របាយការណ៍ស្ថានភាពសេដ្ឋកិច្ចពិភពលោក និងទស្សនវិស័យសម្រាប់ឆ្នាំ២០២៤ របស់អង្គការសហប្រជាជាតិ បានព្យាករថា សហរដ្ឋអាម៉េរិក ដែលជាប្រទេសមានសេដ្ឋកិច្ចធំជាងគេលើពិភពលោក នឹងមានការធ្លាក់ចុះនៃកំណើនផលិតផលក្នុងស្រុកសរុបពី២,៥% ក្នុងឆ្នាំ២០២៣ មកត្រឹម១,៤% ក្នុងឆ្នាំ២០២៤ ខណៈដែលពលរដ្ឋបន្តរឹតត្បិតលើការចំណាយ អត្រាការប្រាក់នៅតែខ្ពស់ និងទីផ្សារការងារនៅមានកម្រិត។
ទន្ទឹមគ្នានេះ សេដ្ឋកិច្ចរបស់ប្រទេសចិន ដែលជាមហាអំណាចសេដ្ឋកិច្ចលំដាប់ទី២របស់ពិភពលោក ក៏នឹងប្រឈមមុខនឹងការថមថយសេដ្ឋកិច្ចផងដែរនៅឆ្នាំនេះ។ នៅឆ្នាំ២០២៣ កន្លងទៅ ចិនអាចសម្រេចបានកំណើនប្រមាណ៥,៣% តែនៅឆ្នាំ២០២៤ នឹងថយមកនៅត្រឹម៤,៨%វិញ ។
ជាមួយគ្នានេះ សេដ្ឋកិច្ចនៅអឺរ៉ុប និងជប៉ុន ក៏នឹងប្រឈមមុខនឹងបញ្ហាសេដ្ឋកិច្ចដ៏សំខាន់ផងដែរ ដែលបង្កដោយវិបត្តិសកលនានា ក្នុងនោះអត្រាកំណើនសេដ្ឋកិច្ចនៅអឺរ៉ុប និងជប៉ុន ត្រូវបានអង្គការសហប្រជាជាតិថព្យាករថា នឹងមានកំណើនត្រឹម១,២% ប៉ុណ្ណោះ នៅឆ្នាំ២០២៤។
អត្ថបទគួរអាន
បញ្ហាប្រឈមរបស់ប្រទេសធំៗទាំងនេះ បានជំរុញឱ្យអង្គការសហប្រជាជាតិ ព្យាករជារួមថា កំណើនសេដ្ឋកិច្ចសកលដែលរំពឹងអាចសម្រេចបាន២,៧% នៅឆ្នាំ២០២៣ នឹងបន្តថមថយចុះមកនៅត្រឹម២,៤% នៅក្នុងឆ្នាំ២០២៤ ដែលបណ្តាលមកពីផលប៉ះពាល់ដែលបន្តសេសសល់ពីវិបត្តិនៃជំងឺកូវីដ-១៩ និងការកើនឡើងកម្រិតបំណុលសកល និងបញ្ហាភាពតានតឹងភូមិសាស្ត្រនយោបាយសកលផ្សេងៗ។
ទន្ទឹមនឹងបន្ទាបការព្យាករកំណើនសេដ្ឋកិច្ចសកល អង្គការសហប្រជាជាតិបានព្យាករពីស្ថានភាពដ៏វិជ្ជមានមួយពីការថមថយនៃកម្រិតអតិផរណា។ UN ព្យាករថា អត្រាអតិផរណាសកល ដែលជាក្តីបារម្ភសំខាន់ក្នុងរយៈពេលពីរឆ្នាំកន្លងមកនេះ កំពុងបង្ហាញសញ្ញានៃភាពធូរស្រាលជាមួយការរំពឹងនឹងធ្លាក់ចុះពី៨,១% ក្នុងឆ្នាំ២០២២ មកនៅត្រឹម៥,៧%ក្នុងឆ្នាំ២០២៣ នឹងបន្ត ធ្លាក់ចុះមកត្រឹម៣,៩% នៅឆ្នាំ២០២៤។
ប៉ុន្តែទោះជាយ៉ាងណាក៏ដោយ អតិផរណាតម្លៃស្បៀងនៅតែជាបញ្ហាប្រឈមសំខាន់ ដែលធ្វើឲ្យបញ្ហាអសន្តិសុខស្បៀង និងភាពក្រីក្រកើតមានកាន់តែធ្ងន់ធ្ងរ ជាពិសេសនៅក្នុងប្រទេសកំពុងអភិវឌ្ឍន៍ ក្នុងនោះមនុស្សប្រមាណ២៣៨លាននាក់ត្រូវបានគេព្យាករថា នឹងជួបប្រទះនូវបញ្ហាអសន្តិសុខស្បៀងធ្ងន់ធ្ងរបន្ថែមមួយកម្រិតទៀត៕
ដោយៈ សរ សុជាតិ
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
