ជាក់ស្ដែង លោក ចូ បៃដិន ប្រធានាធិបតីអាមេរិក និយាយរិះគន់ចំៗថា លោកមិនមែនជាមនុស្សម្នាក់គត់ដែលគិតថា ផែនការសេដ្ឋកិច្ចដើមរបស់នាយករដ្ឋមន្ត្រីថ្មីរបស់អង់គ្លេស គឺលោកស្រី លីស ត្រាស ដែលនាំឱ្យមានការធ្លាក់ថ្លៃយ៉ាងខ្លាំងក្នុងតម្លៃផោន គឺជាកំហុសនោះទេ ហើយលោកក៏មិនមានក្ដីបារម្ភខ្លាំងចំពោះការកើនឡើងគំហុកនៃប្រាក់ដុល្លារអាមេរិកនោះដែរ។ នេះបើតាមការរាយការណ៍ពីសារព័ត៌មានអន្តរជាតិធំៗជាច្រើន។
លោក បៃដិន បៃឌិនបាននិយាយប្រាប់ទៅកាន់អ្នកកាសែតកាលពីថ្ងៃទី ១៥ ខែតុលាថា វាមិនមែនមានតែលោកម្នាក់ទេដែលគិតថា ផែនការសេដ្ឋកិច្ចដើមរបស់លោកស្រី លីស ត្រាស ជាកំហុសឆ្គង សម្រាប់សេដ្ឋកិច្ចនោះ។
យ៉ាងណាមិញ ក្រោយពីភាពចលាចលទីផ្សារហិរញ្ញវត្ថុបានកើតមានឡើង នៅរយៈពេល៣សប្ដាហ៍មកនេះ លោកស្រី លីស ត្រាស បានបណ្ដេញរដ្ឋមន្ត្រីហិរញ្ញវត្ថុរបស់ខ្លួនចេញពីតំណែង គឺលោក Kwasi Kwarteng ដោយត្រូវបានជំនួសតំណែងដោយលោក Jeremy Huntវិញ ហើយលោកស្រី ត្រាស ក៏បានលុបចោលផ្នែកខ្លះនៃកញ្ចប់សេដ្ឋកិច្ចដ៏ចម្រូងចម្រាសរបស់ខ្លួនផងដែរ។
អត្ថបទគួរអាន
ក្រោយពីបានឡើងជារដ្ឋមន្ត្រីហិរញ្ញវត្ថុថ្មីរបស់ចក្រភពអង់គ្លេសលោក ជេរេមី ហាន់ (Jeremy Hunt) បាននិយាយថា ពន្ធមួយចំនួននឹងកើនឡើង ហើយការសម្រេចចិត្តពីចំណាយដ៏តឹងតែងគឺត្រូវធ្វើជាចាំបាច់ដោយលោកនិយាយថា លោកស្រី ត្រាស មានកំហុសនៅពេលដែលលោកស្រីគិតតែប្រែងរក្សាតំណែងរបស់លោកស្រី ក្នុងរយៈពេលជាង១ខែមកនេះនៅក្នុងអាណត្តិរបស់លោកស្រី។
ដោយគេគ្រោងនឹងធ្វើការវាយតម្លៃតាមរយៈការស្ទង់មតិសម្រាប់ទាំងគណបក្សអភិរក្សដែលកំពុងកាន់អំណាច និងនាយករដ្ឋមន្ត្រីផ្ទាល់ ហើយដោយសមាជិកសភាជាច្រើននាក់របស់លោកស្រី ត្រាស បានសួរថាតើលោកស្រី ត្រាស គួរតែត្រូវបានដកចេញ ឬយ៉ាងណានោះ លោកស្រី ត្រាស កំពុងពឹងផ្អែកខ្លាំងលើលោក ហាន់ ដែលជារដ្ឋមន្ត្រីក្រសួងហិរញ្ញវត្ថុថ្មី ដើម្បីជួយសង្រ្គោះតំណែងនាយករដ្ឋមន្ត្រីរបស់លោកស្រីនៅក្នុងរយៈពេលជិត ៤០ ថ្ងៃ បន្ទាប់ពីបានឡើងកាន់តំណែងបន្ដពីលោកបូរីស ចនសុន។
នៅក្នុងអត្ថបទមួយដែលបានចេញផ្សាយដោយកាសែត The Sun កាលពីល្ងាចថ្ងៃសៅរ៍ទី១៥ ខែតុលាបានរាយការណ៍ថា លោកស្រី ត្រាស បានសារភាពថា ផែនការទាំងនេះបានវិវឌ្ឍទៅមុខ«លឿនជាងទីផ្សារកំពុងរំពឹងទុកទៅទៀត។
លោកស្រីលីស ត្រាស់បានលើកឡើងដោយទទួលស្គាល់ថា គេមិនអាចត្រួសត្រាយផ្លូវទៅកាន់សេដ្ឋកិច្ចមួយដែលមានពន្ធទាប និងកំណើនខ្ពស់ ដោយគ្មានការរក្សាភាពជឿជាក់លើទីផ្សារនោះទេ។
លោស្រី ត្រាស បានបន្ថែមថាលោក ហាន់ នឹងដាក់ចេញនូវផែនការមួយចំនួននៅចុងខែនេះដើម្បីធ្វើឱ្យបំណុលជាតិធ្លាក់ចុះ«នៅក្នុងរយៈពេលមធ្យម»ខាងមុខនេះ។
ទោះយ៉ាងណា ការរក្សាតំណែង បានឬមិនបានរបស់លោកស្រី លីស ត្រាស គេនឹងត្រូវរងចាំមើលបន្ដទៀត ថាតើក្រោយពីមានការកែប្រែផែនការកញ្ចប់សេដ្ឋកិច្ចហើយ ប្រសិទ្ធភាពនឹងការអនុវត្តនឹងធ្វើឲ្យទីផ្សារ ក៏ដូចជាសេដ្ឋកិច្ចមានភាពប្រសើរឡើងយ៉ាងណាខ្លះ។
អត្ថបទ៖ សុខ ជា
