សារព័ត៌មាន CNBC បានរាយការណ៍ថា ប្រទេសជប៉ុន បានប្រារព្ធពិធីរំលឹក និងគោរពមនុស្សចាស់កាលពីដើមសប្តាហ៍ជាមួយនឹងកំណើននៃបញ្ហាប្រឈមនៃប្រជាសាស្រ្ត ដោយសារតែកំណើនកើនឡើងនៃមនុស្សវ័យចំណាស់។ ទិន្នន័យរបស់រដ្ឋាភិបាលជប៉ុន ដែលបានចេញផ្សាយមុនព្រឹត្តិការណ៍នេះបានបង្ហាញថា ប្រជាជនជប៉ុន ដែលមានអាយុលើសពី៦៥ឆ្នាំ បានកើនឡើងដល់កម្រិតខ្ពស់បំផុត ពោលគឺកើនដល់ជាង៣៦លាននាក់ ខណៈដែលចំនួនប្រជាជនសរុបរបស់ប្រទេសកំពុងធ្លាក់ចុះ។ រដ្ឋាភិបាលជប៉ុន បានអះអាងថា នៅពេលនេះប្រជាជនវ័យចំណាស់នៅក្នុងប្រទេសនេះ គឺបានកើនឡើងដល់២៩,៣% នៃចំនួនប្រជាជនសរុប។
ពាក់ព័ន្ធនឹងបញ្ហានេះ លោក រ៉ូបឺត ហ្វែលមេន (Robert Feldman) ប្រធានក្រុមអ្នកសេដ្ឋវិទូនៅក្រុមហ៊ុន Morgan Stanley MUFG Securities បានអះអាងថា ទិន្នន័យនេះបង្ហាញឱ្យមានការព្រួយបារម្ភបន្ថែមទៀតអំពីការផ្លាស់ប្តូរប្រជាសាស្រ្ត និងវិបត្តិការងារនៅក្នុងប្រទេសជប៉ុន។ ការលើកឡើងបែបនេះ គឺស្របគ្នានឹងការស្ទង់មតិដែលធ្វើឡើងដោយក្រុមហ៊ុន Teikoku Databank កាលពីខែមុន ដែលបានបង្ហាញថា ៥១% នៃក្រុមហ៊ុននានានៅទូទាំងប្រទេសជប៉ុន បានបញ្ជាក់អំពីបញ្ហា នៃការខ្វះខាតបុគ្គលិកពេញម៉ោងបម្រើការងារ។ អ្នកជំនាញរូបនេះជឿជាក់ថា ដោយសារតែស្ថានភាពប្រជាសាស្រ្តបែបនេះ ជប៉ុនអាចនឹងប្រឈមមុខនឹងវិបត្តិកង្វះកម្លាំងពលកម្មដ៏អាក្រក់។
វិទ្យាស្ថានជាតិស្រាវជ្រាវប្រជាជន និងសន្តិសុខសង្គម បានអះអាងថា ស្ថានភាពប្រជាសាស្រ្តដ៏អាក្រក់នេះ មិនត្រឹមតែមិនថមថយនោះទេ វានឹងកើនឡើងបន្ថែមទៀត។ តាមការព្យាករដោយផ្អែកលើនិន្នាការថ្មីៗបានឲ្យដឹងថា សមាមាត្រមនុស្សចាស់របស់ប្រទេសជប៉ុន ត្រូវបានគេរំពឹងថា នឹងបន្តកើនឡើងដោយឈានដល់ជិត៣៤% ក្នុងឆ្នាំ២០២៤០ខាងមុខ។
នៅពេលនេះរដ្ឋាភិបាលជប៉ុន បានទទួលស្គាល់ផលប៉ះពាល់សេដ្ឋកិច្ច និងសង្គមដែលអាចកើតចេញពីនិន្នាការទាំងនេះ ហើយបានចាត់វិធានការ ដើម្បីប្រឆាំងនឹងបញ្ហាទាំងនោះ។ នៅពេលនេះដើម្បីបំពេញតម្រូវការទីផ្សារការងារជប៉ុន បានបើកទ្វារទទួលពលករបរទេសរហូតដល់២លាននាក់ នៅក្នុងឆ្នាំ២០២៤ ហើយនឹងបង្កើនបន្ថែម៨សែននាក់ទៀតក្នុងរយៈពេល៥ឆ្នាំខាងមុខ៕
ដោយៈ សរ សុជាតិ
