សាធារណៈរដ្ឋឆែក បានក្លាយជាប្រទេសទី៣ ដែលមិនទទួលយកលិខិតឆ្លងដែនថ្មីរវៀតណាមបន្ទាប់ពីប្រទេសអាល្លឺម៉ង់ និងអេស្ប៉ាញ។ ការសម្រេចមិនទទួលយកនេះ ត្រូវបានស្ថានទូតសាធារណៈឆែកប្រចាំប្រទេសវៀតណាមអះអាងថា នឹងត្រូវចូលជាធរមានចាប់ពីថ្ងៃជូនដំណឹងនេះតទៅ ប៉ុន្ដែ ស្ថានទូតមិនបានបញ្ជាក់ច្បាស់លាស់ថាតើ លិខិតឆ្លងដែនថ្មីរបស់វៀតណាមនេះ មានការខុសស្ដង់ដារបច្ចេកទេសរបស់អង្គការអាកាសចរស៊ីវិលអន្តរជាតិត្រង់ចំណុចណានៅឡើយទេ។
អត្ថបទគួរអាន
បើតាមការណែនាំរបស់អង្គការអាកាសចរស៊ីវិលអន្តរជាតិ អំពីស្ដង់ដារបច្ចេកទេសលិខិតឆ្លងដែន គឺមានតម្រូវឲ្យមានបំពេញព័ត៌មានដូចជា ប្រភេទលិខិតឆ្លងដែន ឈ្មោះ លេខលិខិតឆ្លងដែន ថ្ងៃខែឆ្នាំកំណើត ភេទ និងថ្ងៃផុតកំណត់លិខិតឆ្លងដែនជាដើម។
តំណាងនាយកដ្ឋានអន្តោប្រវេសន៍ នៃក្រសួងសន្ដិសុខសាធារណៈវៀតណាម បានបញ្ជាក់នាពេលថ្មីៗនេះថា គំរូលិខិតឆ្លងដែនថ្មីរបស់វៀតណាម អនុលោមតាមបទប្បញ្ញត្តិ និងការអនុវត្តជាអន្តរជាតិ ហើយបញ្ហាដែលកើតឡើងនឹងត្រូវផ្ដល់អាទិភាពសម្រាប់ការដោះស្រាយតាមរយៈបណ្ដាញការទូត។
សូមបញ្ជាក់ថា លិខិតឆ្លងដែនថ្មីរបស់វៀតណាម បានចាប់ផ្ដើមដាក់ឲ្យប្រើប្រាស់តាំងពីថ្ងៃទី ១កក្កដា ឆ្នាំនេះ ហើយលិខិតឆ្លងដែនចាស់ ដែលមានក្របពណ៌បៃតងនោះ នឹងត្រូវបន្ដប្រើប្រាស់ដល់ផុតសុពលភាពរបស់វា ពោលគឺមិនមានការតម្រូវឲ្យមកប្ដូរយកថ្មីនោះឡើយ៕
