សម្ដេចធិបតីយល់ឃើញថា ការអប់រំ និងការបណ្ដុះបណ្ដាលមិនត្រឹមតែជួយបង្កើនធនធានមនុស្សសម្រាប់អភិវឌ្ឍន៍សេដ្ឋកិច្ចប៉ុណ្ណោះទេ តែវាបានបង្កើតនូវឧត្តមប្រយោជន៍ជាច្រើនសម្រាប់យុវជន និងសង្គមជាតិ។
នាពិធីសំណេះសំណាលជាមួយសិស្សនិទ្ទេស A ប្រមាណជាង១ពាន់៥រយនាក់ នៅថ្ងៃទី៩ ខែមករា ឆ្នាំ២០២៤ សម្ដេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជាបានចាត់ទុកការកែទម្រង់ក្នុងវិស័យអប់រំប្រកបដោយគុណភាពខ្ពស់ គឺការដោះស្រាយបញ្ហាធនធានមនុស្សក្នុងសង្គម ដែលមិនអាចខ្វះបាន និងជាកូនសោរដ៏សំខាន់ក្នុងការជួយពង្រឹងស្ថានភាពសង្គម និងសុខភាពសេដ្ឋកិច្ច។ សម្រាប់សម្តេចធិបតី ការកំណែទម្រង់ការប្រឡងបាក់ឌុប អ្នកចេះជាប់ អ្នកមិនចេះធ្លាក់ គឺជាការលុបបំបាត់វប្បធម៌អន្តាគមន៍ ធ្វើឲ្យយុវជនចេះគិត និងមានទំនួលខុសត្រូវចំពោះខ្លួនឯង។ យ៉ាងណាមិញប្រមុខរាជរដ្ឋាភិបាលអះអាងថា ការធ្វើកំណែទម្រង់ គឺទាមទារឱ្យមានការចូលរួម និងគាំទ្រពីប្រជាពលរដ្ឋ នមន្ត្រីរាជការ និងកងកម្លាំងប្រដាប់អាវុធ ដើម្បីបង្កើតវប្បធម៌មួយ និងបរិស្ថានមួយដែលអាចធានាបាននូវការរីកលូតលាស់ប្រកបដោយបរិយាប័ន្ន ប្រកបដោយភាពប្រកួតប្រជែង។
អត្ថបទគួរអាន
ពាក់ព័ន្ធការកំណែទម្រង់ប្រព័ន្ធអប់រំនេះដែរ លោកបណ្ឌិត គី សិរីវឌ្ឍន៍ អ្នកស្រាវជ្រាវសេដ្ឋកិច្ច និងជាប្រធានវិទ្យាស្ថានសិក្សាចិន នៃរាជបណ្ឌិត្យសភាកម្ពុជាយល់ឃើញថា យុវជនគឺជាកម្លាំងស្នូលដ៏សំខាន់ក្នុងការជួយកសាងសង្គម និងសេដ្ឋកិច្ច។ សម្រាប់អ្នកជំនាញរូបនេះ យុវជន គឺជាកម្លាំងពលកម្មដែលមានទាំងថាមពល និងសក្ដានុពល ដែលនឹងជួយបង្កើនតម្លៃពលកម្មបន្ថែមខ្ពស់ ក្នុងការអភិវឌ្ឍន៍សង្គម-សេដ្ឋកិច្ចកម្ពុជាឲ្យកាន់តែរឹងមាំ។ លោកបណ្ឌិត គី សេរីវឌ្ឍន៍ បានសង្កត់ធ្ងន់ថា ប្រសិនបើគ្មានការចូលរួមរបស់យុវជនទេនោះ ការកសាងសង្គម-សេដ្ឋកិច្ចរបស់កម្ពុជា ក៏មិនរឹងមាំនោះដែរ។
សូមបញ្ជាក់ថា នៅព្រឹកថ្ងៃទី៩ ខែមករា ឆ្នាំ២០២៤ សម្ដេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានជួបសំណេះសំណាលជាមួយសិស្សនិទ្ទេស A ប្រមាណជាង១ពាន់៥រយនាក់នៅសាលមហោស្រពជ្រោយចង្វារ។ ក្នុងឱកាសនោះ ប្រមុខរាជរដ្ឋាភិបាលបានដាក់ចេញនូវគោលនយោបាយអាទិភាពចំនួន៥ផងដែរ ដើម្បីកសាងមូលធនមនុស្សនៅកម្ពុជាឲ្យកាន់តែរឹងមាំមួយបន្ថែមទៀត។ ផែនការអាទិភាពទាំងនោះរួមមាន៖ ការពង្រឹងគុណភាពអប់រំកីឡា វិទ្យាសាស្រ្ត និងបច្ចេកវិទ្យា, ការបណ្ដុះបណ្ដាលជំនាញបច្ចេកទេស,ការលើកកម្ពស់សុខភាព សុខុមាលភាពប្រជាជន, ការពង្រឹងប្រព័ន្ធការពារសង្គម និងការពង្រឹងភាពជាពលរដ្ឋក្នុងសង្គម ជាដើម៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
