ក្នុងជំនួបរវាងមេដឹកនាំធុរកិច្ចប្រទេសទួរគី និងមេដឹកនាំធុរកិច្ចវេណេស៊ុយអេឡា លោក Delcy Rodriguez អនុប្រធានាធិបតីវេណេស៊ុយអេឡា បានប្រកាសពីអត្រាអតិផរណាចំនួនបីខ្ទង់ ពោលគឺមាន ២៣៤%កាលពីឆ្នាំ២០២២។ ទោះយ៉ាងណា នេះជាការអះអាងរបស់មេដឹកនាំប្រទេសមួយនេះប៉ុណ្ណោះ ខណៈដែលរបាយការណ៍ផ្លូវការមិនត្រូវបានធនាគារកណ្តាលរបស់វេណេស៊ុយអេឡា បញ្ចេញឱ្យដឹងនោះទេចាប់តាំងពីខែតុលាឆ្នាំមុនមក ពោលគឺមានតែរបាយការណ៍សេដ្ឋកិច្ចប៉ុណ្ណោះ។
ដើម្បីបន្ថយល្បឿនអតិផរណា ប្រធានាធិបតីរបស់វេណេស៊ុយអេឡា លោក នីកូឡាស ម៉ាឌូរ៉ូ(Nicolas Maduro) បានអនុវត្តគោលនយោបាយសេដ្ឋកិច្ចដ៏តឹងរ៉ឹង រួមមានការកំណត់អត្រាប្តូរប្រាក់ឲ្យនៅថេរ កំណត់ការចំណាយសាធារណៈ និងការបង្កើនពន្ធផងដែរ។ ជាលទ្ធផល អតិផរណា តម្លៃទំនិញប្រើប្រាស់ ស្ថិតនៅក្នុងតួលេខមិនឡើង ហើយក៏មិនចុះដែរក្នុងរយៈពេលប្រាំបួនខែជាប់ៗគ្នា។
ប៉ុន្តែយុទ្ធសាស្ត្រនេះ មានប្រសិទ្ធភាពបានត្រឹមខែវិច្ឆិកាឆ្នាំ២០២២ប៉ុណ្ណោះ ដោយសារតែតម្លៃទំនិញបានស្ទុះឡើងខ្លាំង ស្របពេលដែលរដ្ឋាភិបាលចាប់ផ្តើមបង្កើនការចំណាយឡើងវិញ ហើយតម្រូវការប្រាក់ដុល្លារកើនហួសពីទុនបម្រុងរូបិយបណ្ណបរទេស ដែលធ្វើឲ្យរូបិយបណ្ណក្នុងស្រុក គឺប្រាក់បូលីវ៉ា ធ្លាក់ថ្លៃខ្លាំងបំផុតធៀបនឹងប្រាក់ដុល្លារអាមេរិក។
អត្ថបទគួរអាន
គួររំឭកផងដែរថា ក្នុងខែធ្នូឆ្នាំ២០២២ តម្លៃទំនិញប្រើប្រាស់របស់វេណេស៊ុយអេឡា បានកើនឡើងក្នុងរង្វង់ជាង ៣៧% ដែលក្នុងនោះ តម្លៃសម្លៀកបំពាក់ និងស្បែកជើងបានកើនឡើងជាង ៥៧% ខណៈដែលតម្លៃទំនិញប្រើប្រាស់ទូទៅនៅក្នុងផ្ទះបានកើនឡើងជិត ៥៦%។
សូជម្រាបថា បច្ចុប្បន្នអតិផរណាប្រទេសវ៉េណេស៊ុយអេឡា ស្ថិតនៅលំដាប់ខ្ពស់បំផុតទី៣នៅក្នុងពិភពលោកតាមពីក្រោយ ប្រទេសហ្ស៊ីមបាវ៉េស្ថិតនៅលំដាប់ទី១ និងលីបង់ស្ថិតនៅលំដាប់ទី២។
ទោះបីជា អតិផរណានៅប្រទេសវេណេស៊ុយអេឡា នៅមានក្នុងកម្រិតខ្ពស់ក្ដី ប៉ុន្ដែ លោកម៉ាដុយរ៉ូ ប្រធានាធិបតីប្រទេសនេះ បានអះអាងថា នៅឆ្នាំ២០២២ សេដ្ឋកិច្ចវេណេស៊ុយអេឡា គឺសម្រេចបានកំណើនដល់ទៅជាង ១៥%ឯណោះ ដោយសារមានការពង្រីការធ្វើពិធិកម្មនៃសេដ្ឋកិច្ច។
លោក ម៉ាដុយរ៉ូ ក៏នៅតែទទូចឲ្យសហរដ្ឋអាមេរិក ដកចេញនូវទណ្ឌកម្មដែលបានដាក់មកលើប្រទេសរបស់លោកផងដែរ ដោយលោកអះអាងថា ទណ្ឌកម្មទាំងនេះ បានធ្វើឲ្យសេដ្ឋកិច្ចវេណេស៊ុយអេឡាត្រូវរងការខាតបង់ប្រហែលជាង៤០០លានដុល្លារក្នុងមួយថ្ងៃ៕
អត្ថបទ ៖ សារៀម លក្ខិណា
