអែលនីណូ ដែលបានបង្កឱ្យមានការខូចខាតដល់ការដាំដុះរបស់ប្រជាពលរដ្ឋជាច្រើន ពោលគឺមានផ្លែទុរេនជាច្រើនបានប្រេះ និងជ្រុះមុនពេលប្រមូលផល និងមិនសូវអាចធំធាត់ល្អ ដោយសារអាកាសធាតុក្តៅ និងកង្វះខាតទឹកស្រោចស្រប់ ដែលវានឹងធ្វើឱ្យទិន្នផលទុរេនកំពតនៅឆ្នាំនេះមានការធ្លាក់ចុះផងដែរ៕