![ក្រុមប្រទេស BRICS](https://cdn.cambonomist.com/media/images/mlsbnghbpbnngchlrmchmykrmbrts_BRIC.2e16d0ba.fill-960x540.jpg)
នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បាននិយាយនៅក្នុងបទសម្ភាសជាមួយប្រព័ន្ធផ្សព្វផ្សាយចិន Guancha ថា ប្រទេសម៉ាឡេស៊ី កំពុងរៀបចំខ្លួន ដើម្បីចូលរួមជាមួយប្លុកក្រុមប្រទេស BRICS ដើម្បីជំរុញសេដ្ឋកិច្ច និងពាណិជ្ជកម្ម។ លោកបានអះអាងថា ម៉ាឡេស៊ី រីករាយក្នុងការចូលរួមជាមួយនឹងប្លុក ដែលផ្តួចផ្តើមបង្កើតឡើងដោយប្រទេសប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូងនេះ។
លោក អាន់វ៉ា បានអះអាងថា ម៉ាឡេស៊ី កំពុងរៀបចំនីតិវិធី និងគ្រោងដាក់ពាក្យស្នើសុំចូលជាសមាជិកក្នុងពេលឆាប់ៗខាងមុខនេះ តែយ៉ាងណាលោកមិនបានផ្តល់ព័ត៌មានលម្អិតពាក់ព័ន្ធដំណើរការនៃការដាក់ពាក្យនេះនោះទេ។ ការអះអាងពីបំណងចង់ចូលជាសមាជិក BRICS របស់នាយករដ្ឋមន្ត្រីម៉ាឡេស៊ីនេះ ធ្វើឡើងមុនដំណើរទស្សនកិច្ចរយៈពេល៣ថ្ងៃរបស់នាយករដ្ឋមន្ត្រីចិន លោក លី ឈាង (Li Qiang) មកកាន់ម៉ាឡេស៊ីនៅសប្តាហ៍នេះ ដើម្បីចូលរួមពិធីរំលឹកខួបលើកទី៥០ នៃការបង្កើតទំនាក់ទំនងការទូតរវាងម៉ាឡេស៊ី និងចិន។
ម៉ាឡេស៊ី និងចិនត្រូវបានគេរំពឹងថា នឹងចុះហត្ថលេខាលើកិច្ចព្រមព្រៀងជាច្រើនក្នុងអំឡុងពេលដំណើរទស្សនកិច្ចរបស់លោក លី ឈាង នៅប្រទេសម៉ាឡេស៊ី ដែលរួមមានទាំងការបន្តកិច្ចព្រមព្រៀងពាណិជ្ជកម្ម និងកិច្ចសហប្រតិបត្តិការសេដ្ឋកិច្ចរយៈពេល៥ឆ្នាំផងដែរ។
ក្រុមប្រទេស BRICS កាលពីឆ្នាំមុន បានចាប់ផ្តើមពង្រីកសមាជិកភាពរបស់ខ្លួន ដើម្បីប្រកួតប្រជែង និងរិតបន្តឹងសណ្តាប់ធ្នាប់ពិភពលោកដែលគ្រប់គ្រងដោយសេដ្ឋកិច្ចលោកខាងលិច ហើយប្រទេសដែលបានចូលរួមថ្មីកាលនោះ គឺរួមមានអារ៉ាប៊ីសាអូឌីត អ៊ីរ៉ង់ អេត្យូពី អេហ្ស៊ីប អាហ្សង់ទីន និងអារ៉ាប់រួម ហើយក្រៅពីនេះក៏មានប្រទេសជាង៤០ផ្សេងទៀតផងដែរ ដែលបានបង្ហាញពីចំណាប់អារម្មណ៍ចង់ចូលរួមជាមួយប្លុកនេះ។
ក្រៅពីប្រទេសម៉ាស៊ីឡេស៊ី ក៏មានក្រុមប្រទេសសមាជិកអាស៊ានពីរផ្សេងទៀតដូចជាថៃ និងណ្ឌូនេស៊ី ក៏បានបង្ហាញនូវចេតនាចង់ចូលរួមជាមួយនឹងប្លុក BRICS នេះផងដែរ៕