Suzuki គឺជាក្រុមហ៊ុនផលិតរថយន្តដំបូងគេ ដែលបានបង្កើតរោងចក្រដំឡើងរថយន្តរបស់ខ្លួននៅប្រទេសមីយ៉ាន់ម៉ា ប៉ុន្តែឥឡូវក្រុមហ៊ុននេះ បានសម្រេចចិត្តផ្អាកការផលិតរបស់ខ្លយន ចាប់តាំងពីថ្ងៃទី០១ ខែកក្កដាមកម្ល៉េះ ដោយសារមានការលំបាកក្នុងការប្តូររូបិយបណ្ណបរទេសទៅជាប្រាក់ខ្យាត (Kyat) របស់មីយ៉ាន់ម៉ា។ នេះបើតាមការបញ្ជាក់របស់ក្រុមហ៊ុន Suzuki នៅក្នុងកាសែតជប៉ុន Nikkei Asia ។
នៅមុនថ្ងៃទី០១ ខែកក្កដា ក្រុមហ៊ុន Suzuki បានកាត់បន្ថយផលិតកម្មនៅក្នុងប្រទេសនេះដោយប្រើប្រាស់គ្រឿងបន្លាស់ដែលនាំចូលដែលមាននៅក្នុងឃ្លាំងស្ដុករបស់ខ្លួនតែប៉ុណ្ណោះ។ ទោះជាយ៉ាងណា អ្នកតំណាងម្នាក់របស់ក្រុមហ៊ុន Suzuki បាននិយាយថា ពួកគេអស់ឥវ៉ាន់ពីក្នុងស្តុកហើយ ហើយវាកាន់តែពិបាកក្នុងការបន្តការផលិតរថយន្តថែមទៀត។
អ្នកតំណាងរូបនោះបានបញ្ជាក់ថា បុគ្គលិកនៅផ្នែកផលិតកម្មនឹងគ្មានអ្វីត្រូវធ្វើនោះទេ ដោយអនុញ្ញាតឱ្យពួកគេប្រចាំការនៅផ្ទះសិន។ នៅពេលមានការងារធ្វើ ពួកគេនឹងបន្តធ្វើការងាររបស់ពួកគេជាបន្តទៀត។
រោងចក្រដំឡើងរថយន្តមួយចំនួនរបស់ក្រុមហ៊ុន Suzuki បានបិទទ្វារអស់រយៈពេល ៩ ខែមកហើយបន្ទាប់ពីយោធាបានដណ្តើមអំណាចកាលពីខែកុម្ភៈ ឆ្នាំ២០២១។ នៅប្រទេសមីយ៉ាន់ម៉ា ក្រុមហ៊ុន Suzuki បានប្រើវិធីសាស្ត្រផលិតពាក់កណ្តាលសម្រេចពោល គឺគ្រាន់តែធ្វើការផ្គុំដំឡើងរថយន្តសម្រេចចុងក្រោយតែប៉ុណ្ណោះនៅទីនោះ។
បន្ទាប់មកការលក់នៅក្នុងស្រុកត្រូវបានធ្វើឡើងជាប្រាក់ក្យាតដែលត្រូវតែបំប្លែងទៅជាប្រាក់ដុល្លារដើម្បីទិញគ្រឿងបន្លាស់ពីបរទេស។ ប៉ុន្តែការកាន់កាប់ដោយរបបយោធាបានបណ្តាលឱ្យមានការខ្វះខាតរូបិយបណ្ណបរទេស និងធ្វើឱ្យមានការលំបាកក្នុងការនាំចូលគ្រឿងបន្លាស់។
អត្ថបទគួរអាន
កង្វះរូបិយបណ្ណរបស់មីយ៉ាន់ម៉ាកាន់តែអាក្រក់ទៅៗនៅពេលនេះ ខណៈដែលការវិនិយោគបរទេស និងជំនួយអន្តរជាតិកំពុងរីងស្ងួត។ ប្រការនេះបានធ្វើឱ្យអាជ្ញាធរយោធាបង្កើនវិធានការទប់ស្កាត់ការនាំចូល។ ក្នុងនោះ មានវិធានការមួយ គឺត្រូវចាត់ថ្នាក់រថយន្តជា «ទំនិញប្រណិត» ដែលរារាំងក្រុមហ៊ុនផលិតមិនអាចទទួលបានការបែងចែករូបិយបណ្ណបរទេស ដើម្បីនាំចូលបានទេ។
ជាងនេះទៅទៀតគឺការចេញអាជ្ញាប័ណ្ណនាំចូលសម្រាប់រថយន្តសម្រេចត្រូវបានផ្អាកកាលពីខែតុលា ហើយកាលពីខែមេសា ធនាគារកណ្តាលប្រទេសមីយ៉ាន់ម៉ាបានរឹតបន្តឹងការគ្រប់គ្រងរូបិយបណ្ណបរទេសដោយបញ្ជាឱ្យប្ដូរប្រាក់ជាដាច់ខាតនូវរាល់ប្រាក់បញ្ញើជារូបិយបណ្ណបរទេសឱ្យទៅជាប្រាក់ក្យាតដើម្បីរក្សាតម្លៃនៃរូបិយវត្ថុក្នុងស្រុក។
ក្រុមហ៊ុន Suzuki បានចាប់ផ្តើមផលិតកម្មនៅក្នុងប្រទេសមីយ៉ាន់ម៉ាមុនដៃគូប្រកួតប្រជែងរបស់ខ្លួនជាច្រើនទៀត។ ក្រុមហ៊ុននេះលក់រថយន្តបានចំនួនប្រមាណ ១ម៉ឺន៣ពាន់គ្រឿងក្នុងឆ្នាំ២០១៩ ដោយគ្រប់គ្រងបាន៦០% នៃទីផ្សាររថយន្តថ្មីនៅប្រទេសនេះ។ ក៏ប៉ុន្ដែ ដោយសារតែ ការបិទរោងចក្ររបស់ខ្លួន ក្រុមហ៊ុននេះ កាលពីឆ្នាំ២០២១ លក់រថយន្ដបានតែប្រហែល ៣ពាន់៦រយគ្រឿងប៉ុណ្ណោះ៕
អត្ថបទ៖ សុខ ជា
