សិង្ហបុរី បើកឲ្យពលរដ្ឋខ្លួនអាចទទួលទានពពួកសត្វល្អិតចំនួន១៦ប្រភេទ

ប្រទេសសិង្ហបុរី កំពុងធ្វើពិពិធកម្មប្រភពអាហាររបស់ខ្លួន ដើម្បីលើកកម្ពស់ការរក្សាស្ថិរភាពសន្តិសុខស្បៀងនៅក្នុងប្រទេស ស្របពេលដែលអាហារទាំងនេះ បណ្តាប្រជាជាតិនានា នៅក្នុងតំបន់​កំពុងតែទទួលទាន។ សារព័ត៌មាន Nikkei បានរាយការណ៍ថា ទីភ្នាក់ងារម្ហូបអាហារសិង្ហបុរី នៅសប្តាហ៍នេះ បានអនុម័តបើកទ្វារឲ្យមានការនាំចូលនូវប្រភេទសត្វល្អិតចំនួន១៦ប្រភេទ ដោយរួមទាំងចង្រិត កណ្តូប ដង្កូវនាង និងសត្វឃ្មុំជាដើម។

ទីភ្នាក់ងារនេះ បាននិយាយនៅក្នុងសារាចរណ៍ ដែលចេញផ្សាយកាលពីថ្ងៃចន្ទថា សិង្ហបុរីនឹងអនុញ្ញាតឱ្យមានការនាំចូលសត្វល្អិត ផលិតផលដែលផលិតពីសត្វល្អិត ដោយអាចមានក្នុងទម្រង់ជាគ្រឿងផ្សំ និងពពួកអាហារសម្រន់ ដោយអះអាងថា ពពួកសត្វល្អិតទាំង១៦ប្រភេទនោះ គឺជាប្រភពផ្គត់ផ្គងប្រូតេអ៊ីនដ៏មាននិរន្តរភាព។

ប្រភពដដែលបានបន្តថា ដើម្បីធានាបាននូវសុវត្ថិភាព គោលការណ៍ណែនាំថ្មីចែងថា អាជីវករត្រូវតែបញ្ជាក់ថា ពពួកសត្វល្អិតមិនត្រូវបានប្រមូលផលពីព្រៃធម្មជាតិ និងមានស្តង់ដាអនាម័យត្រឹមត្រូវ។

ក្នុងនាមជាប្រទេសតូចមួយដែលមានដី មានកម្រិតសម្រាប់ការធ្វើកសិកម្ម សិង្ហបុរីកំពុងស្វែងរកការពង្រឹងសន្តិសុខស្បៀងរបស់ខ្លួន។ ការព្រួយបារម្ភលើបញ្ហានេះកាន់តែមានភាពលេចធ្លោក្នុងប៉ុន្មានឆ្នាំថ្មីៗនេះ ក្រោយពិភពលោកប្រឈមនឹងភាពតានតឹងផ្នែកភូមិសាស្ត្រនយោបាយ និងការប្រែប្រួលអាកាសធាតុ៕

ដោយៈ សរ សុជាតិ