លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជាបានអះអាងថា ការជួបពិភាក្សាគ្នារវាងថ្នាក់ដឹកនាំអគ្គនាយកដ្ឋានសុខភាព និងផលិតកម្មសត្វជាមួយសមាគមអ្នកចិញ្ជឹមសត្វ និងក្រុមហ៊ុននាំចូលសាច់បង្កក កាលពីព្រឹកថ្ងៃទី៩ មករា ឆ្នាំ២០២៤ ទទួលបានផ្លែផ្កាវិជ្ជមានគួរជាទីមោទនសម្រាប់អ្នកចិញ្ចឹមសត្វនៅកម្ពុជា។ ព្រោះថា នៅក្នុងជំនួបនោះទាំងអគ្គនាយកដ្ឋានសុខភាពសត្វ និងក្រុមហ៊ុននាំចូលសាច់បង្កកសុទ្ធតែបានបង្ហាញការតាំងចិត្តខ្ពស់ក្នុងការកាត់បន្ថយ និងទប់ស្កាត់ការនាំចូលសាច់បង្កកខុសច្បាប់ និងខូចគុណភាព ក៏ដូចជាប្តេជ្ញាធ្វើការយ៉ាងជិតស្និតជាមួយអ្នកចិញ្ចឹមសត្វក្នុងស្រុក។ សម្រាប់លោក ស៊្រុន ពៅ នេះគឺជាក្តីសង្ឃឹមថ្មីមួយទៀតសម្រាប់អ្នកចិញ្ចឹមសត្វនៅកម្ពុជា បន្ទាប់ពីមានកសិករខ្នាតតូចប្រមាណ៩០% បានបញ្ឈប់ការចិញ្ចឹមសត្វ ខណៈតាមកសិដ្ឋានខ្លះទៀតបានកាត់បន្ថយបរិមាណ។
សូមបញ្ជាក់ថា កាលពីថ្ងៃទី៤ ខែមករា ឆ្នាំ២០២៤ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានចាត់តាំងឯកឧត្តម តាន់ ផាន់ណារ៉ា ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វ ឱ្យដឹកនាំកិច្ចប្រជុំបន្ទាន់ជាមួយភាគីពាក់ព័ន្ធ ស្តីពីតម្រូវការ និងការផ្គត់ផ្គង់សត្វ ការធ្វើបំណែកសាច់តាមប្រភេទ និងស្តង់ដាគុណភាព ដើម្បីទទួលបានតម្លៃបន្ថែម និងធានាស្ថិរភាពតម្លៃទីផ្សារល្អ និងធានាផលចំណេញសមរម្យសម្រាប់អ្នកផលិត៕
