![ប្រាក់ដុល្លារ](https://cdn.cambonomist.com/media/images/tkrtmrvaoythnkry.2e16d0ba.fill-960x540.jpg)
ការដាក់ចេញយន្តការរបស់ធនាគារជាតិនៃកម្ពុជានេះ បានធ្វើឱ្យមានការជជែកក្នុងស្រទាប់មហាជន ដោយអ្នកខ្លះបានលើកឡើងជាចម្ងល់ថា ហេតុអ្វីធនាគារជាតិ ដាក់ឱ្យអនុវត្តតែនៅក្នុងខេត្តសៀមរាប ហើយមិនដាក់ឱ្យអនុវត្តឱ្យបានទូលំទូលាយ អ្នកខ្លះទៀតលើកឡើងថា ការធ្វើបែបនេះអាចធ្វើឱ្យប៉ះពាល់ដល់សេដ្ឋកិច្ច និងប៉ះពាល់ដល់ការជំរុញការប្រើប្រាស់ប្រាក់រៀលជាដើម។ តើការតម្រូវឱ្យគ្រឹះស្ថានធនាគារទទួលប្រាក់ដុល្លារចាស់ និងប្រឡាក់ដោយមិនកាត់ទឹកនេះ វាផ្តល់គុណសម្បត្តិ និងវិបត្តិយ៉ាងណាដល់វិស័យហិរញ្ញវត្ថុ និងសេដ្ឋកិច្ចជាតិ?
អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា យល់ឃើញថា ការដូរក្រដាសប្រាក់ដុល្លារអាម៉េរិកចាស់ៗ ឬប្រឡាក់ ដោយមិនកាត់ទឹកសម្រាប់លុយដែលមានស្រាប់នៅក្នុងស្រុកទំនងជាមិនបង្កផលប៉ះពាល់ធ្ងន់ធ្ងរដល់ប្រាក់រៀលនោះទេ ប៉ុន្តែប្រសិនបើមានការដោះដូរយ៉ាងគំហុកនោះចង់ ឬមិនចង់វាអាចនឹងធ្វើឱ្យប៉ះពាល់ដល់តម្លៃប្រាក់រៀល។ យ៉ាងណាមិញអ្នកជំនាញរូបនេះហាក់បារម្ភពីលំហូរ នៃប្រាក់ដុល្លារចាស់ៗ ឬប្រឡាក់មកពីប្រទេសជិតខាងចូលមកកម្ពុជា ដែលវាអាចនឹងធ្វើឱ្យមានភាពស្មុគស្មាញកាន់តែច្រើន។ តែយ៉ាងណាអ្នកឧកញ៉ាជឿជាក់ថា រាជរដ្ឋាភិបាលអាចគិតគូរលើបញ្ហានេះរួចហើយ មុននឹងដាក់ឱ្យអនុវត្តយន្តការនេះ។
អ្នកឧកញ៉ា លឹម ហេង បានវាយតម្លៃថា ការដាក់ឱ្យអនុវត្តយន្តការឱ្យទទួលយកក្រដាសប្រាក់ដុល្លារអាម៉េរិកចាស់ៗ ឬឡាក់នៅក្នុងខេត្តសៀមរាបនេះ ទំនងជាអាចធ្វើឡើងក្នុងជំហានសាកល្បង ហើយប្រសិនបើការអនុវត្តនេះពុំមានផលប៉ះពាល់ដល់ចរន្តសេដ្ឋកិច្ច នោះរដ្ឋាភិបាលអាចនឹងពង្រីកដល់រាជធានីភ្នំពេញ និងខេត្តគោលដៅទេសចរណ៍សំខាន់ៗមួយចំនួនទៀត។
ដោយឡែកលោក កាំង តុងងី ប្រធាននាយកដ្ឋានទំនាក់ទំនង និងជាអ្នកនាំពាក្យសមាគមមីក្រូហិរញ្ញវត្ថុកម្ពុជា យល់ឃើញថា ការជួយសម្រួល ការប្ដូរក្រដាសប្រាក់ដុល្លារអាម៉េរិកចាស់ៗ ឬប្រឡាក់ នៅក្នុងខេត្តសៀមរាប អាចគ្រាន់តែជាដំណោះស្រាយរយៈពេលខ្លីប៉ុណ្ណោះ។ យ៉ាងណាក៏ដោយអ្នកជំនាញរូបនេះលើកទឹកចិត្តឱ្យពលរដ្ឋខ្មែរគួរផ្ដោតលើការប្រើប្រាស់ប្រាក់រៀល និងការចាយប្រាក់តាមប្រព័ន្ធឌីជីថល ព្រោះវាមិនត្រឹមតែជួយលើកកម្ពស់សេដ្ឋកិច្ចជាតិ ប៉ុណ្ណោះទេ ថែមទាំងជាដំណោះស្រាយយូរអង្វែងដ៏មានប្រសិទ្ធភាព ហើយក៏ជាផ្នែកមួយជួយកាត់បន្ថយការលាងលុយកខ្វក់នៅកម្ពុជា ផងដែរ។
ពាក់ព័ន្ធការបើកឱ្យទទួលយកក្រដាសប្រាក់ដុល្លារចាស់ៗ ឬប្រឡាក់នេះដែរ កាលពីពេលថ្មីៗ លោកជំទាវ ជា សិរី ទេសាភិបាលធនាគារជាតិនៃកម្ពុជា បានស្នើដល់ធនាគារចិន ប្រចាំទីក្រុងហុងកុងជួយសម្រួល និងបន្ធូរបន្ថយលក្ខណៈវិនិច្ឆ័យក្នុងការស្រាល់ជ្រើសក្រដាសប្រាក់ដុល្លារអាម៉េរិកពីកម្ពុជា និងបន្ទាបកម្រៃសេវា។ ជាការឆ្លើយតប ធនាគារកណ្តាលចិន បានទទួលសំណូមពរនេះ ហើយបញ្ជាក់ថានឹងយកសំណើនេះទៅពិភាក្សាជាមួយក្រុមការងាររបស់លោកបន្តទៀត។
ជាមួយគ្នានេះធនាគារជាតិនៃកម្ពុជា កំពុងអភិវឌ្ឍន៍កម្មវិធីទូរសព្ទ បាគង សម្រាប់ទេសចរ (Bakong Tourists App) ដែលគ្រោងដាក់ឱ្យដំណើរការក្នុងពេលឆាប់ៗខាងមុខនេះ ដើម្បីរួមចំណែកជួយជំរុញវិស័យទេសចរណ៍នៅកម្ពុជា តាមរយៈការជួយសម្រួលឱ្យភ្ញៀវអន្តរជាតិ អាចធ្វើប្រតិបត្តិការទូទាត់ឌីជីថលបានកាន់តែងាយស្រួល។
ធនាគារជាតិ រំពឹងថា កម្មវិធីនេះនឹងក្លាយជាផលិតផលទេសចរថ្មីមួយទៀត ដើម្បីបង្កើនភាពទាក់ទាញដល់ភ្ញៀវអន្តរជាតិ មកទស្សនាកម្ពុជា បន្ថែមពីផលិតផលទេសចរវប្បធម៌ ប្រពៃណី ប្រវត្តិសាស្ត្រ និងធម្មជាតិ ដែលមានស្រាប់។ ជាពិសេសវានឹងជួយលើកកម្ពស់កិត្យានុភាពជាតិ មួយកម្រិតទៀត តាមរយៈការផ្តល់ឱ្យភ្ញៀវអន្តរជាតិ នូវបទពិសោធន៍នៃការទូទាត់តាមឌីជីថលថ្មី ទំនើប និងជឿនលឿន៕
អត្ថបទ៖ បូ ដូឡា