ពាក់ព័ន្ធនឹងការផ្លាស់ប្ដូរការងាររបស់អ្នកប្រកបការងារនៅក្នុងវិស័យទេសចរណ៍នេះដែរ ក៏ធ្លាប់ត្រូវបានអ្នកជំនាញក្នុងវិស័យទេសចរណ៍ មានក្ដីបារម្ភខ្លាំងដែរ បារម្ភនៅត្រង់ថា កម្លាំងពលកម្មនៅក្នុងវិស័យទេសចរណ៍អាចនឹងមានការខ្វះខាត ប្រសិនបើវិស័យនេះចាប់ផ្ដើមមានសន្ទុះងើបវិញ។ ថ្មីៗនេះដែរ រាជរដ្ឋាភិបាលកម្ពុជា ទើបតែបានប្រកាសថា បើកប្រទេសលើគ្រប់វិស័យឡើងវិញ និងមានផែនការបើកទទួលទេសចរវ៉ាក់សាំងនៅចុងខែវិច្ឆិកានេះផងដែរ។ តើវិស័យទេសចរណ៍កម្ពុជា អាចនឹងជួបញ្ហាកង្វះកម្លាំងពលកម្មធ្ងន់ធ្ងរដែរ ឬយ៉ាង ក្រោយពេលរាជរដ្ឋាភិបាលបើកប្រទេសឡើងវិញ?
ក្រោយពេលរាជរដ្ឋាភិបាលកម្ពុជាបានប្រកាសបើកប្រទេសឡើងវិញលើគ្រប់វិស័យ និងកំពុងត្រៀមទទួលទេសចរវ៉ាក់សាំងនោះ លោកជំទាវ ឆាយ ស៊ីវលីន ប្រធានសមាគមទេសចរណ៍កម្ពុជា បានបង្ហាញពីការព្រួយបារម្ភនៃការខ្វះខាតកម្លាំងពលកម្ម ក្នុងវិស័យទេសចរណ៍នៅពេលខាងមុខ។ អ្នកជំនាញរូបនេះ បានបញ្ជាក់ទៀតថា បើទោះបីកម្ពុជា កំពុងខ្វះកម្លាំងពលកម្មក្នុងវិស័យទេសចរណ៍ ក៏ពិតមែន ក៏ប៉ុន្តែ មិនបានបង្កជាក្ដីព្រួយបារម្ភពេកនោះទេ ព្រោះរាជរដ្ឋាភិបាលកម្ពុជា សម្រេចបើកប្រទេស ជាជំហានៗ មិនបានបើកទាំងស្រុងនោះទេ។
អត្ថបទគួរអាន
យ៉ាងណាក៏ដោយចុះ ប្រធានសមាគមទេសចរណ៍ លោកជំទាវ ឆាយ ស៊ីវលីន នៅតែមានក្ដីព្រួយបារម្ភ លើការមិនវិលត្រឡប់ របស់ភ្នាក់ងារទេសចរណ៍ ដែលធ្វើឱ្យវិស័យនេះ ខ្វះលទ្ធភាពក្នុងការទទួលទេសចរអន្តរជាតិនាពេលខាងមុខ។ ជាមួយគ្នានេះ លោកជំទាវ ឆាយ ស៊ីវលីន ក៏បានស្នើឱ្យភាគីពាក់ព័ន្ធ គួរមានវិធានការលើកទឹកចិត្ត និងគាំទ្រ ដល់ក្រុមអ្នកធ្លាប់រកស៊ីក្នុងវិស័យទេសចរណ៍ឡើងវិញ។
ជុំវិញនឹងបញ្ហាកង្វះខាតកម្លាំងពលកម្មក្នុងវិស័យទេសចរណ៍នេះដែរ ឯកឧត្តម តុប សុភ័ក អ្នកនាំពាក្យក្រសួងទេសចរណ៍ បានយល់ឃើញថា វិបត្តិកូវីដ-១៩ ពិតជាបានធ្វើឱ្យអ្នកនៅក្នុងវិស័យនេះថយចុះក៏ពិតមែន ប៉ុន្តែ វាមិនមែនជាបញ្ហាធ្ងន់ធ្ងរនោះទេ។ ឯកឧត្តម តុប សុភ័ក បានអះអាងថា ដ្បិត វិស័យទេសចរណ៍បានរងគ្រោះខ្លាំង ព្រោះតែវិបត្តិកូវីដ-១៩ តែក្រសួងទេសចរណ៍ តែងពង្រឹងជានិច្ច នូវសេវាកម្មទេសចរណ៍នានា ហើយវិស័យឯកជនក៏ត្រៀមជានិច្ចក្នុងការទទួលទេសចរអន្តរជាតិ ដែលបានចាក់វ៉ាក់សាំងនាពេលខាងមុខ។
ដើម្បីស្ដារសេដ្ឋកិច្ចឡើងវិញ ប្រមុខរាជរដ្ឋាភិបាលកម្ពុជា សម្រេចបើកប្រទេសឡើងវិញ មុនផែនការកំណត់ ក្រោយកម្ពុជាសម្រេចការចាក់វ៉ាក់សាំងបានលើស១០០ភាគរយ លើប្រជាជនដែលមានអាយុចាប់ពី ១៨ឆ្នាំឡើងទៅ។ បន្ថែមនោះ រាជរដ្ឋាភិបាល ក៏ត្រៀមបើកទទួលទេសចរអន្តរជាតិ ដែលបានចាក់វ៉ាក់សាំងរួច នៅចុង ខែវិច្ឆិកា ខាងមុខ ដើម្បីចូលរួមស្ដារវិស័យទេសចរណ៍ និងសេដ្ឋកិច្ច ឡើងវិញ ដែលកំណត់យក ខេត្តព្រះសីហនុ និងខេត្តកោះកុង ជាគោលដៅបើកសាកល្បងដំបូងគេ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
