តើទីផ្សារអចលនទ្រព្យនៅមហាយក្សចិន មានស្ថានភាពយ៉ាងណាទៅហើយនៅពេលនេះ?

សារព័ត៌មាន South China Morning Post បានរាយការណ៍ថា រដ្ឋាភិបាលក្នុងតំបន់នានានៅប្រទេសចិន ហាក់មានភាពយឺតយ៉ាវក្នុងការខិតខំប្រឹងប្រែងជាក់ស្តែងក្នុងការជួយជំរុញកំណើននៃវិស័យ អចលនទ្រព្យនៅក្នុងមូលដ្ឋានរបស់ពួកគេ។ ការិយាល័យស្ថិតិជាតិចិន បានឱ្យដឹងថា គិតត្រឹមខែកក្កដា ឆ្នាំ២០២៤ តម្លៃលំនៅឋាននៅក្នុងទីក្រុងធំៗចំនួន៧០នៅទូទាំងប្រទេស បានបន្តធ្លាក់ចុះក្នុងរយៈពេល១៤ ខែជាប់ៗគ្នា ខណៈដែលអត្រានៃការលក់របស់ក្រុមហ៊ុនអភិវឌ្ឍន៍ធំៗទាំង១00 របស់ប្រទេសនេះបានធ្លាក់ចុះរហូតដល់៣៦,៤%។

ដើម្បីឆ្លើយតបនឹងស្ថានភាពអវិជ្ជមាននេះ រដ្ឋាភិបាលនៅតាមតំបន់នានា នៅក្នុងខែកក្កដា កន្លងទៅនេះបានសម្រុកចេញវិធានការដល់ទៅជាង៧០ ដើម្បីបញ្ចេញស្តុកលំនៅឋានដែលបានសាងសង់រួច ក៏ដូចជាដើម្បីបង្កើនសាច់ប្រាក់ងាយស្រួលនៅក្នុងទីផ្សារលំនៅឋាន។ អាជ្ញាធរនៅទីក្រុងប៉េកាំង ណានជីង ឈីងតាវ និងក្វាងចូវជាដើមកំពុងជំរុញការអនុវត្តច្បាប់ ដែលលើកទឹកចិត្តអ្នកស្រុកឱ្យលក់លំនៅឋានចាស់ ដើម្បីយកលុយទៅទិញលំនៅឋានថ្មី ហើយទីក្រុងខ្លះទៀត គឺមានការចេញគោលនយោបាយលើកទឹកចិត្ត តាមរយៈការលុបចោលនូវបទបញ្ញត្តិមួយចំនួន ដើម្បីបើកផ្លូវឱ្យពលរដ្ឋអាចទិញលំនៅឋាននៅតាមទីក្រុង។

ក្រៅពីនោះអាជ្ញាធរក្នុងតំបន់នានា នៅក្នុងប្រទេសចិន ក៏ត្រូវបានគេរាយការណ៍ថា គ្រោងនឹងចេញមូលបត្របំណុលពិសេស ដើម្បីផ្តល់មូលនិធិដល់ការទិញផ្ទះ និងចាក់បញ្ចូលលំហូរសាច់ប្រាក់ទៅក្នុងក្រុមហ៊ុនសាងសង់ដែលកំពុងជួបការលំបាក ដែលជាការផ្លាស់ប្តូរមួយដែលអ្នកវិភាគចាត់ទុកថាមានភាពអំណោយផលដល់កំណើននៃវិស័យនេះ៕

ដោយៈ សរ សុជាតិ