ត្រឹម៦ខែពលរដ្ឋសិង្ហបុរី ខាតបង់ថវិកាអស់២៩៥លានដុល្លារ ដោយសារករណីឆ.បោកតាមប្រព័ន្ធអនឡាញ

បើយោងតាមការចុះផ្សាយរបស់សារព័ត៌មាន The Straits Times យ៉ាងហោយណាស់ពលរដ្ឋសិង្ហបុរីបានខាតបង់ថវិកាអស់ប្រមាណ២៩៥លានដុល្លារ ដោយសារករណីឆបោកតាមប្រព័ន្ធអនឡាញជាង២ម៉ឺន៦ពាន់ករណី ដែលបានកើតឡើងនៅឆមាសទី១ឆ្នាំនេះ។ ការព្យាករមួយបានព្រមានថា ទំហំនៃការខាតបង់ដោយសារករណីឆបោកអាចឡើងដល់ជាង៥៩០លានដុល្លារ ត្រឹមដំណាច់ឆ្នាំនេះ។

សមត្ថកិច្ចសិង្ហបុរី បានអះអាងថា ទឹកប្រាក់ទាំងនេះ ត្រូវបានក្រុមឧក្រិដ្ឋជនបោកប្រាស់តាមរយៈការកេងចំណេញពីប្រតិបត្តិការដែលគ្មានសុវត្ថិភាពដូចជាការធ្វើពាណិជ្ជកម្មតាមប្រព័ន្ធអនឡាញ ការវិនិយោគ និងការស្វែងរកការងារធ្វើតាមអនឡាញ និងការក្លែងបន្លំជាមន្ត្រីរដ្ឋាភិបាលជាដើម។

របាយការណ៍បានឲ្យដឹងថា ការបោកប្រាស់តាមការអន្ទងឱ្យបោះទុនវិនិយោគមានទំហំប្រមាណជា ១២,៥% នៃករណីទាំងអស់ ដែលបណ្តាលឱ្យមានការខាតបង់ទឹកប្រាក់ប្រមាណ១០២លានដុល្លារ ពោលគឺមួយករណីអាចមានទឹកប្រាក់ជាមធ្យមជាង៣ម៉ឺនដុល្លារ។

ដោយឡែកការបោកប្រាស់តាមទម្រង់រកការងារធ្វើ គឺមានរហូតដល់២១% នាំឱ្យមានការខាតបង់សេដ្ឋកិច្ចប្រមាណជា៦៦លានដុល្លារ ដែលជាមធ្យម គឺជាង១ម៉ឺនដុល្លារក្នុងមួយករណី។ ជាមួយគ្នានេះ ការបោកប្រាសតាមរយៈការក្លែងខ្លួនជាមន្រ្តីរដ្ឋាភិបាលមានចំនួន ២,១៨% ដោយធ្វើឱ្យជនរងគ្រោះខាតបង់ថវិកាអស់ជិត៥២លានដុល្លារ ដោយមួយករណីមានទំហំជិត៩ម៉ឺនដុល្លារ។

សារព័ត៌មាន Nikkei Asia បានរាយការណ៍ថា មធ្យោបាយបោកប្រាស់ដែលឧក្រិដ្ឋជននិយមប្រើប្រាស់គឺ តាមបណ្តាញសង្គម ដែលមានតាំងពី Facebook, Instagram, Telegram, WeChat និង WhatsApp ជាដើម ខណៈក្រសួងមហាផ្ទៃ សិង្ហបុរី កំពុងសិក្សាអំពីវិធានការដែលត្រូវដោះស្រាយ៕

ដោយៈ សរ សុជាតិ