លោក ឌីលីប រ៉ាចាខារៀ (Dillip Rajakarier) នាយកប្រតិបត្តិសម្ព័ន្ធក្រុមហ៊ុនសណ្ឋាគារ មីន័រ (Minor) លំដាប់ពិភពលោកមួយ បានអះអាងថា ក្រុមហ៊ុនមានគោលបំណងបន្ថែមការវិនិយោគទៅលើវិស័យឧស្សាហកម្មសណ្ឋាគារឲ្យបាន ៦៥ សណ្ឋាគារ ជាមួយនឹងបន្ទប់សរុប ១ ម៉ឺន ៣ ពាន់បន្ទប់ ឲ្យបានមុនឆ្នាំ២០២៥ ដើម្បីរក្សាចំណាត់ថ្នាក់របស់ខ្លួនជាក្រុមហ៊ុនសណ្ឋាគារធំបំផុតនៅក្នុងឧស្សាហកម្មបដិសណ្ឋារកិច្ចនិងសណ្ឋាគារ។
លោក រ៉ាចាខារៀ បាននិយាយថា ការដាក់ចេញនូវផែនការនេះ គឺជាផ្នែកមួយនៃផែនការយុទ្ធសាស្រ្តរបស់ក្រុមហ៊ុនសម្រាប់ជំរុញកំណើនរយៈពេលវែង ស្របពេលដែលក្រុមហ៊ុនបានមើលឃើញនិន្នាការនៃការធ្វើដំណើរកំពុងមានកំណើនជាសកល ដូចនេះឧស្សាហកម្មសណ្ឋាគារក៏នឹងបន្តកើនឡើង បើទោះបីជាស្ថានភាពសេដ្ឋកិច្ចពិភពលោកមិនល្អក៏ដោយ។
អត្ថបទគួរអាន
តាមការព្យាកររបស់ក្រុមហ៊ុន ឧស្សាហកម្មសណ្ឋាគារនៅក្នុងឆ្នាំ២០២៣ នឹងមានកំណើន ដោយសារការកើនឡើងនៃសកម្មភាពធ្វើដំណើរនៅក្នុងពិភពលោក ដែលនាំឲ្យតម្រូវការសណ្ឋាគារ មិនត្រឹមតែផ្ដល់សេវាកម្មកន្លែងស្នាក់នៅបណ្តោះអាសន្នប៉ុណ្ណោះទេ ប៉ុន្តែក៏ជាកន្លែងសម្រាប់ដើរលេងកំសាន្ត ការរៀបចំពិធីមង្គលការ និងពិធីលៀងសាយភោជនថែមទៀត។
មកដល់ពេលនេះក្រុមហ៊ុនសណ្ឋាគារ មីន័រ កំពុងតែប្រតិបត្តិការអាជីវកម្មសណ្ឋាគារជាង ៥៣០កន្លែង ដោយមានបន្ទប់សរុប ៧ ម៉ឺន ៦ ពាន់បន្ទប់ នៅក្នុង ៥៦ ប្រទេស។
សម្រាប់តំបន់អាស៊ីអគ្នេយ៍ក្រុមហ៊ុននេះ គ្រោងនឹងបើកដំណើរការសណ្ឋាគារថ្មីចំនួនពីរស្ថិតក្រោមឈ្មោះ Anantara នៅភូកេត និង NH Collection នៅឈៀងម៉ៃ ប្រទេសថៃ។
លោក រ៉ាចាខារ័រ បានអះអាងថា ប្រទេសថៃនៅតែជាទីផ្សារដ៏សំខាន់សម្រាប់ក្រុមហ៊ុនសណ្ឋាគារមីន័រ ទោះបីជាភ្ញៀវទេសចរអឺរ៉ុបកំពុងធ្លាក់ចុះ ដោយសារតែការចំណាយខ្ពស់នៃការធ្វើដំណើរក្ដី ប៉ុន្ដែ ប្រទេសថៃអាចទាក់ទាញអតិថិជនថ្មីពីប្រទេសរុស្ស៊ី អ៊ុយក្រែន ឥណ្ឌា អារ៉ាប៊ីសាអូឌីត និងមជ្ឈឹមបូព៌ា។ .
ទោះយ៉ាងណា នៅត្រីមាសទីមួយដើមឆ្នាំ២០២៣ ក្រុមហ៊ុនសណ្ឋាគារនេះ បានអះអាងថា ខ្លួនបានខាតបង់អស់ប្រមាណជា ៣៤ លានដុល្លារ ខណៈដែលកាលពីរយៈពេលដដែលឆ្នាំ២០២២ គឺខាតបង់រហូតដល់ ១០៦ លានដុល្លារឯណោះ៕
