![ដំណាំកាហ្វេ](https://cdn.cambonomist.com/media/images/rlkkmt1222244.2e16d0ba.fill-960x540.jpg)
សារព័ត៌មាន Nikkei បានរាយការណ៍ថា រលកកម្ដៅនៅអាស៊ីអាគ្នេយ៍ គឺជាមូលហេតុចម្បងនៃការកើនឡើងតម្លៃកាហ្វេនៅលើទីផ្សារអន្តរជាតិ។ ប្រភពដដែលបានរាយការណ៍ថា ចាប់តាំងពីខែមេសា មក សីតុណ្ហភាពជាមធ្យមក្នុងប្រទេសវៀតណាម ថៃ និងហ្វីលីពីន មានកម្តៅក្តៅជាងធម្មតា ដោយកន្លែងខ្លះឡើងដល់៤៨អង្សាសេ។
មកដល់ពេលនេះវៀតណាមផលិតគ្រាប់កាហ្វេ robusta បានប្រហែល៤០% សម្រាប់ផ្គត់ផ្គង់តម្រូវការកាហ្វេនៅលើពិភពលោក ប៉ុន្តែកសិករដាំកាហ្វេរបស់ប្រទេសនេះប្រឈមនឹងគ្រោះរាំងស្ងួតធ្ងន់ធ្ងរ។ លោក ម៉ាសាណូប៊ូ តាកាណូ ( Masanobu Takano) ជាអ្នកជំនាញកាហ្វេ និងតែនៅទីក្រុងកូបេ បាននិយាយថា ការប្រមូលផលកាហ្វេ robusta កាលពីឆ្នាំមុន គឺទាបខ្លាំង ដែលជំរុញឱ្យតម្លៃកាហ្វេមានការកើនឡើង ក្រោយមានការបារម្ភពីការផ្គត់ផ្គង់។
មកដល់ពេលនេះតម្លៃកាហ្វេ robusta នៅទីផ្សារ Benchmark London កើនឡើងជាង១៨% ពោលគឺហក់ឡើងដលទៅជិត៤ពាន់៤រយដុល្លារក្នុង១តោន ស្របពេលដែលតម្លៃកាហ្វេ Arabica កើនឡើងជិត២១%។
ពាក់ព័ន្ធនឹងទីផ្សារកាហ្វេនេះដែរ សារព័ត៌មាន Vietnam News បានរាយការណ៍ថា នៅឆមាសទី១ឆ្នាំ២០២៤ វៀតណាមនាំចេញកាហ្វេបានជាង៨៦ម៉ឺនតោនធ្លាក់ចុះ៨% បើធៀបនឹងរយៈពេលដូចគ្នាកាលពីឆ្នាំមុន ដោយរកចំណូលបានប្រមាណ៣ពាន់លានដុល្លារ។ យ៉ាងណាក៏ដោយតម្លៃកាហ្វេរបស់វៀតណាមបានកើនឡើងរហូតដល់៣៨%ឯណោះ៕
ដោយៈ សរ សុជាតិ