តើមានកត្តាអ្វីជំរុញឱ្យប្រាក់ចំណេញរបស់ក្រុមហ៊ុន Samsung កើនឡើងជាង១៥ដងនៅត្រីមាសទី២ឆ្នាំនេះ?

ក្រុមហ៊ុន Samsung ដែលផលិតបន្ទះឈីបធំជាងគេបំផុតក្នុងពិភពលោកបានប្រកាសកាលពីថ្ងៃសុក្រសប្ដាហ៍មុនថា ប្រាក់ចំណេញប្រតិបត្តិការរបស់ខ្លួនបានឈានដល់ជាង៧,៥ពាន់លានដុល្លារ នៅត្រីមាសទី២ឆ្នាំនេះ ដោយកើនឡើងជាង១៤៥២% បើធៀបនឹងរយៈពេលដូចគ្នាកាលពីឆ្នាំមុន ខណៈដែលប្រាក់ចំណូលវិញបានកើនឡើងជាង២៣%ឡើងដល់ជាង៥៣ពាន់លានដុល្លារក្នុងពេលដូចគ្នានេះ។

កំណើនប្រាក់ចំណេញនេះបានកើតឡើងស្របពេលក្រុមហ៊ុន Samsung បានព្យាយាមកាត់បន្ថយគម្លាតជាមួយនឹងក្រុមហ៊ុនគូប្រជែងក្នុងស្រុក SK Hynix ដែលផលិតបន្ទះឈីប HBM ប្រើក្នុងកម្មវិធីបញ្ញាសិប្បនិម្មិតកម្រិតខ្ពស់សម្រាប់ក្រុមហ៊ុន Nvidia ដែលមានមូលដ្ឋាននៅទីក្រុង Silicon Valley សហរដ្ឋអាម៉េរិក។

ពេលនេះក្រុមហ៊ុន Samsung កំពុងឆ្លងកាត់ដំណើរការវាយតម្លៃដើម្បីទទួលបានការផ្គត់ផ្គង់បន្ទះឈីប HBM របស់ខ្លួនទៅឱ្យក្រុមហ៊ុន Nvidia ប៉ុន្តែគេមិនទាន់ច្បាស់ថា តើក្រុមហ៊ុន Samsung នឹងអាចជាប់ការធ្វើតេស្តនេះនៅពេលណានោះទេ៕

អត្ថបទ៖ សុខ មង្គល