ចិន និងវៀតណាមគ្រោងជំរុញការតភ្ជាប់ផ្លូវដែក ពេលមេដឹកនាំកំពូលនៃប្រទេសទាំងពីរជួបគ្នាជាថ្មី

លោក តូ ឡឹម អគ្គលេខាធិការបក្សកុម្មុយនីស្តវៀតណាមដែលទើបតែជ្រើសតាំងថ្មីនឹងធ្វើដំណើរទស្សនៈកិច្ចផ្លូវការនៅប្រទេសចិននៅសប្តាហ៍ក្រោយនេះ ក្នុងនោះការតភ្ជាប់ផ្លូវដែករវាងប្រទេសទាំងពីរត្រូវបានគេមើលឃើញថា ទំនងក្លាយជារបៀបវារៈកំពូលមួយក្នុងជំនួបពិភាក្សាការងាររវាងមេដឹកនាំវៀតណាមជាមួយលោក ស៊ី ជិនពីង។ សារព័ត៌មានធំៗបានចុះផ្សាយថា នៅពេលនេះវៀតណាមកំពុងស្វះស្វែងរកកញ្ចប់មូលនិធិដែលមានតម្លៃរហូតដល់ទៅ៧០ពាន់លានដុល្លារ ដើម្បីជំរុញ និងពង្រីកសក្តានុពលដឹកជញ្ជូនតាមផ្លូវដែកចម្ងាយ១ពាន់៥រយគីឡូម៉ែត្ររបស់ខ្លួន។

បច្ចុប្បន្នវៀតណាមត្រូវបានគេដឹងថា មានបណ្តាញផ្លូវដែកពីរ ដែលតភ្ជាប់ពីភាគខាងត្បូងប្រទេសចិនទៅកាន់រដ្ឋធានីហាណូយ និងមួយខ្សែរទៀតទៅមជ្ឈមណ្ឌលឧស្សាហកម្មភាគខាងជើង ប៉ុន្តែហេដ្ឋារចនាសម្ព័ន្ធផ្លូវដែកដែលវៀតណាមកំពុងប្រើ គឺជាសំណង់ហេដ្ឋារចនាសម្ព័ន្ធដែលបានបន្សល់ទុកតាំងពីសម័យ អាណានិគមនិយមបារាំង។

ពាក់ព័ន្ធនឹងផ្លូវដែកនេះ នៅក្នុងដំណើរទស្សនៈកិច្ចរបស់លោក ស៊ី ជិនពីង ទៅកាន់ទីក្រុងហាណូយ កាលពីខែធ្នូ ឆ្នាំ២០២៣ កន្លងទៅ ភាគីទាំងពីរបានចុះហត្ថលេខាលើអនុស្សរណៈនៃការយោគយល់គ្នាចំនួនពីររួចហើយ ដើម្បីជំរុញកិច្ចសហប្រតិបត្តិការផ្លូវដែក ដូច្នេះនៅពេលដែលលោក តូ ឡឹម ចេញទៅចិនលើកនេះ មានការទស្សន៍ទាយថា លោកនឹងយកឱកាស នៃដំណើរទស្សនៈកិច្ចលើកទី១នៅបរទេសចាប់តាំងពីក្លាយជាមេដឹកនាំកំពូលវៀតណាមនៅដើម ខែសីហា នេះ ដើម្បីពង្រឹងការអនុវត្តកិច្ចព្រមព្រៀងដែលបានចុះហត្ថលេខា និងឈានទៅសម្រេចបាននូវលទ្ធផលកិច្ចសហប្រតិបត្តិការសំខាន់ៗថ្មីៗ ជាពិសេសក្នុងវិស័យដែលមានផលប្រយោជន៍ទៅវិញទៅមកដូចជាការតភ្ជាប់ផ្លូវដែកជាដើម៕

ដោយៈ សរ សុជាតិ