ឥណ្ឌាបានចុះកិច្ចព្រមព្រៀងវិនិយោគក្នុងទំហំ១០០ពាន់លានដុល្លារអាម៉េរិក ជាមួយប្រទេសអឺរ៉ុប ចំនួន៤ រួមមាន ប្រទេសអ៊ីស្លង់ (Iceland) ប្រទេសលិចតេនស្ទេន (Liechtenstein) ប្រទេសន័រវែស និងប្រទេសស្វីស ហើយបានប្តេជ្ញាបញ្ចុះពន្ធនាំចូលលើផលិតផលឧស្សាហកម្មពីប្រទេសអឺរ៉ុបទាំង៤ខាងនេះដែលសុទ្ធតែជាសមាជិកនៃសមាគមពាណិជ្ជកម្មសេរីអឺរ៉ុប(EFTA)។
សមាគមពាណិជ្ជកម្មសេរីអឺរ៉ុប(EFTA)បានលើកឡើងថា កិច្ចព្រមព្រៀងដ៏មានសារសំខាន់រវាងឥណ្ឌា និងសមាគមពាណិជ្ជកម្មសេរីអឺរ៉ុប (EFTA) នេះ នឹងនាំមកនូវអត្ថប្រយោជន៍សេដ្ឋកិច្ចធំធេងដូចជាខ្សែច្រវាក់ផ្គត់ផ្គង់ ដែលត្រូវបានធ្វើសមាហរណកម្មកាន់តែល្អប្រសើរ និងដែលមានភាពធន់ជាងមុន ឱកាសថ្មីៗសម្រាប់អាជីវកម្ម និងពលរដ្ឋនៃភាគីសងខាងដែលឈានទៅរកកំណើននៃរំហូរពាណិជ្ជកម្ម និងការវិនិយោគ ការបង្កើតការងារ និងកំណើនសេដ្ឋកិច្ច។
រដ្ឋមន្ត្រីក្រសួងពាណិជ្ជកម្ម និងឧស្សាហកម្មឥណ្ឌា លោក ពីយូស ហ្គោយ៉ាល់ (Piyush Goyal) បានគូសបញ្ជាក់ថា នេះជាលើកទី១ហើយ ដែលប្រទេសឥណ្ឌា បានចុះកិច្ចព្រមព្រៀងជាមួយប្លុកសេដ្ឋកិច្ចដ៏សំខាន់មួយនៅអឺរ៉ុបបែបនេះ។ កិច្ចព្រមព្រៀងនេះរួមបញ្ចូលពាណិជ្ជកម្មលើទំនិញ និងសេវាកម្ម ការលើកកម្ពស់ការវិនិយោគ និងកិច្ចសហប្រតិបត្តិការ កម្មសិទ្ធិបញ្ញា លទ្ធកម្មរបស់រដ្ឋាភិបាល ពាណិជ្ជកម្ម និងការអភិវឌ្ឍប្រកបដោយនិរន្តរភាព និងការដោះស្រាយវិវាទផងដែរ។
លោក ពីយូស ហ្គោយ៉ាល់ (Piyush Goyal) បានលើកឡើងតាមរយៈសេចក្តីថ្លែងការណ៍ថា កិច្ចព្រមព្រៀងនេះនឹងផ្តល់នូវឱកាសដ៏ល្អសម្រាប់អ្នកនាំចេញរបស់ឥណ្ឌា ក្នុងការចូលទៅកាន់ទីផ្សារអឺរ៉ុប និងទីផ្សារពិភពលោក៕
ដោយ: តែម សុខុម
