ប្រទេសនៅអាស៊ានមួយចំនួនរួមទាំងកម្ពុជា គាំទ្រឱ្យហុងកុងចូលរួមក្នុងកិច្ចព្រមព្រៀង RCEP

ក្រោយពីបញ្ចប់ទស្សនកិច្ចនៅប្រទេសវៀតណាម កម្ពុជា និងឡាវ លោក ចន លី មេដឹកនាំក្រុងហុងកុង បានប្រាប់អ្នកសារព័ត៌មានថា ប្រទេសទាំង៣នេះ បានគាំទ្រក្រុងហុងកុង ក្នុងការចូលជាសមាជិកនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) ដែលជាកតិកាសញ្ញាពាណិជ្ជកម្មដ៏ធំបំផុតនៅលើពិភពលោក ដែលមានប្រទេសចំនួន១៥ជាសមាជិក។

លោក លី ក៏បានប្រើទស្សនកិច្ចរបស់លោក ដែលបានបិទបញ្ចប់នៅទីក្រុងហូជីមិញ ដើម្បីជំរុញគំនិតផ្តួចផ្តើមខ្សែក្រវាត់ និងផ្លូវ (BRI) របស់ទីក្រុងប៉េកាំង ពិភាក្សាអំពីការពង្រីកទិដ្ឋាការ និងការិយាល័យពាណិជ្ជកម្មនៅក្នុងតំបន់ និងជំរុញវិស័យថ្មីៗមួយចំនួនដូចជាវិស័យបច្ចេកវិទ្យាផងដែរ។

បើតាមការលើកឡើងរបស់ថ្នាក់ដឹកនាំរូបនេះ ក្រុងហុងកុង បានទទួលការចង្អុលបង្ហាញយ៉ាងច្បាស់ម្តងទៀតអំពីការគាំទ្រពីរដ្ឋាភិបាលទាំង៣នេះ សម្រាប់ការចូលរួមជាមួយនឹងកិច្ចព្រមព្រៀង RCEP ឱ្យបានឆាប់រហ័ស។

ទោះបីជាទីក្រុងប៉េកាំង កំពុងបង្កើនការគ្រប់គ្រងរបស់ខ្លួនទៅលើទីក្រុងហុងកុង យ៉ាងណាក៏ដោយ ប៉ុន្តែក្រុងហុងកុង បានរក្សាស្វ័យភាពមួយចំនួនរួមទាំងគោលនយោបាយពាណិជ្ជកម្មផងដែរ។

គួរបញ្ជាក់ថា លោក លី គឺជាមេដឹកនាំលើកដំបូងរបស់ទីក្រុងហុងកុង ដែលបានធ្វើទស្សនកិច្ចនៅប្រទេសទាំង៣ខាងលើ ខណៈទីក្រុងហុងកុង បានបន្តស្វែងរកប្រជាប្រិយភាពនៅបរទេសបន្ទាប់ពីមុខមាត់របស់ទីក្រុងនេះ បានស្រអាប់ដោយសារការបិទខ្ទប់ជំងឺកូវីដ និងច្បាប់សន្តិសុខឆ្នាំ២០២០ របស់ក្រុងប៉េកាំង បន្ទាប់ពីមានការតវ៉ាគាំទ្រលទ្ធិប្រជាធិបតេយ្យ៕

អត្ថបទ៖ សុខ មង្គល