រហូតមកទល់ពេលនេះ នាយករដ្ឋមន្ត្រីថៃ លោក ស្រ៊ីថា ថាវីស៊ីន បានចូលរួមជាអធិបតីក្នុងកិច្ចប្រជុំបែបនេះចំនួនពីរលើករួចមកហើយ ក្នុងគោលបំណងពិភាក្សាអំពីបញ្ហាសេដ្ឋកិច្ច ដែលវិស័យសាធារណៈ និងឯកជនក្នុងប្រទេសនេះកំពុងប្រឈមមុខ។ ប្រភពច្បាស់ការបានទម្លាយឱ្យដឹងថា នាយករដ្ឋមន្ត្រីថៃ នឹងចូលរួមជាអធិបតីក្នុងកិច្ចប្រជុំជាមួយរដ្ឋមន្ត្រីសេដ្ឋកិច្ចនៅថ្ងៃទី១៥ ខែកក្កដា សប្ដាហ៍ក្រោយ ដើម្បីពិភាក្សាលើការដោះស្រាយបន្ទាន់ពាក់ព័ន្ធបញ្ហាការកើនឡើងបំណុលគ្រួសាររបស់ពលរដ្ឋ ក៏ដូចជាឥណទានមិនដំណើរការ ឬកម្ចីខូចនៅក្នុងវិស័យជាច្រើន។
ធនាគារកណ្ដាលថៃ បានរាយការណ៍មុននេះថា បំណុលគ្រួសារពលរដ្ឋថៃ គិតត្រឹមត្រីមាសទី៤ ចុងឆ្នាំ២០២៣ មានទំហំរហូតដល់ទៅជាង៩១%នៃផលិតផលក្នុងស្រុកសរុប (GDP) របស់ប្រទេសថៃ ដោយជាង៦៧%នៃបំណុលទាំងនោះ គឺជាកម្ចីផ្ទាល់ខ្លួន និងបំណុលបណ្ណឥណទានដែលមិនទាន់ទូទាត់សង។
កាលពីខែមេសា កន្លងទៅ ធនាគារកណ្ដាលថៃ ក្រោមកិច្ចសហការជាមួយក្រុមប្រឹក្សាជាតិ អភិវឌ្ឍន៍សេដ្ឋកិច្ច និងសង្គម បានចាប់ផ្តើមដាក់ចេញកម្មវិធីរៀបចំឥណទានឡើងវិញ សម្រាប់អ្នកដែលមានបញ្ហាបំណុលរយៈពេលវែង ក្នុងគោលបំណងជួយឱ្យពួកគេមានលទ្ធភាពសងបំណុលក្នុងរយៈពេល៥ឆ្នាំ ជាមួយនឹងអត្រាការប្រាក់មិនឱ្យលើសពី១៥% ក្នុង១ឆ្នាំ។ ជាលទ្ធផលពលរដ្ឋប្រមាណ១៤ម៉ឺន៣ពាន់នាក់ ដែលមានបំណុលរួមបញ្ចូលគ្នាប្រមាណ២៨៣លានដុល្លារអាម៉េរិក បានដាក់ពាក្យស្នើសុំប្រើកម្មវិធីរៀបចំឥណទានឡើងវិញនេះ។
ទន្ទឹមនឹងនេះ ការិយាល័យជាតិ ឥណទាន (NCB) បានរាយការណ៍ថា ចំនួនឥណទានមិនដំណើរការ ឬកម្ចីខូចក្នុងរយៈពេល៥ខែដើមឆ្នាំ២០២៤ នេះមានទំហំជាង៣១ពាន់លានដុល្លារអាម៉េរិក បើធៀបនឹង៣០ពាន់លានដុល្លារអាម៉េរិក ក្នុងអំឡុងវិបត្តិកូវីដ-១៩។
ឥណទានមិនដំណើរការ ឬកម្ចីខូចថ្មីៗនៅក្នុងខែឧសភា បានកើនឡើង៣,២% ពីខែមេសា ហើយបានកើនឡើង១១,៣% បើធៀបនឹងឆ្នាំមុន។ ហើយភាគច្រើននៃឥណទានមិនដំណើរការទាំងនេះ គឺចេញពីឥណទានរថយន្ត ឥណទានលំនៅឋាន ឥណទានសហករណ៍ និងបណ្ណឥណទាន។
ការិយាល័យជាតិឥណទាន (NCB បានគូសបញ្ជាក់ថា ឥណទានមិនដំណើរការ ឬកម្ចីខូចពីឥណទានរថយន្តបានកើនឡើងខ្លាំងជាងគេបំផុតរហូតដល់ទៅ៣០% ឈានដល់៦,៩ពាន់លានដុល្លារអាម៉េរិក ដែលសរុបជាគណនីមានជាង៨សែនគណនី៕
ដោយ: តែម សុខុម
