តើអ្នកវិនិយោគគួរមើលលើចំណុចអ្វីខ្លះ ដើម្បីបញ្ចៀសហានិភ័យលើការវិនិយោគក្នុងវិស័យអចលនទ្រព្យ?

ឧកញ៉ា ចេង ខេង ប្រធានក្រុមប្រឹក្សាភិបាលក្រុមហ៊ុនអចលនទ្រព្យ CPL បានផ្តល់ជាគំនិតថា មុនសម្រេចចិត្តវិនិយោគលើវិស័យអចលនវត្ថុ អតិថិជនត្រូវសិក្សាឱ្យបានច្បាស់លាស់ពីភាពស្របច្បាប់របស់ក្រុមហ៊ុននីមួយៗ និងត្រូវប្រាកដថា ក្រុមហ៊ុនទាំងនោះមានការទទួលស្គាល់ពីនិយ័តករអាជីវកម្មអចលនវត្ថុ និងបញ្ចាំ ដែលជាអាជ្ញាធរទទួលបន្ទុកផ្តល់អាជ្ញាបណ្ណលើការប្រកបអាជីវកម្ម។

សម្រាប់អ្នកជំនាញចាស់វស្សារូបនេះ ការវិនិយោគជាមួយក្រុមហ៊ុនស្របច្បាប់ មិនត្រឹមតែជួយកាត់បន្ថយហានិភ័យលើការខាតបង់ថវិកាប៉ុណ្ណោះទេ ថែមទាំងទទួលបានការគាំទ្រពីអាជ្ញាធរក្នុងករណីមានបញ្ហាអ្វីមួយកើតឡើងផងដែរ។

​ស្រដៀងគ្នានេះ លោក សន សៀប ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានលើកឡើងថា មុនសម្រេចចិត្តវិនិយោគក្នុងវិស័យអចលនទ្រព្យ អ្នកវិនិយោគគួរសិក្សាស្រាវជ្រាវរកក្រុមហ៊ុនដែលមានអាជ្ញាបណ្ណត្រឹមត្រូវ។

បើតាមប្រធានសមាគមរូបនេះ អ្នកវិនិយោគអាចស្វែងរកភាពស្របច្បាប់របស់ក្រុមហ៊ុនអចលនទ្រព្យទាំងនោះនៅនិយ័តករអាជីវកម្មអចលនវត្ថុ និងបញ្ចាំ និងនៅសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) ខណៈក្រុមហ៊ុនដែលមានអាជ្ញាបណ្ណតែផុតសុពលភាព គឺមិនអាចក្លាយជាសមាជិករបស់សមាគមពេញសិទ្ធិបាននោះទេ។

​បើតាមការអះអាងរបស់លោក សន សៀប ឱកាសវិនិយោគលើវិស័យអចលនទ្រព្យនៅកម្ពុជា នៅតែមានសក្ដានុពលខ្ពស់។ តែយ៉ាងណាអ្នកជំនាញរូបនេះអះអាងថា វិស័យនេះនៅតែទាមទារឱ្យមានការពង្រឹងនូវជំនាញវិជ្ជាជីវៈប្រកបដោយគុណភាព ដើម្បីផ្ដល់សេវាកម្មឱ្យបានច្បាស់លាស់ជូនដល់អ្នកវិនិយោគ៕

អត្ថបទ៖ បូ ដូឡា​