ការស្ទង់មតិមួយរបស់សារព័ត៌មាន CNN មួយ បានបង្ហាញគួរឱ្យភ្ញាក់ផ្អើលថា ភាគច្រើន ឬ រហូតដល់ទៅ៨៦% នៃពលរដ្ឋអាម៉េរិក ដែលកំពុងជួលផ្ទះគេរស់នៅក្នុងពេលបច្ចុប្បន្ននៅសហរដ្ឋអាម៉េរិក និយាយថា ពួកគេចង់ទិញផ្ទះផ្ទាល់ខ្លួនណាស់ ប៉ុន្តែខ្វះលទ្ធភាព។ ក្នុងចំណោមអ្នកជួលដែលគ្មានលទ្ធភាពទិញផ្ទះ មាន៥៤% គិតថា ខ្លួនទំនងជាគ្មានលទ្ធភាពទិញផ្ទះឡើយនៅថ្ងៃអនាគត។
លទ្ធផលនៃការស្ទង់មតិនេះបានបង្ហាញថា ការហក់ឡើងនូវអត្រាការប្រាក់លើកម្ចីទិញផ្ទះ និងការហក់ឡើងនូវតម្លៃផ្ទះបានបណ្ដាលឱ្យមានវិបត្តិពលរដ្ឋខ្វះលទ្ធភាពទិញផ្ទះ។ ហើយដោយសារតែផ្ទះផ្ទាល់ខ្លួនត្រូវបានចាត់ទុកជាទ្រព្យដ៏សំខាន់ក្នុងជីវិតនៅសហរដ្ឋអាម៉េរិក បញ្ហានេះនឹងធ្វើឱ្យគម្លាតរីកកាន់តែធំរវាងអ្នកមាន និងអ្នកក្រ។ ជាពិសេស នៅពេលនេះពលរដ្ឋអាម៉េរិក ដែលមានវ័យក្មេងកំពុងជួបបញ្ហាខ្វះលុយទិញផ្ទះ។
ការស្ទង់មតិរបស់សារព័ត៌មាន CNN បានរកឃើញថា ៩០%នៃអ្នកជួលផ្ទះដែលមានអាយុក្រោម៤៥ឆ្នាំនិយាយថា ពួកគេចង់ទិញផ្ទះខ្លាំងណាស់ ប៉ុន្តែខ្វះលទ្ធភាព បើធៀបនឹង៧៩%នៃពលរដ្ឋដែលមានវ័យ៤៥ឆ្នាំឡើងទៅ៕
ដោយ: តែម សុខុម
