ច្បាប់ថ្មីរបស់អាមេរិកនេះ គឺជារឿងមិនល្អឡើយសម្រាប់ក្រុមហ៊ុនអឺរ៉ុប នៅអាមេរិក ដែលមិនទទួលបានអត្ថប្រយោជន៍អ្វីសោះពីរដ្ឋបាលក្រុងវ៉ាស៊ីនតោន ដែលទាមទារឱ្យអឺរ៉ុបត្រូវចាត់វិធានការឆ្លើយតបវិញ ដើម្បីជំរុញសមត្ថភាពប្រកួតប្រជែងសម្រាប់ក្រុមហ៊ុនរបស់ពួកគេ។ នេះបើតាមការរាយការណ៍ដោយសារព័ត៌មានអន្តរជាតិធំៗជាច្រើន។
នៅក្នុងសេចក្តីថ្លែងការរួមរបស់អាល្លឺម៉ង់ និងបារាំង បានរៀបរាប់ថា៖ ប្រទេសទាំងពីរចង់ធានាឱ្យបាននូវមូលដ្ឋានឧស្សាហកម្មរបស់អឺរ៉ុប ជាពិសេសឧស្សាហកម្មបៃតងសំខាន់ៗនាពេលបច្ចុប្បន្ន។ រដ្ឋមន្ត្រីសេដ្ឋកិច្ចនៃប្រទេសទាំងទ្វេ ធ្លាប់បានណែនាំពីវិធានការផ្តល់ប្រាក់ឧបត្ថម្ភធន់ និងកាត់បន្ថយពន្ធសម្រាប់ ឧស្សាហកម្មបៃតងដូចជា ការផលិតថាមពលពីកម្លាំងខ្យល់បក់ ថាមពលពន្លឺព្រះអាទិត្យ ការផលិតម៉ាស៊ីនបូមកំដៅ និងការផលិតអ៊ីដ្រូសែនជាដើម។
ទន្ទឹមនឹងនេះ ពួកគេបានជំរុញឱ្យគណៈកម្មការប្រតិបត្តិរបស់អឺរ៉ុប ចរចាជាមួយទីក្រុងវ៉ាស៊ីនតោន សម្រាប់ក្រុមហ៊ុនអ៊ឺរ៉ុប ដើម្បីទទួលបានការលើកលែងដូចទៅនឹងក្រុមហ៊ុនរបស់ប្រទេសម៉ិកស៊ិក និងកាណាដា ដែលជាដៃគូពាណិជ្ជកម្មសេរីដូចគ្នា។
អត្ថបទគួរអាន
គំនិតផ្តួចផ្តើមទាំងនេះ កើតចេញពីប្រទេសមានសេដ្ឋកិច្ចធំទាំងពីររបស់អឺរ៉ុប គឺបារាំង និងអាល្លឺម៉ង់ ខណៈសំណើត្រូវបានរុញបន្តមកគណៈកម្មការអឺរ៉ុប។ លោកស្រី អ៊ូហ្សូឡា វ៉ុនឌឺលីយេន ប្រធានគណៈកម្មការអឺរ៉ុប និយាយថា ប្លុកទាំង២៧ប្រទេស គួរតែកែសម្រួលច្បាប់របស់ខ្លួន ដើម្បីបើកផ្លូវឱ្យមានជំនួយពីរដ្ឋ ពីសេសជួយដល់ការផ្លាស់ប្តូរការប្រើប្រាស់ឥន្ធនៈហ្វូស៊ីលទៅជាថាមពលបៃតង។
លោកស្រីបន្ថែមថា អឺរ៉ុបនិងសហរដ្ឋអាមេរិកគួរតែធ្វើការជាមួយគ្នា ដើម្បីធានាថា វិធានការជំនួយ ក៏ដូចជាការធ្វើការរួមគ្នា គឺមានគោលដៅរួម ដើម្បីស្វែងរកប្រភពជំនួសនៃវត្ថុធាតុដើមសំខាន់ៗ ដែលផ្គត់ផ្គង់ដោយប្រទេសចិននាពេលបច្ចុប្បន្ន។
សូមជម្រាបថា ជាមួយនឹងច្បាប់ដែលភ្ជាប់មកជាមួយប្រាក់ឧបត្ថម្ភធន់ដ៏សន្ធឹកសន្ធាប់សម្រាប់ក្រុមហ៊ុនអាមេរិកនេះ ពលរដ្ឋដែលបញ្ជាទិញរថយន្តអគ្គិសនីថ្មីៗ ដូចជា តេស្លា(Tesla) ហ្វត(Ford) និងរថយន្ត ប្រភេទ EV មួយចំនួនទៀតដែលផលិតនៅអាមេរិក នឹងអាចដកពន្ធត្រឡប់មកវិញបាន ៧៥០០ដុល្លារ។ ប្រការនេះធ្វើឱ្យក្រុមហ៊ុនអឺរ៉ុបបារម្ភពីការខាតបង់ប្រាក់ដ៏ច្រើនព្រោះពួកគេត្រូវអនុលោមតាមច្បាប់ថ្មី ប៉ុន្តែមិនមានការឧបត្ថម្ភធន់ដូចក្រុមហ៊ុនអាមេរិក។ ភាគីទាំងពីរធ្លាប់បានចរចាជាច្រើនសារ ដើម្បីរកដំណោះស្រាយដែរ ប៉ុន្តែមិនមានការស្រុះស្រួលគ្នាឡើយគិតទល់នឹងពេលនេះ បើទោះបីជា ប្រធានាធិបតីអាមេរិក ចូ បៃឌិន ធ្លាប់បានបង្ហើបប្រាប់ប្រធានាធិបតីបារាំងផ្ទាល់មាត់ថា អាមេរិកអាចមានលទ្ធភាពកែសម្រួលច្បាប់ស្ដីពីការកាត់បន្ថយអតិផរណារបស់ខ្លួន ដើម្បីផលប្រយោជន៍អឺរ៉ុបយ៉ាងណាក្ដី៕
