តើមានកត្តាអ្វីធ្វើឱ្យការប្រមូលចំណូលក្នុងវិស័យល្បែងពាណិជ្ជកម្មសម្រេចបានលើសផែនការ នៅឆមាសទី១ឆ្នាំនេះ?

ឯកឧត្តម រស់ ភីរុណ អគ្គលេខាធិការនៃគណៈកម្មការគ្រប់គ្រងល្បែងពាណិជ្ជកម្មកម្ពុជា បានគូសបញ្ជាក់ប្រាប់ខេមបូណូមីសថា ការប្រមូលចំណូលក្នុងវិស័យល្បែងពាណិជ្ជកម្មនៅកម្ពុជា ក្នុងឆមាសទី១ឆ្នាំនេះ សម្រេចបានជាង២៤លានដុល្លារ ស្មើនឹងជាង៥៦% នៃច្បាប់ថវិកាកំណត់នៅឆ្នាំនេះ ដែលតម្រូវឱ្យប្រមូលចំណូលឱ្យបានជាង៤៣លានដុល្លារ។ បើធៀបនឹងការប្រមូលចំណូលក្នុងរយៈពេលដូចគ្នាកាលពីឆ្នាំមុន ចំនួននេះមានការកើនឡើងរហូតដល់ជិត២០០% ឯណោះ។

តាមរយៈលទ្ធផលដែលទទួលបាននៅឆមាសទី១នេះ បានជំរុញឱ្យថ្នាក់ដឹកនាំរូបនេះ ជឿជាក់ថា ការប្រមូលចំណូលនៅឆ្នាំនេះទំនងជាអាចសម្រេចបានគ្រប់តាមផែនការដែលកំណត់ដោយច្បាប់ស្តីពីការគ្រប់គ្រងថវិកាឆ្នាំ២០២៤។

​បើតាមឯកឧត្តម រស់ ភីរុណ កត្តាដែលធ្វើឱ្យការប្រមូលចំណូលក្នុងវិស័យល្បែងពាណិជ្ជកម្មកម្ពុជា មានការកើនឡើងនៅឆមាសទី១នេះ គឺដោយសារការកើនឡើងនូវចំនួនភ្ញៀវទេសចរអន្តរជាតិ ដែលបានចូលមកលេងកម្សាន្តនៅតាមកាស៊ីណូនានា មានការកើនឡើង។ គួបផ្សំតាមរយៈការខិតខំពង្រឹងការគ្រប់គ្រងរបស់វិស័យនេះ តាមរយៈច្បាប់ស្តីពីការគ្រប់គ្រងល្បែងពាណិជ្ជកម្ម។

​សូមជម្រាបថា យោងតាមរបាយការណ៍ក្រសួងទេសចរណ៍ នៅឆមាសទី១ ឆ្នាំ២០២៤នេះ កម្ពុជាទទួលបានភ្ញៀវទេសចរអន្តរជាតិ ប្រមាណជាង៣,១លាននាក់ មានការកើនឡើងប្រមាណជាង២២% បើធៀបនឹងរយៈពេលដូចគ្នាកាលពីឆ្នាំមុន ប៉ុន្តែមានការធ្លាក់ចុះប្រមាណ៦% បើធៀបនឹងរយៈពេលដូចគ្នាក្នុងឆ្នាំ២០១៩ មុនពេលមានវិបិត្តិកូវីដ-១៩៕