ក្រុមហ៊ុនផ្គត់ផ្គង់រ៉ែគីមី លីចូម និងរ៉ែគូបល់ (cobalt) សម្រាប់អាគុយរថយន្តអគ្គិសនីបានប្រមូលផ្តុំគ្នានៅក្នុងប្រទេសចិន និងប្រទេសមួយចំនួនទៀត ដូច្នេះហើយដើម្បីបញ្ចៀសហានិភ័យនៃការរអាក់រអួលខ្សែចង្វាក់ផ្គត់ផ្គង់ លទ្ធកម្មរួមគ្នាក្នុងចំណោមប្រទេសជាសមាជិករបស់ទីភ្នាក់ងារថាមពលអន្តរជាត នឹងត្រូវបានបង្កើតឡើង ដើម្បីកាត់បន្ថយការពឹងផ្អែកតែទៅលើប្រទេសតែមួយ សម្រាប់ផ្គត់ផ្គង់វត្ថុធាតុដើមដ៏សំខាន់នេះ។
រ៉ែលីចូម រ៉ែនីកែល និងរ៉ែគូបល់ នឹងត្រូវគេផ្ដោតជាសំខាន់បំផុត ដូច្នេះហើយលទ្ធកម្មសរុបរបស់ប្រទេសជាសមាជិករបស់ភ្នាក់ងារថាមពលអន្តរជាតិ ប្រមាណ ៣០ ប្រទេសនឹងត្រូវកំណត់លើប្រភេទរ៉ែទាំងនោះ ហើយភាគរយអប្បបរមាដែលត្រូវផ្គត់ផ្គង់ដល់សមាជិក IEA ក៏នឹងត្រូវបានបង្កើតឡើងផងដែរ។ ទីភ្នាក់ងារថាមពលអន្តរជាតិ កំពុងឆ្លើយតបនឹងសំណើពីក្រុមប្រទេសជី៧ ដើម្បីអភិវឌ្ឍស្តង់ដារមួយចំនួន ក្នុងការកំណត់លទ្ធកម្មរួមគ្នាសម្រាប់ការនាំចូលរ៉ែសំខាន់ៗទាំងនេះ។
អត្ថបទគួរអាន
សូមរំលឹកថា ទីភ្នាក់ងារថាមពលអន្តរជាតិ ត្រូវបានបង្កើតឡើងដោយក្រុមប្រទេសអភិវឌ្ឍ កាលពីឆ្នាំ១៩៧០ ដោយប្រទេសដែលបានចូលរួមបង្កើតជាង ៥០% គឺជារដ្ឋជាសមាជិកសហភាពអឺរ៉ុប រួមជាមួយប្រទេសមួយចំនួនទៀតដូចជា ប្រទេសជប៉ុន សហរដ្ឋអាមេរិក កូរ៉េខាងត្បូង ចក្រភពអង់គ្លេស និងអូស្ត្រាលី។ ប្រទេសឈីលីដែលជាអ្នកផលិតរ៉ែលីចូមដ៏សំខាន់មួយកំពុងស្ថិតក្នុងដំណើរការស្នើសុំចូលជាសមាជិករបស់ទីភ្នាក់ងារនេះ ខណៈប្រទេសចិនក៏ជាសមាជិកមួយដែរ។
ពាក់ព័ន្ធនឹងសហភាពអឺរ៉ុបវិញគឺថា ប្លុកនេះបាននាំចូលរ៉ែលីចូម ៧៩% មកពីប្រទេសឈីលី នាំចូលរ៉ែគូបល់ ៦៣% មកពីប្រទេសកុងហ្គោ និងបាននាំចូលលោហធាតុកម្រជាង ៨៥% មកពីប្រទេសចិន។ ប្លុកនេះបានកំណត់គោលដៅនៅត្រឹមឆ្នាំ២០៣០ គឺកាត់បន្ថយការពឹងផ្អែកលើប្រទេសនីមួយៗឱ្យតិចជាង ៦៥% នៃការប្រើប្រាស់សារធាតុរ៉ែទាំងនេះ និងបង្កើនការផ្គត់ផ្គង់ពីក្នុងប្រទេសជាសមាជិកប្លុកនេះឱ្យដល់យ៉ាងហោចណាស់ ១០%៕
