ការលក់រថយន្តអគ្គិសនីរបស់អាម៉េរិកនឹងកើនកម្រិតខ្ពស់បំផុតនៅឆ្នាំនេះ ប៉ុន្តែនៅចាញ់ចិន និងអាល្លឺម៉ង់

ក្រុមហ៊ុនស្រាវជ្រាវ អេតឡាស បានព្យាករថា វានឹងក្លាយជាលើកដំបូងដែលរថយន្តអគ្គិសនីជាង១លានគ្រឿងត្រូវបានលក់នៅក្នុងទីផ្សារសហរដ្ឋអាម៉េរិកក្នុងពេលពេញមួយឆ្នាំ២០២៣ ហើយវាប្រហែលជានឹងឈានដល់ចន្លោះពីជាង១លាន៣សែនគ្រឿង ទៅដល់ជាង១លាន៤សែនគ្រឿង។ បើទោះបីជាតួលេខនេះបានបង្ហាញពីវឌ្ឍនភាពដ៏អស្ចារ្យមួយសម្រាប់រថយន្តអគ្គិសនីរបស់សហរដ្ឋអាម៉េរិកយ៉ាងណាក៏ដោយ ក៏ការលក់របស់អាម៉េរិកនៅតែមានកម្រិតទាបជាងការលក់រថយន្តដូចគ្នានៅប្រទេសមួយចំនួនដូចជាចិន អាល្លឺម៉ង់ និងន័រវែសជាដើម។

បើតាមទិន្នន័យរបស់សារព័ត៌មាន Bloomberg ដែលចេញផ្សាយកាលពីខែមិថុនា បានបង្ហាញថា ការលក់រថយន្តអគ្គិសនីនៅក្នុងប្រទេសចិន បានឈានដល់៣៣% ហើយការលក់នៅប្រទេសអាល្លឺម៉ង់មានចំនួន៣៥% ខណៈដែលការលក់នៅប្រទេសន័រវែស បានកើនឡើងដល់៩០% នៅក្នុងឆមាសទីមួយឆ្នាំ២០២៣ ដូចគ្នា។ កត្តាដែលជំរុញបង្កើនការលក់រថយន្តអគ្គិសនី នៅក្នុងប្រទេសទាំង៣នេះមានដូចជាការកំណត់គោលដៅនៃការបំភាយឧស្ម័នសូន្យរបស់រដ្ឋាភិបាល ដែលមានមហិច្ឆតាខ្ពស់ ការលើកទឹកចិត្តពន្ធលើយានយន្ត និងការឧបត្ថម្ភធន និងជម្រើសតម្លៃសមរម្យជាដើម។

ចំណែកនៅសហរដ្ឋអាម៉េរិកវិញ ក៏មានកត្តាមួយចំនួនដែលជួយជំរុញបង្កើនការលក់រថយន្តអគ្គិសនីនេះដែរ ប៉ុន្តែកត្តាដ៏សំខាន់មួយនោះ គឺការលក់បញ្ចុះតម្លៃតែម្ដង។ ជាក់ស្ដែងក្រុមហ៊ុនរថយន្ត Tesla ដែលឈានមុខគេក្នុងទីផ្សាររថយន្តអគ្គិសនីនៅសហរដ្ឋអាម៉េរិក បច្ចុប្បន្នបានលក់បញ្ចុះតម្លៃរថយន្ត ដ៏ពេញនិយមរបស់ខ្លួនជាច្រើនលើករយៈពេលពេញមួយឆ្នាំនេះ ជាហេតុបង្ខំឱ្យក្រុមហ៊ុនរថយន្តដទៃទៀតព្យាយាមធ្វើតាមដូច្នេះដែរ។ ហើយឥឡូវនេះក្រុមហ៊ុនរថយន្តមួយចំនួនកំពុងតែផ្តល់ការលើកទឹកចិត្តកាន់តែច្រើនចំពោះម៉ូដែលរថយន្តអគ្គិសនីរបស់ពួកគេ ហើយក្រុមហ៊ុនចែកចាយ ក៏កំពុងបញ្ចុះតម្លៃកាន់តែខ្លាំងដែរ ខណៈដែលការផ្គត់ផ្គង់រថយន្តអគ្គិសនីកើនឡើងនៅតាមសាខាលក់ចែកចាយរបស់ពួកគេ។

កត្តាជំរុញដ៏សំខាន់មួយទៀតគឺច្បាប់ស្ដីពីការកាត់បន្ថយអតិផរណាដែលរដ្ឋាភិបាលនៅអាម៉េរិកបានបង្កើតដើម្បីបង្កើនឥណទានពន្ធសម្រាប់ការទិញរថយន្តអគ្គិសនីថ្មី និងមួយទឹកដែលមានលក្ខណៈសម្បត្តិគ្រប់គ្រាន់ និងជួយបន្ថយចំណាយរបស់អ្នកទិញរថយន្តអគ្គិសនីបានជាង៣ពាន់ទៅជាង៧ពាន់ដុល្លារ ដោយអាស្រ័យលើតម្រូវការជាក់ស្ដែងផងដែរ៕

អត្ថបទ៖ សុខ ជា