ថៃ ជាប់ឈ្មោះអាក្រក់ក្នុងចំណោមកំពូលប្រទេសទាំង៣នៅអាស៊ី-ប៉ាស៊ីហ្វិក ដែលមានអំពើឆបោក

លោក អាមែន ដាយែល (Aman Dayal) ប្រធានប្រតិបត្តិការសុវត្ថិភាពប្រចាំតំបន់អាស៊ី-ប៉ាស៊ីហ្វិក នៅក្រុមហ៊ុនយក្សអាម៉េរិក Google បានលើកឡើងអំឡុងកិច្ចប្រជុំតុមូលជាមួយប្រព័ន្ធផ្សព្វផ្សាយអំពីរបាយការណ៍ស្ទាបស្ទង់ខាងលើនេះថា នៅឆ្នាំ២០២៣ កន្លងទៅ ក្រុមហ៊ុន Google បានរកឃើញថា អំពើឆបោកលុយកាក់តាមប្រព័ន្ធអនឡាញបានកើនឡើងគួរឱ្យកត់សម្គាល់។

អ្វីដែលគួរឱ្យកត់សម្គាល់ របាយការណ៍ដដែលនេះបង្ហាញថា កំពូលប្រទេសទាំង៣ នៅអាស៊ី-ប៉ាស៊ីហ្វិក ដែលមានអំពើឆបោកលុយកាក់ច្រើនបំផុតតាមប្រព័ន្ធអនឡាញ រួមមាន ប្រទេសថៃ ប្រទេសសិង្ហបុរី និងប្រទេសឥណ្ឌា។

តំបន់អាស៊ី-ប៉ាស៊ីហ្វិក គឺជាតំបន់ដែលមានអំពើឆបោកតាមប្រព័ន្ធអនឡាញខ្លាំងបំផុតដោយសារប្រជាជនក្នុងតំបន់នេះគ្របដណ្ដប់រហូតដល់ទៅជាង៩០% នៃការប្រើប្រាស់ទូរសព្ទស្មាតហ្វូនទូទាំងពិភពលោក ហើយពួកគេចូលចិត្តធ្វើប្រតិបត្តិការផ្ទេរ និងទូទាត់ប្រាក់តាមទូរសព្ទដៃ។

ជនឆបោកច្រើនតែបន្លំធ្វើជាមន្ត្រីធនាគារ ឬមន្ត្រីមកពីភ្នាក់ងាររដ្ឋាភិបាលជាដើម ដើម្បីបោកជនរងគ្រោះដោយសារពលរដ្ឋក្នុងតំបន់អាស៊ី-ប៉ាស៊ីហ្វិក ភាគច្រើនគោរពមន្ត្រីទាំងអស់នេះ។

លើសពីនេះ តំបន់ជាច្រើននៃអាស៊ី-ប៉ាស៊ីហ្វិក ក៏ប្រឈមនឹងគម្លាតយ៉ាងធំផងដែរផ្នែកចំណេះដឹងឌីជីថល ដែលធ្វើឱ្យសមត្ថកិច្ចពិបាកស្វែងរកការគំរាមកំហែងតាមប្រព័ន្ធអនឡាញប្រកបដោយប្រសិទ្ធភាព ជាពិសេសមនុស្សចាស់ ដែលប្រើប្រាស់ទូរសព្ទដៃងាយនឹងទទួលសារបោកប្រាស់ និង App ដែលមានហានិភ័យ។

ទោះជាយ៉ាងណា ការស្ទាបស្ទង់របស់ក្រុមយក្សអាម៉េរិក Google កាលពីពេលថ្មីៗនេះបានបង្ហាញថា ក្រុមអាយុចន្លោះពី២៥ឆ្នាំ ដល់៣៤ឆ្នាំ នៅក្នុងប្រទេសឥណ្ឌូនេស៊ី ប្រទេសសិង្ហបុរី ប្រទេសថៃ និងប្រទេសវៀតណាម គឺងាយរងគ្រោះក្នុងអំពើឆបោកបំផុត៕

ដោយ: តែម សុខុម